Timepass ಕಡ್ಲೆ ಕಾಯಿ!!!!

ನುಣುಪಾದ ಕೆನ್ನೆಯ ಗುಟ್ಟು

2011-09-01T21:26:00.000-07:00

ಚೆಲುವೆ,
ಮೊದಲಿಗಿಂತಲೂ
ಹೆಚ್ಚು
ನುಣುಪಾದ
ನಿನ್ನ ಕೆನ್ನೆಗೆ
ಸದಾ ನಾನಿಡುವ
ಮುತ್ತಿನ ಸುರಿಮಳೆಯೇ
ಕಾರಣವಲ್ಲವೇ?

*
ಸರಸಕ್ಕೆಂದು
ಸನಿಹಕೆ ಬಂದಾಗ
ಸರ್ರನೆ ದೂರ
ಸರಿಯುವ
ನಿನ್ನ ಮನದಲ್ಲಿ
ನಾನು
ಮತ್ತೆ ಹಿಡಿದು
ಮುದ್ದಾಡಬೇಕೆಂಬ
ಬಯಕೆ ಇದೆಯೆಂದು
ನನಗೂ ಗೊತ್ತು :)

--ಶ್ರೀ
೨ ಸೆಪ್ಟೆಂಬರ್ ೨೦೧೧

ಪ್ರಬಲ ಲೋಕಪಾಲಕ್ಕೆ ಸರಕಾರ ಸಿದ್ಧ!

2011-08-20T10:49:00.000-07:00

ಕುಂಭಕರ್ಣ ಎದ್ದೇಳಣ್ಣ...ಬಂದಿದಾನೆ ನಿಮ್ಮಣ್ಣ...

2011-08-18T11:10:00.000-07:00

Which 'G' brings Anna to Tihar?

2011-08-16T08:17:00.000-07:00

ಪ್ರತಿಭಟನಾ ಸ್ವಾತಂತ್ರ್ಯ

2011-08-15T08:30:00.000-07:00

ಬೆಂಗಳೂರು ಮೆಟ್ರೋ ಯಾವಾಗ?

2011-08-14T21:17:00.000-07:00

--ಶ್ರೀ

’ಮೇಡ್ ಇನ್ ಇಂಗ್ಲೆಂಡ್’

2011-08-14T20:44:00.001-07:00

ಅರಿವಿನ ಅಲೆಗಳು - ಪ್ರಾಜೆಕ್ಟ್ ಮ್ಯಾನೇಜ್ ಮೆಂಟ್ ಮಾಡುವುದು ಹೇಗೆ?

2011-08-12T23:44:00.000-07:00

ಸ್ವತಂತ್ರ ಹಬ್ಬದ ಸಲುವಾಗಿ ಸಂಚಯದ ಸಂಚಲದಿಂದ ಮುಕ್ತ ತಂತ್ರಾಂಶದ ಬಗ್ಗೆ ಏಳುತ್ತಿರುವ ಅರಿವಿನ ಅಲೆಗಳಲ್ಲಿ ನನ್ನ ಪುಟ್ಟ ಪಾತ್ರವೂ ಇದೆ ಎಂದು ಹೇಳಿಕೊಳ್ಳಲು ಹೆಮ್ಮೆಯಾಗುತ್ತಿದೆ.

ಹದಿನಾಲ್ಕು ಅಲೆಗಳಲ್ಲಿ ಒಂದಾಗಿ ಮುಕ್ತ ತಂತ್ರಾಂಶ ಬಳಸಿ ಪ್ರಾಜೆಕ್ಟ್ ಮ್ಯಾನೇಜ್ ಮೆಂಟ್ ಮಾಡುವುದು ಹೇಗೆ ಎಂಬುದಾಗಿ ಬರೆದ ಬರಹ:’ಯೋಜನಾ ನಿರ್ವಹಣೆ - ತಲೆ ಬಿಸಿ ಏಕೆ?’ ಇಂದು ಪ್ರಕಟವಾಗಿದೆ.ಓದಿ ನಿಮ್ಮ ಅನಿಸಿಕೆ ಹೇಳಿ...

