ರಂಗವಲ್ಲಿ

ಇನಿಯಾ.
ನಿನಗಾಗಿ
ಬರೆದ
ಈ ಕವನ
ಅಕ್ಷರದ ಗುಡ್ಡೆಯಲ್ಲ
ಪದಗಳ ರಾಶಿಯಲ್ಲ
ಒಲವಿನಿಂದ ಬಿಡಿಸಿದ
ರಂಗವಲ್ಲಿ...

ದೃಷ್ಟಿ ಬೊಟ್ಟು

ನಲ್ಲೆ,

ನಿನ್ನ
ಚೆಲುವಿನ ಮೇಲೆ
ದೃಷ್ಟಿ ಬೀಳದಿರಲು,
ಕಣ್ಣ ಪಾಪೆಯ
ತೆಗೆದು
ಗಲ್ಲದ ಮೇಲಿಡಲೇ?

-ಶ್ರೀ
(1-oct-2013)

ಪ್ರತಿಬಿಂಬ

ಪ್ರಿಯೆ,

ನನ್ನ ಈ ಹೃದಯ
ಇಷ್ಟೊಂದು
ಸುಂದರವೆಂದು
ನಿನ್ನ ಕಂಗಳಳೊಳಗೆ
ಇಣುಕಿ ನೋಡುವವರೆಗೂ
ತಿಳಿದೇ ಇರಲಿಲ್ಲ...

--ಶ್ರೀ

ನಿನ್ನಲ್ಲಿರುವುದು ರಕುತವಲ್ಲ...

ನಲ್ಲೆ,

ನಿನ್ನ ಧಮನಿಗಳಲ್ಲಿ
ಹರಿಯುವುದು
ನೆತ್ತರಲ್ಲ...
ಅದು ನೆತ್ತರಲ್ಲ...
ಮಧುವಿರಬೇಕು...
ಬರಿಯ ನೆತ್ತರಿಂದಲೇ
ನಿನ್ನಧರ ಇಂತಿಷ್ಟು
ಮಧುರವಾಗಿರಲು
ಸಾಧ್ಯವೇ?

--ಶ್ರೀ

ತಕರಾರು

ನಲ್ಲೆ,
ನನ್ನ ತರಕಾದ ಕೆನ್ನೆಯ
ಬಗ್ಗೆ ತಕರಾರು ಎತ್ತಬೇಡ
ಗಡ್ಡ ಬೆಳೆಯದಂತೆ
ತಪ್ಪದೇ ಮುಲಾಮು
ಹಚ್ಚದಿದ್ದದ್ದು
ನಿನ್ನ ತಪ್ಪಲ್ಲವೇ?
-ಶ್ರೀ

ಕಿರಿದಾದ ಲೋಕ

ಇನಿಯ,
ನಿನ್ನ
ಈ ಎದೆಯ
ಮೇಲೆ
ತಲೆಯನು
ಪ್ರತಿ ಬಾರಿ
ಆನಿಸಿದಾಗಲೆಲ್ಲ
ಈ ಪ್ರಪಂಚ
ಅದೆಷ್ಟು ಕಿರಿದು
ಎಂದು ಅನಿಸುವುದೇಕೇ?

--ಶ್ರೀ
(ನವಂಬರ್ ೧ ೨೦೧೨)

ಚಿತ್ರ ಇಲ್ಲಿಂದ ಹೆಕ್ಕಿದ್ದು: http://thehomelook.blogspot.com/2010/07/lets-go-to-bed-honey.html

ನಲ್ಲೆ, ನೀ ಕನಸ ಕಾಣು...

ನಲ್ಲೆ,
ನೀ ಕನಸ ಕಾಣು...
ನೀ ಕನಸ ಕಾಣು
ಹತ್ತು ಹಲವಾರು...
ನಾನಿರುವೆ ಇಲ್ಲೇ
ನಿನ್ನೊಡನೆ ಸದಾ
ಎಂದೆಂದಿಗೂ
ನಡೆಸಿಕೊಡಲು
ನಿನ್ನ ಕನಸಿನ
ಅಹವಾಲು!

--ಶ್ರೀ
೯-ಮಾರ್ಚ್-೨೦೧೨

ನುಣುಪಾದ ಕೆನ್ನೆಯ ಗುಟ್ಟು

ಚೆಲುವೆ,
ಮೊದಲಿಗಿಂತಲೂ
ಹೆಚ್ಚು
ನುಣುಪಾದ
ನಿನ್ನ ಕೆನ್ನೆಗೆ
ಸದಾ ನಾನಿಡುವ
ಮುತ್ತಿನ ಸುರಿಮಳೆಯೇ
ಕಾರಣವಲ್ಲವೇ?

