ಅಸಡ್ಡೆ

ಚೆಲುವಿನ ಬಗ್ಗೆ ನಮಗೆ
ಒಂದು ರೀತಿಯ ಹುಚ್ಚು
ಇಲ್ಲವೋ ಬಹಳ ಅಸಡ್ಡೆ

ಬಿದಿಗೆ-ಹುಣ್ಣಿಮೆಯಲ್ಲದ
ಆ ಚಂದಿರನೂ
ಬರೀ ಬಿಳಿಯ ಗುಡ್ಡೆ

ರಂಗವಲ್ಲಿ

ಇನಿಯಾ.
ನಿನಗಾಗಿ
ಬರೆದ
ಈ ಕವನ
ಅಕ್ಷರದ ಗುಡ್ಡೆಯಲ್ಲ
ಪದಗಳ ರಾಶಿಯಲ್ಲ
ಒಲವಿನಿಂದ ಬಿಡಿಸಿದ
ರಂಗವಲ್ಲಿ...

ಅಲಂಕಾರ

ಕನ್ನಡಿಯ ಮುಂದೆ
ನಿಂತು
ಘಂಟೆಗಟ್ಟಲೆ
ಸಜ್ಜಾಗುತ್ತಿದ್ದವಳ
ಅಲಂಕಾರವನ್ನು
ನೋಡಿ,
’ಉತ್ಪ್ರೇಕ್ಷೆ’
ತಲೆ ತಗ್ಗಿಸಿತು...

ಶ್ರೀ
(3-ಅಕ್ಟೋಬರ್-2013)

ದೃಷ್ಟಿ ಬೊಟ್ಟು

ನಲ್ಲೆ,

ನಿನ್ನ
ಚೆಲುವಿನ ಮೇಲೆ
ದೃಷ್ಟಿ ಬೀಳದಿರಲು,
ಕಣ್ಣ ಪಾಪೆಯ
ತೆಗೆದು
ಗಲ್ಲದ ಮೇಲಿಡಲೇ?

-ಶ್ರೀ
(1-oct-2013)

ಐ ಮಿಸ್ ಯು!

ಮುನ್ನೂರರವತ್ತೈದು
ದಿನವೂ
ಸೋರುವ ಮೂಗಿನ
ಒಡೆಯನ,
ನೆಗಡಿ
ಆಕಸ್ಮಿಕವಾಗಿ ನಿಂತಾಗ
ಮೆಲ್ಲನೆ ತನ್ನಷ್ಟಕ್ಕೆ ತಾನೇ
ಉಸರಿದ,
"ಐ ಮಿಸ್ ಯು!"

--ಶ್ರೀ
೧೫-ಮಾರ್ಚ್-೨೦೧೩

’ದುರಂತ’ ಲೇಖಕನ ಸ್ವಗತ

ನನ್ನಿಂದಾಗಿ
ನೀನು ಸುರಿಸಿದ
ಕಣ್ಣೀರ ಹನಿ
ನನ್ನ
ಹಲವಾರು
ಯಶಸ್ವೀ ಬರಹಗಳಿಗೆ
ಬಂಡವಾಳ!

--ಶ್ರೀ
೨೪-ಜನವರಿ-೨೦೧೩

ಪ್ರತಿಬಿಂಬ

ಪ್ರಿಯೆ,

ನನ್ನ ಈ ಹೃದಯ
ಇಷ್ಟೊಂದು
ಸುಂದರವೆಂದು
ನಿನ್ನ ಕಂಗಳಳೊಳಗೆ
ಇಣುಕಿ ನೋಡುವವರೆಗೂ
ತಿಳಿದೇ ಇರಲಿಲ್ಲ...

--ಶ್ರೀ

ನಿನ್ನಲ್ಲಿರುವುದು ರಕುತವಲ್ಲ...