--ಶ್ರೀ

ಅಪ್ರೈಸಲ್ ಸಮಯ...ದೊಡ್ಡಣ್ಣಂದಾಯ್ತು...ಮುಂದೇನು?

2011-08-09T09:11:00.000-07:00

-ಶ್ರೀ
೯-ಆಗಸ್ಟ್-೨೦೧೧

ಸೋನಿಯಾ ಗಾಂಧಿಗೆ ಕ್ಯಾನ್ಸರ್ ಬರಲು ಕಾರಣವೇನು???

2011-08-06T09:58:00.000-07:00

--ಶ್ರೀ
೬/೦೮/೨೦೧೧

ಬಿ.ಜೆ.ಪಿ ಅಂದ್ರೆ ಏನಪ್ಪಾ???

2011-08-05T10:26:00.000-07:00

ಪ್ರಜಾತಂತ್ರದಲ್ಲಿ ಹೊಸ ಪುಟ???

2011-08-04T11:04:00.000-07:00

ಮೌನ-ತಾಪ

2011-07-25T10:21:00.000-07:00

ದಿನಪೂರ್ತಿ
ಹೆಂಡತಿಯ
ಮೌನವ್ರತದಿಂದ
ತಲೆಕೆಟ್ಟು
ಕಂಗೆಟ್ಟಿದ್ದ
ಗಂಡನಿಗೆ,
ಅವಳು,
’ಥೂ...ಹಾಳಾದ್ದು...
ಲಿಪ್‍ಸ್ಟಿಕ್ ಕಳೆದುಹೋಯ್ತು’
ಎಂದು
ಕನಸಲಿ ಉಲಿದಾಗ
ನೆಮ್ಮದಿ-ನಿಟ್ಟುಸಿರು-ನಿದ್ದೆ...

--ಶ್ರೀ
೨೪-ಜುಲೈ-೨೦೧೧

ಆರೈಕೆ

2011-07-23T10:43:00.000-07:00

ನಿತ್ಯ ನೀರೆರೆದು
ಹೂಗಿಡಗಳ
ಬೆಳೆಸುವುದು
ಕಷ್ಟವೆಂದು
ಮನೆಯೊಳು ತಂದಿಟ್ಟ
ಪ್ಲಾಸ್ಟಿಕ್ ಹೂಗಳೂ
ಬಾಡುವುದು
ಮಾಸುವುದು
ಸಮಯದಿ
ಧೂಳ ಕೊಡವದಿರಲು...

--ಶ್ರೀ

ನಮ್ಮ ಅಥ್ಲೀಟ್‍ಗಳು ತಂದದ್ದೇನು?

2011-07-06T08:01:00.000-07:00

-ಶ್ರೀ
೬ ಜುಲೈ ೨೦೧೧

ಚಿದಂಬರ ರಹಸ್ಯ!

2011-07-04T10:12:00.000-07:00

--ಶ್ರೀ
೭ ಜುಲೈ ೨೦೧೧

ಪರೋಪಕಾರಾರ್ಥಮಿದಂ ಶರೀರಂ - genX version

2011-06-30T10:14:00.000-07:00

ಪರೋಪಕಾರಾಯ ಫಲಂತಿ ವೃಕ್ಷಾ:
ಪರೋಪಕಾರಾಯ ವಹಂತಿ ನದ್ಯಃ
ಪರೋಪಕಾರಾಯ ದುಹಂತಿ ಗಾವ:
ಪರೋಪಕಾರಾರ್ಥಮಿದಂ ಶರೀರಂ

ಇದು ಒಂದು ಜನಜನಿತ ಸುಭಾಷಿತ...
ಇದಕ್ಕೆ ಒಪ್ಪಾಗಿ ಹಂಸಾನಂದಿಯವರು ಈ ರೀತಿ ಕನ್ನಡಕ್ಕೆ ಅನುವಾದಿಸಿದ್ದಾರೆ:

ಬೇರೆಯವರಿಗೆಂದೇ ಹಣ್ಣನೀಯುವುವು ಮರಗಳು
ಬೇರೆಯವರಿಗೆಂದೇ ಹರಿಯುವುವು ನದಿಗಳು
ಬೇರೆಯವರಿಗೆಂದೇ ಹಾಲ್ಕರೆಯುವುದು ಹಸುಗಳು
ಬೇರೆಯವರಿಗಿಂಬಾಗಿರಲಿ ನಮ್ಮ ಜೀವನವೂ!