*
ಸರಸಕ್ಕೆಂದು
ಸನಿಹಕೆ ಬಂದಾಗ
ಸರ್ರನೆ ದೂರ
ಸರಿಯುವ
ನಿನ್ನ ಮನದಲ್ಲಿ
ನಾನು
ಮತ್ತೆ ಹಿಡಿದು
ಮುದ್ದಾಡಬೇಕೆಂಬ
ಬಯಕೆ ಇದೆಯೆಂದು
ನನಗೂ ಗೊತ್ತು :)

--ಶ್ರೀ
೨ ಸೆಪ್ಟೆಂಬರ್ ೨೦೧೧

ದೂರು

ಇನಿಯ, ನೀ ಹೇಳು...

ನೀ ಕೊಡುವ ಮುತ್ತ-ಮಳೆಯಲಿ ತೋಯದೇ, ಹೇಗೆ ನಿದ್ರಿಸಲಿ?
ತಲೆಯಾನಿಸಿ ಮಲಗುವ ವಿಶಾಲ ಎದೆಯಿಲ್ಲದೆ, ಹೇಗೆ ನಿದ್ರಿಸಲಿ?
ನಿನ್ನ ತೋಳ್ಗಳ ಬಿಗಿ-ಬಿಸಿ ಅಪ್ಪುಗೆಯಿಲ್ಲದೆ, ಹೇಗೆ ನಿದ್ರಿಸಲಿ?
ನಿನ್ನ ತುಟಿಯ ರಸವನು ಸವಿಯದೇ, ಹೇಗೆ ನಿದ್ರಿಸಲಿ?
ಬೆಚ್ಚನೆ ಹೊದಿಕೆಯನು ಹೊದಿಸಿ ರಮಿಸುವ ನೀನಿಲ್ಲದೆ ಹೇಗೆ ನಿದ್ರಿಸಲಿ?
ಸವಿನಿದ್ದೆಯನು ಕದ್ದ ಮುದ್ದುಮೊಗದವನೇ,
ನೀನಿಲ್ಲದೇ ಸವಿಗನಸ ಹೇಗೆ ಕಾಣಲಿ ಇನಿಯ...ಹೇಳು...ಹೇಳು...

--ಶ್ರೀ

ಗೋರಂಟಿ ಚೆಲುವೆ!

ಗೋರಂಟಿ ಹಾಕಿದ ಚೆಲುವೆ
ಸಂಭ್ರಮದಿ ಕುಣಿಯುವ ನವಿಲೇ
ನೀ ನನ್ನ ಒಲವೇ...ಚೆಲುವೇ...
ನೀ ನನ್ನ ನಲಿವೇ...ಚೆಲುವೇ... || ಪ ||

ಬಣ್ಣಗಳ ತುಂಬಿದ ಚಿಟ್ಟೆ
ನನಗೆಂದೇ ನಿನ್ನಯ ಹುಟ್ಟೆ
ಖುಷಿಯನ್ನೇ ತುಂಬಿ ಬಿಟ್ಟೆ
ಸಂತಸಕೆ ನೀನೇ ಗುಟ್ಟೆ... || ೧ ||

ತಂಗಾಳಿಯ ತುಂಬಿದ ನೀರೆ
ನಲಿವನ್ನೇ ಸೂಸುವ ಮೋರೆ
ನೀನಾದೆ ಜೀವದಾ ಹೊಂಗೆರೆ
ನೀನಿರಲು ಜೀವನ ಹಾಲ್ನೊರೆ || ೨ ||

--ಶ್ರೀ
(೨೮-ಅಕ್ಟೋಬರ್-೨೦೧೦)

Image courtesy: http://www.makeupartist.ae/

ಏಕೆ ಬದಲಾದೆ ಗೆಳತಿ?