ನಲ್ಲೆ,

ನಿನ್ನ ಧಮನಿಗಳಲ್ಲಿ
ಹರಿಯುವುದು
ನೆತ್ತರಲ್ಲ...
ಅದು ನೆತ್ತರಲ್ಲ...
ಮಧುವಿರಬೇಕು...
ಬರಿಯ ನೆತ್ತರಿಂದಲೇ
ನಿನ್ನಧರ ಇಂತಿಷ್ಟು
ಮಧುರವಾಗಿರಲು
ಸಾಧ್ಯವೇ?

--ಶ್ರೀ

ತಕರಾರು

ನಲ್ಲೆ,
ನನ್ನ ತರಕಾದ ಕೆನ್ನೆಯ
ಬಗ್ಗೆ ತಕರಾರು ಎತ್ತಬೇಡ
ಗಡ್ಡ ಬೆಳೆಯದಂತೆ
ತಪ್ಪದೇ ಮುಲಾಮು
ಹಚ್ಚದಿದ್ದದ್ದು
ನಿನ್ನ ತಪ್ಪಲ್ಲವೇ?
-ಶ್ರೀ

ಕೆಂಪಾದವೋ ಎಲ್ಲ ಕೆಂಪಾದವೋ...

--ಶ್ರೀ
೨ ನವಂಬರ್ ೨೦೧೨

ಚಿತ್ರ ಕೃಪೆ: ಪೂರ್ಣಿಮಾ ರಾಮಪ್ರಸಾದ್

ಕಿರಿದಾದ ಲೋಕ

ಇನಿಯ,
ನಿನ್ನ
ಈ ಎದೆಯ
ಮೇಲೆ
ತಲೆಯನು
ಪ್ರತಿ ಬಾರಿ
ಆನಿಸಿದಾಗಲೆಲ್ಲ
ಈ ಪ್ರಪಂಚ
ಅದೆಷ್ಟು ಕಿರಿದು
ಎಂದು ಅನಿಸುವುದೇಕೇ?

--ಶ್ರೀ
(ನವಂಬರ್ ೧ ೨೦೧೨)

ಚಿತ್ರ ಇಲ್ಲಿಂದ ಹೆಕ್ಕಿದ್ದು: http://thehomelook.blogspot.com/2010/07/lets-go-to-bed-honey.html

ನಲ್ಲೆ, ನೀ ಕನಸ ಕಾಣು...

ನಲ್ಲೆ,
ನೀ ಕನಸ ಕಾಣು...
ನೀ ಕನಸ ಕಾಣು
ಹತ್ತು ಹಲವಾರು...
ನಾನಿರುವೆ ಇಲ್ಲೇ
ನಿನ್ನೊಡನೆ ಸದಾ
ಎಂದೆಂದಿಗೂ
ನಡೆಸಿಕೊಡಲು
ನಿನ್ನ ಕನಸಿನ
ಅಹವಾಲು!

--ಶ್ರೀ
೯-ಮಾರ್ಚ್-೨೦೧೨

ನುಣುಪಾದ ಕೆನ್ನೆಯ ಗುಟ್ಟು

ಚೆಲುವೆ,
ಮೊದಲಿಗಿಂತಲೂ
ಹೆಚ್ಚು
ನುಣುಪಾದ
ನಿನ್ನ ಕೆನ್ನೆಗೆ
ಸದಾ ನಾನಿಡುವ
ಮುತ್ತಿನ ಸುರಿಮಳೆಯೇ
ಕಾರಣವಲ್ಲವೇ?