ಇದೇ ಹೂರಣವನಿಟ್ಟು, ಹೊಸ ಓರಣವ ಮಾಡಿ, ಕಾಲಕ್ಕೆ ತಕ್ಕಂತೆ ಹೀಗೆ ಹೇಳಿದರೆ ಹೇಗೆ?

ತನ್ನ ಮೈ ಸುಟ್ಟುಕೊಂಡು ಬೆಳಕ ಕೊಡುವ ಟಂಗ್‍ಸ್ಟನ್‍ನಂತೆ
ತನ್ನ ಮೈ ಸವೆಸುತ ಶುಚಿಗೊಳಿಸುವ ಸೋಪಿನಂತೆ
ತನ್ನ ಮೈ ಹಿಚಕಿಸಿಕೊಂಡು ಮದ್ದನೀವ ಆಯಿಂಟ್‍ಮೆಂಟ್ ಟ್ಯೂಬಿನಂತೆ
ಬೇರೆಯವರಿಗಾಗಿ ಮುಡಿಪಿರಲಿ ನಮ್ಮ ಜೀವನವೂ...

--ಶ್ರೀ

ಸೋತ ಬೆಟ್!

2011-06-29T10:36:00.000-07:00

ಹರಕೆಯ ಕುರಿ???

2011-06-29T06:58:00.001-07:00

ಇಪ್ಪತ್ತು-ಸಾವಿರ ಕಣ್ಣುಗಳು - ನಿಮಗೊಂದು ಪುಟ್ಟ ನಮನ!

2011-06-27T11:53:00.000-07:00

ನನ್ನ ಈ ಬ್ಲಾಗ್ ಪುಟ ಇತ್ತೀಚಿಗೆ ೧೦,೦೦೦ ಚಿಟುಕುಗಳನ್ನು(hits) ದಾಟಿತು.
ಇದರಿಂದಾಗಿ ನನ್ನ ಮನದಲ್ಲಿ ತೇಲಿಹೋದ ನೆನಪುಗಳನ್ನು ನಿಮ್ಮೊಡನೆ ಹಂಚಿಕೊಳ್ಳುತ್ತಿದ್ದೇನೆ..