ಕ್ಲಾಸಿನ ಮೊದಲ ಬೆಂಚಿನ ಕೊನೆಯಲ್ಲಿ
ಪಾಠವನ್ನು ಎವೆಯಿಕ್ಕದೇ ಕೇಳಿಸಿಕೊಳ್ಳುತ್ತಿದ್ದ ನಿನ್ನನಲ್ಲವೇ ಮೆಚ್ಚಿದ್ದು?
ಹತ್ತು-ಹಲವಾರು ಹುಡುಗಿಯರ ಗುಂಪಿನಲ್ಲಿ
ನಿನ್ನಿರುವು ಯಾರಿಗೂ ಅರಿವಿಗೇ ಬಾರದೇ ಇದ್ದದ್ದಕ್ಕಲ್ಲವೇ ಮೆಚ್ಚಿದ್ದು?
ನಿನ್ನೊಳಗಿನ ಜಗವನ್ನು ಬಿಟ್ಟು ಹೊರಗೆ ಬಾರದೆ ಇದ್ದ ಅಂತರ್ಮುಖಿಯನ್ನಲ್ಲವೇ ನಾ ಮೆಚ್ಚಿದ್ದು?
ನನ್ನ ಮನದ ಮಾತು ನಿನಗೆ ತಲಪುವ ಮುನ್ನ ನಿನ್ನೊಳಗಿನ ಭಾವ ಹೇಗಿತ್ತೋ ಅರಿಯೆ...
ನನ್ನ ಪ್ರೇಮದ ಒಕ್ಕಣೆಗೂ ಮೌನವಾಗೆ ಸಮ್ಮತಿಸಿದ್ದೆಯಲ್ಲವೇ?
ಅಂದಿನಿಂದಲೇ ಶುರುವಾಯ್ತು ಹೊಸ ಅಧ್ಯಾಯ...
ನೀ ಬದಲಾದೆ ಗೆಳತಿ...
ಸಮ್ಮೋಹನಗಳಿಸಿದ ಆ ಮೌನ ಮಾಯವಾಯ್ತಲ್ಲ...
ಈಗ, ನನ್ನೊಡನಿದ್ದಾಗ ನಿನ್ನಧರಕೆ ಬಿಡುವಿಲ್ಲ!
ನಾನಿಲ್ಲದಾಗಲೂ ನಿನ್ನ ಈ ತುಂಟ ತುಟಿಗಳಿಗೆ ಅದೇನೋ ಚಡಪಡಿಕೆ!
ಏಕೆ ಬದಲಾದೆ ಗೆಳತಿ?
ನಿನ್ನೀ ನಿರಂತರ ಮಾತುಗಳಿಂದ ನನಗೆ ಅಮೃತವನೇ ಉಣಿಸಿದರೂ
ಅಂದು ನನ್ನ ಸೆಳೆದ ಮೌನ ನನಗೆ ಗುಲಗಂಜಿಯಷ್ಟು ಹೆಚ್ಚು ಮೆಚ್ಚು...!

--ಶ್ರೀ

(ಜೂನ್ ೨೫, ೨೦೧೦)

ಗುಳಿಯೆಂಬ ಸುಳಿ...

ನಲ್ಲೆ,

ನಿನ್ನ ಕೆನ್ನೆಯ ಮೇಲೆ ಮೂಡುವ ಗುಳಿ, ನೀರಿನಲಿ ಮೂಡುವ ಗುಳ್ಳೆಗಳಂತೆ ಥಟ್ಟನೆ ಮಾಯವಾಗುವುದೇಕೆ?
ನೀರಿನ ಸುಳಿಯಲಿ ಈಜುವುದೆಷ್ಟು ತೊಡಕೋ, ನಿನ್ನ ಕೆನ್ನೆಯ ಗುಳಿಯಲಿ ಈಜುವುದಷ್ಟೇ ಸೊಗಸು...
ನಿನ್ನ ಕೆನ್ನೆಯ ಮೇಲೆ ಮೂಡುವ ಗುಳಿ, ಇಣುಕಿ-ಕೆಣಕಿ ಮಾಯಾಜಿಂಕೆಯಂತೆ ಮಾಯವಾಗುವುದೇಕೆ?
ಗುಳಿಯ ಸದಾ ಹಿಡಿದಿಡುವುದರಲ್ಲಿ ನಾ ವಿಫಲನಾಗಿರಬಹುದು; ನನ್ನೊಲವೇ ಗುಳಿಗೆ ಕಾರಣವೆಂದು ತಿಳಿದಿದೆ...
ನಿನ್ನ ಗುಳಿ-ನನ್ನೊಲವಿನ ಬುಗ್ಗೆ, ಚಿಮ್ಮಿ ಮಾಯವಾಗುವುದೂ ಕಣ್ಣಿಗೆ ಹಬ್ಬ...
ಇರಲಿ...ಗುಳಿಗೆ ನಾ ಗಾಳ ಹಾಕುವುದಿರಲಿ...ಗುಳಿಯ ಗಾಳದಲಿ ನಾ ಸಿಲುಕಿದ್ದಕ್ಕಲ್ಲವೇ ನೀ ನನಗೆ ಸಿಕ್ಕಿದ್ದು :)

--ಶ್ರೀ
೧೯ ಫೆಬ್ರವರಿ ೨೦೧೦

ಕೊರೆತ...