*
ಸರಸಕ್ಕೆಂದು
ಸನಿಹಕೆ ಬಂದಾಗ
ಸರ್ರನೆ ದೂರ
ಸರಿಯುವ
ನಿನ್ನ ಮನದಲ್ಲಿ
ನಾನು
ಮತ್ತೆ ಹಿಡಿದು
ಮುದ್ದಾಡಬೇಕೆಂಬ
ಬಯಕೆ ಇದೆಯೆಂದು
ನನಗೂ ಗೊತ್ತು :)

--ಶ್ರೀ
೨ ಸೆಪ್ಟೆಂಬರ್ ೨೦೧೧

ಮೌನ-ತಾಪ

ದಿನಪೂರ್ತಿ
ಹೆಂಡತಿಯ
ಮೌನವ್ರತದಿಂದ
ತಲೆಕೆಟ್ಟು
ಕಂಗೆಟ್ಟಿದ್ದ
ಗಂಡನಿಗೆ,
ಅವಳು,
’ಥೂ...ಹಾಳಾದ್ದು...
ಲಿಪ್‍ಸ್ಟಿಕ್ ಕಳೆದುಹೋಯ್ತು’
ಎಂದು
ಕನಸಲಿ ಉಲಿದಾಗ
ನೆಮ್ಮದಿ-ನಿಟ್ಟುಸಿರು-ನಿದ್ದೆ...

--ಶ್ರೀ
೨೪-ಜುಲೈ-೨೦೧೧

ಆರೈಕೆ

ನಿತ್ಯ ನೀರೆರೆದು
ಹೂಗಿಡಗಳ
ಬೆಳೆಸುವುದು
ಕಷ್ಟವೆಂದು
ಮನೆಯೊಳು ತಂದಿಟ್ಟ
ಪ್ಲಾಸ್ಟಿಕ್ ಹೂಗಳೂ
ಬಾಡುವುದು
ಮಾಸುವುದು
ಸಮಯದಿ
ಧೂಳ ಕೊಡವದಿರಲು...

--ಶ್ರೀ

ಪರೋಪಕಾರಾರ್ಥಮಿದಂ ಶರೀರಂ - genX version

ಪರೋಪಕಾರಾಯ ಫಲಂತಿ ವೃಕ್ಷಾ:
ಪರೋಪಕಾರಾಯ ವಹಂತಿ ನದ್ಯಃ
ಪರೋಪಕಾರಾಯ ದುಹಂತಿ ಗಾವ:
ಪರೋಪಕಾರಾರ್ಥಮಿದಂ ಶರೀರಂ

ಇದು ಒಂದು ಜನಜನಿತ ಸುಭಾಷಿತ...
ಇದಕ್ಕೆ ಒಪ್ಪಾಗಿ ಹಂಸಾನಂದಿಯವರು ಈ ರೀತಿ ಕನ್ನಡಕ್ಕೆ ಅನುವಾದಿಸಿದ್ದಾರೆ:

ಬೇರೆಯವರಿಗೆಂದೇ ಹಣ್ಣನೀಯುವುವು ಮರಗಳು
ಬೇರೆಯವರಿಗೆಂದೇ ಹರಿಯುವುವು ನದಿಗಳು
ಬೇರೆಯವರಿಗೆಂದೇ ಹಾಲ್ಕರೆಯುವುದು ಹಸುಗಳು
ಬೇರೆಯವರಿಗಿಂಬಾಗಿರಲಿ ನಮ್ಮ ಜೀವನವೂ!

ಇದೇ ಹೂರಣವನಿಟ್ಟು, ಹೊಸ ಓರಣವ ಮಾಡಿ, ಕಾಲಕ್ಕೆ ತಕ್ಕಂತೆ ಹೀಗೆ ಹೇಳಿದರೆ ಹೇಗೆ?

ತನ್ನ ಮೈ ಸುಟ್ಟುಕೊಂಡು ಬೆಳಕ ಕೊಡುವ ಟಂಗ್‍ಸ್ಟನ್‍ನಂತೆ
ತನ್ನ ಮೈ ಸವೆಸುತ ಶುಚಿಗೊಳಿಸುವ ಸೋಪಿನಂತೆ
ತನ್ನ ಮೈ ಹಿಚಕಿಸಿಕೊಂಡು ಮದ್ದನೀವ ಆಯಿಂಟ್‍ಮೆಂಟ್ ಟ್ಯೂಬಿನಂತೆ
ಬೇರೆಯವರಿಗಾಗಿ ಮುಡಿಪಿರಲಿ ನಮ್ಮ ಜೀವನವೂ...