ಅಕ್ಟೋಬರ್ ೨೦೦೫, ನಮ್ಮ ಆಫೀಸನ್ನು ಹೊಸದೊಂದು ಜಾಗಕ್ಕೆ ಬದಲಾಯಿಸಿದರು...
ಮೊದಲಿನ ಜಾಗಕ್ಕಿಂತ ಊರಿನ ಹೊರಭಾಗದಲ್ಲಿದ್ದರಿಂದ ಕ್ಯಾಬ್/ಶಟಲ್ ವ್ಯವಸ್ಥೆಯನ್ನು ಶುರುಮಾಡಿದರು...
ನಾನು ನನ್ನ ಎರಡು ಚಕ್ರದ ಸಂಗಾತಿಯನ್ನು ಬಿಟ್ಟು, ಕ್ಯಾಬ್ ಹಿಡಿಯಲು ಆರಂಭಿಸಿದೆ...ಇದರಿಂದಾಗಿ ಆಫೀಸಿನಲ್ಲಿರುವ ಹೊಸ ಗೆಳೆಯರ ಪರಿಚಯವಾಯ್ತು...
ಹೆಚ್ಚು ಕಡಿಮೆ ಇವರೆಲ್ಲರೂ ಬೇರೆ ಬೇರೆ ವಿಭಾಗ/ಟೀಮ್‍ಗಳಲ್ಲಿದ್ದವರು...ಇವರಲ್ಲಿ ಕೆಲವರು(೪ ಜನ) ನನಗೆ ಹೆಚ್ಚೇ ಆಪ್ತರಾಗತೊಡಗಿದರು...
ಹೆಚ್ಚು ಹೆಚ್ಚು ಪರಿಚಯಗೊಳ್ಳುತ್ತಿದ್ದಂತೆ, ಈ ನಾಲ್ವರಲ್ಲಿ ಮೂವರು ಕವಿತೆ ಬರೆಯುವವರೆಂದು ತಿಳಿಯಿತು!
ಇವರುಗಳು ಕನ್ನಡಿಗರಲ್ಲವಾದ್ದರಿಂದ, ಅವರು ಹಿಂದಿ/ಇಂಗ್ಲಿಷ್/ತೆಲುಗು ಹೀಗೆ ಬೇರೆ ಭಾಷೆಗಳಲ್ಲಿ ಬರೆಯುತ್ತಿದ್ದರು...
ಕ್ಯಾಬ್‍ನಲ್ಲಿ/ಆಫೀಸಿನಲ್ಲಿ ಸಿಕ್ಕಾಗ ಈ ಕವಿತೆಗಳ ಬಗ್ಗೆ ವಿಚಾರವಿನಿಮಯಗಳೂ/ಚರ್ಚೆಗಳೂ ನಡೆಯುತ್ತಿತ್ತು...
ಇದೇ ಸಮಯದಲ್ಲಿ ನಾನು ಇಂಟರ‍್ನೆಟ್ಟಿನಲ್ಲಿ ತೇಲಾಡಿದ ಒಂದೆರಡು ಕನ್ನಡದ ಕವಿತೆಗಳನ್ನೂ ಓದಲಾರಂಭಿಸಿದ ನೆನಪು...
ನನ್ನ ತಂದೆಯವರು ಮನೆಯಲ್ಲಿ ತಮಾಷೆಗೆ ಹಾಡುತ್ತಿದ್ದ ಚುಟುಕಗಳೂ ನೆನಪಿಗೆ ಬಂದಿರಬಹುದು...
ನಾನೂ ಒಮ್ಮೆ ಕನ್ನಡದಲ್ಲಿ ಒಂದೆರಡು ಕವನಗಳನ್ನು ಬರೆಯಲು ಪ್ರಯತ್ನಿಸೋಣವೆನಿಸಿತು...
ಹೀಗೆ ಒಮ್ಮೆ ಈ ನಾಲ್ವರು ಗೆಳೆಯರೊಂದಿಗೆ ಆಫೀಸಿನಲ್ಲಿ ಕಾಫಿ ಕುಡಿಯುತ್ತಾ ನೋಡಿದ ಕಾಮನಬಿಲ್ಲು ಸ್ಫೂರ್ತಿಯಾಗಿ, ನನ್ನ ಮೊದಲ ಕವನ(?) ಮೂಡಿಬಂತು...
ಹೀಗೆ ಕವಿ/ಕವಯಿತ್ರಿಯರ ನಡುವಿನಲ್ಲಿ ನನ್ನದೊಂದು ಕೊಸರಿರಲಿ ಎಂದು ಮನಸ್ಸಿಗೆ ಬಂದದ್ದನ್ನು ಗೀಚಲಾರಂಭಿಸಿದೆ...
ಬರೆದದ್ದನ್ನು ಇವರುಗಳೊಡನೆ ಹಂಚಿಕೊಳ್ಳುವುದು, ಇವರುಗಳಿಗೆ ತಿಳಿಯುವಂತೆ ಇಂಗ್ಲಿಷ್‍ನಲ್ಲಿ ವಿವರಿಸುವುದು ಹೀಗೆ...
ಇವರುಗಳು ನನ್ನ ಬರಹಗಳನ್ನು ಬ್ಲಾಗ್‍ ನಲ್ಲಿ ಬರೆಯಬೇಕೆಂದೂ, ಕನ್ನಡದ ಬಳಗದಲ್ಲಿ ಹಂಚಿಕೊಳ್ಳಬೇಕೆಂದು ಒತ್ತಾಯಿಸಲಾರಂಭಿಸಿದರು...
ಸರಿ ಇವರ ಒತ್ತಾಯಕ್ಕೆ ಮಣಿದು ನಾನು ಬರೆದ ಕೆಲವು ಕವನ(?)ಗಳನ್ನು ಈ ಟೈಮ್‍ಪಾಸ್ ಕಡ್ಲೇಕಾಯಿಯಲ್ಲಿ ಸೇರಿಸಲು ಅರಂಭಿಸಿದ್ದು...
ಹೀಗೆ ಶುರುವಾದದ್ದು ಟೈಂಪಾಸ್ ಕಡ್ಲೇಕಾಯಿ!