ಕಡಲ ಕೊರೆತಕೇನೋ
ಇಡಬಹುದು ಬಂಡೆಗಳ...
ನಿನ್ನ ಮೌನದಿಂದ
ಹೃದಯದಲುಂಟಾಗುವ ಕೊರೆತಕೆ
ಏನು ಮಾಡಲಿ, ಹೇಳೇ ಸಖೀ???

--ಶ್ರೀ

ಸಂಭಾಷಣೆ...ಈ ಪ್ರೇಮ ಸಂಭಾಷಣೆ...

"ಇಲ್ಲ ಸಲ್ಲದ
ನೆಪವ ಹೂಡಿ
ದೂರವೇಕೆ ಸರಿವೆ?
ನಲ್ಲನಿಲ್ಲಿ
ಹಪಹಪಿಸಿಹನು,
ತೋಳ್ಬಂದಿಯಾಗು
ಬಾ ಚೆಲುವೆ!"

"ಕೊಂಚ ನಿಲ್ಲಿ, ನಲ್ಲ...
ಇದಿನ್ನು ಹೊಸತಲ್ಲ!
ಮೈ ಸೋಕದ, ತುಟಿ ತಾಗದ
ಒಲವ ತುಸು ಸವಿಯಿರಲ್ಲ...
ಅವಸರವೇಕೀಗ
ಹೂಡಲು ಕಾಮನಬಿಲ್ಲ?"

--ಶ್ರೀ
(೬-ಫೆಬ್ರವರಿ-೨೦೦೯)

ಭಗ್ನ ಪ್ರೇಮಿ...

ಒಲವಿನಲಿ
ಮಿಂದು-ಬೆಂದು
ಹೊರ ಬಂದ ಜೀವಕ್ಕೆ,
ಹೊಸತೊಂದು
ಜೀವ ಬಂದು
ಒಲವ ಹೊಳೆ
ಹರಿಸಿದರೂ,
ಆ ಜೀವ
ಹಳೆಯ ಕರುಕಲ
ನೆನೆದು ಬೆದೆರುವುದೇಕೆ?

--ಶ್ರೀ
(೨೬ ಡಿಸೆಂಬರ್ ೨೦೦೮)

ಜಿಂಕೆ ಕಣ್ಣು

ಹೀಗೆ ಮನೆಗೆ ಬಂದವಳು,
ಎನ್ನ ಮನವ ಗೆದ್ದಳಲ್ಲ...

ನಾಚಿಕೆಯು ಇನಿತು ಇಲ್ಲ,
ಕುಡಿನೋಟ ಇವಳದಲ್ಲ...

ಕಣ್ಣಲಿ ಕಣ್ಣ ನೆಟ್ಟು,
ಮನದಿ ಕಿಡಿಯ ಇಟ್ಟಳಲ್ಲ...

ಮಾತು ಹೆಚ್ಚು ಹೊರಡಲಿಲ್ಲ,
ಕಣ್ಣುಗಳೇ ಇದ್ದವಲ್ಲ...

ಮಾತಿಗೆಂದು ಕರೆದ ನಾನು,
ಮಾತೇ ಮರೆತು ಹೋದೆನಲ್ಲ...

ಕಣ್ಣ ಸನ್ನೆಯಲ್ಲೆ ಇವಳು
ಬಣ್ಣ ಬಳಿದು ನಡೆದಳಲ್ಲ...

ಕಣ್ಣ,ಬಣ್ಣ ನೆನೆದು ನಾನು,
ನಿಂತ ನೆಲವ ಮರೆತೆನಲ್ಲ...

ತಿರುಗಿ ಮತ್ತೆ ನೋಡಿ ಇವಳು,
ಒಲವ ಬಿತ್ತು ಹೊರಟಳಲ್ಲ...

ಜಿಂಕೆ ಕಣ್ಣ ಹುಡುಗಿ ಇಂದು,
ತನ್ನ ಕಡೆಗೆ ಸೆಳೆದಳಲ್ಲ...
ತನ್ನ ಕಡೆಗೆ ಸೆಳೆದಳಲ್ಲ...

--ಶ್ರೀ