--ಶ್ರೀ

ಜ್ಞಾನೋದಯ

ಹೆತ್ತವರು
ತಿದ್ದಲು
ತಿಪ್ಪರಲಾಗ ಹೊಡೆದರೂ
ನೆಟ್ಟಗಾಗದ ಗುಣ
ತನ್ನ ಪುಟ್ಟ ಕಂದ
ತನ್ನ ಪ್ರತಿರೂಪವೇ
ಎಂದು
ತಿಳಿದಾಗಲೇ
ತಪ್ಪಿನರಿವಾಗುವುದು!

--ಶ್ರೀ
(೧೦-ಜೂನ್-೨೦೧೧)

ಬಣ್ಣ ಅಳಿಸಿತು...

ಅಳಿಸಿದಳು ಬಣ್ಣವ
ಇಳಿದಿದ್ದ
ತಿಳಿಹಳದಿ
ಕಡುಗೆಂಪು
ಪಚ್ಚೆ-ನೀಲಿ
ಎಲ್ಲವನು ಅಳಿಸಿದಳು
ಬಣ್ಣಗಳ ಕಂಡೊಡನೆ
ಸಿಡುಕು-ಕಿಡಿ ನೋಟ
ಇಂತಿಷ್ಟು ಬಿಡದೆ
ಅಳಿಸಿದಳವಳು...
ಎಲ್ಲವೂ ಮಾಯವಾದಾಗ
ನೆಮ್ಮದಿಯ ನಿಟ್ಟುಸಿರು,
ರಸ್ತೆ ಗುಡಿಸುವಾಕೆಗೆ... :)

--ಶ್ರೀ
೨೩-ಮಾರ್ಚ್-೨೦೧೧

ಎಲ್ಲಮ್ಮನ ಜಾತ್ರೆ

ಇತ್ತೀಚಿನ ದಿನಗಳಲ್ಲಿ
ವೈದ್ಯ ಎಂಬುವನು
ರೋಗಿಯ
ಹೊಟ್ಟೆ ಕತ್ತರಿಸಿ
ಗುಣಪಡಿಸುವ ಬದಲಾಗಿ
ರೋಗಿಯ
ಜೇಬು ಕತ್ತರಿಸಿ
ತನ್ನ ಹೊಟ್ಟೆ
ತುಂಬಿಸಿಕೊಳ್ಳುತ್ತಿದ್ದಾನೆ...

--ಶ್ರೀ
(೧೦-ಫೆಬ್ರವರಿ-೨೦೧೧)
ಚಿತ್ರ ಕೃಪೆ: http://www.pointsincase.com/

ತರಚು ಗಾಯ

ಬೈಕ್‍ನಲ್ಲಿ ಹೋಗುವಾಗ
ಕಾಲಿಗೆ
ತರಚು ಗಾಯವಾಯ್ತೆಂದು
ತನಗೆ ತಗುಲಿಸಿದ
ಟಾಕ್ಸಿ ಡ್ರೈವರ್ ಜೊತೆ
ರಸ್ತೆ ಮಧ್ಯೆ
ವಾಗ್ವಾದಕ್ಕಿಳಿದ
ಟಪೋರಿಗೆ
ಒಂದು ಕಿಲೋಮೀಟರ್
ಉದ್ದದ ಟ್ರಾಫಿಕ್ ಜ್ಯಾಮ್ ಹಿಂದೆ
ಆಂಬುಲೆನ್ಸ್‍ನಲ್ಲಿದ್ದ
ಪ್ರಾಣಪಕ್ಷಿ
ಹಾರಿಹೋಯ್ತೆಂಬ ಅರಿವಿರಲಿಲ್ಲ...

--ಶ್ರೀ
(೬-ಫೆಬ್ರವರಿ-೨೦೧೧)