ನನ್ನ ಬ್ಲಾಗಿಗೆ ’ಟೈಂಪಾಸ್ ಕಡ್ಲೇಕಾಯಿ’ಹೆಸರು ಬಂದದ್ದು ಹೇಗೆ ಎಂದು ಹಲವಾರು ಜನ ನನ್ನನ್ನು ಕೇಳಿದ್ದಾರೆ...
ಇದೇನು ದೊಡ್ಡ ಗುಟ್ಟಲ್ಲ ಬಿಡಿ...
ಹೆಸರೇನಿಡಬೇಕೆಂದು ತಲೆ ಹೆಚ್ಚಾಗಿ ಕೆಡಿಸಿಕೊಳ್ಳದೇ, ಬ್ಲಾಗ್ ಶುರು ಮಾಡುವ ಹಿಂದಿನ ದಿನ ತಿಂದಿದ್ದ ನನ್ನ ನೆಚ್ಚಿನ ’ಕಾಂಗ್ರೆಸ್ ಕಡ್ಲೇಕಾಯಿ’ ನೆನೆಯುತ್ತಾ ಕೊಟ್ಟ ಹೆಸರಿದು... :)

ಇದೇ ಸಮಯದಲ್ಲೇ ಸಂಪದ.ನೆಟ್ ಪರಿಚಯವಾದದ್ದು...
ಇದರಿಂದಲೇ ಅದೆಷ್ಟೋ ಹೊಸ ವಿಚಾರಗಳನ್ನು ತಿಳಿಯುತ್ತಾ, ಹೊಸ ಗೆಳೆಯರನ್ನು ಪಡೆಯುತ್ತಾ, ಹಲವಾರು ವಿಧದ ವಿಷಯಗಳ ಮೇಲೆ ನಾನು ಬರೆದದ್ದು!
ಹಲವಾರು ತರಹದ ವ್ಯಕ್ತಿತ್ವಗಳ-ಚಿಂತನೆಗಳ ಪರಿಚಯ...ಅಲ್ಲದೇ, ನಾನು ಬರೆದದಕ್ಕೆ ಮತ್ತೆ ಬರೆಯುವಂತೆ ಉತ್ತೇಜಿಸುವ, ಪ್ರೋತ್ಸಾಹಿಸುವ ವಾತಾವರಣವನ್ನು ಒದಗಿಸಿದ್ದು ಸಂಪದ!
ನಾನಿಂದು ಸಂಪದಕ್ಕೆಷ್ಟು ನಮನ ಸಲ್ಲಿಸಿದರೂ ಸಾಲದು...

ಇದಲ್ಲದೇ, ನನ್ನನ್ನು ಬರೆಯಲು ಪ್ರೋತ್ಸಾಹಿಸಿದ ಬಂಧುಗಳು-ಗೆಳೆಯರು, ಆಪ್ತರೂ ಹಲವಾರು...

ಈ ಬ್ಲಾಗ್ ಪುಟ ತೆರೆದಾಗ ನನಗೆ ’ನಾಲ್ಕು ತಿಂಗಳು ನಡೆಸಬಲ್ಲೆನೇ?’ ಎಂಬ ಅನುಮಾನವಿತ್ತು,
ಆದರೆ, ಹಾಗೂ-ಹೀಗೂ ಮನಕ್ಕೆ ಬಂದದ್ದನ್ನು ಗೀಚುತ್ತ ೪ ವರ್ಷಕ್ಕೂ ಹೆಚ್ಚು ದಿನ ಇದನ್ನು ಕಾಯ್ದುಕೊಂಡಿದ್ದೇನೆ ಎಂದರೆ ನನಗೇ ಅಚ್ಚರಿಯಾಗುತ್ತದೆ!
ಈ ತಾಣವನ್ನು ಒಂದೇ ಆಯಾಮಕ್ಕೆ ಸೀಮಿತಗೊಳಿಸದೆ, ನಾನು ತೆಗೆದ ಚಿತ್ರಗಳನ್ನು, ಪ್ರವಾಸ ಕಥನಗಳನ್ನು, ವ್ಯಂಗ್ಯ ಚಿತ್ರಗಳನ್ನು, ಒಂದೆರಡು ಸಣ್ಣಕಥೆಯನ್ನು ಸೇರಿಸಿದ್ದೀನಿ...
ಇದನ್ನೆಲ್ಲ ಇಷ್ಟು ದಿನ ಓದಿ-ಮೆಚ್ಚಿ-ಹರಸಿ-ಪ್ರೋತ್ಸಾಹಿಸಿದ ನಿಮಗೆಲ್ಲ ಒಂದು ಪುಟ್ಟ ಧನ್ಯವಾದ, ನಮನ, ಥ್ಯಾಂಕ್ಸ್!

--ಶ್ರೀ
(೨೮-ಜೂನ್-೨೦೧೧)

ಕಲೆಯ ಹೆಸರಲ್ಲಿ...

2011-06-14T10:07:00.001-07:00

ರಾಹುಲ್ ಬಾಬಾ

2011-06-13T10:12:00.000-07:00

ಜ್ಞಾನೋದಯ

2011-06-10T10:58:00.000-07:00

ಹೆತ್ತವರು
ತಿದ್ದಲು
ತಿಪ್ಪರಲಾಗ ಹೊಡೆದರೂ
ನೆಟ್ಟಗಾಗದ ಗುಣ
ತನ್ನ ಪುಟ್ಟ ಕಂದ
ತನ್ನ ಪ್ರತಿರೂಪವೇ
ಎಂದು
ತಿಳಿದಾಗಲೇ
ತಪ್ಪಿನರಿವಾಗುವುದು!

--ಶ್ರೀ
(೧೦-ಜೂನ್-೨೦೧೧)

ನಮ್ಮ ಪ್ರಧಾನಿ ಅತಿ ದೊಡ್ಡ ಸನ್ಯಾಸಿ ಅಂತೆ...

2011-06-06T21:08:00.000-07:00

ಬಣ್ಣ ಅಳಿಸಿತು...

2011-03-23T21:10:00.000-07:00

ಅಳಿಸಿದಳು ಬಣ್ಣವ
ಇಳಿದಿದ್ದ
ತಿಳಿಹಳದಿ
ಕಡುಗೆಂಪು
ಪಚ್ಚೆ-ನೀಲಿ
ಎಲ್ಲವನು ಅಳಿಸಿದಳು
ಬಣ್ಣಗಳ ಕಂಡೊಡನೆ
ಸಿಡುಕು-ಕಿಡಿ ನೋಟ
ಇಂತಿಷ್ಟು ಬಿಡದೆ
ಅಳಿಸಿದಳವಳು...
ಎಲ್ಲವೂ ಮಾಯವಾದಾಗ
ನೆಮ್ಮದಿಯ ನಿಟ್ಟುಸಿರು,
ರಸ್ತೆ ಗುಡಿಸುವಾಕೆಗೆ... :)

--ಶ್ರೀ
೨೩-ಮಾರ್ಚ್-೨೦೧೧

ಕಳ್ಳ - ಪೋಲೀಸ್

2011-02-15T05:13:00.001-08:00

ಏರ‍್ಪೋರ್ಟ್‍ಗೆ ಮೆಟ್ರೋನೋ - ಹೈ ಸ್ಪೀಡ್ ರೈಲೋ?

2011-02-12T09:29:00.000-08:00

ಶ್ರೀ
(12-Feb-2011)

ಎಲ್ಲಮ್ಮನ ಜಾತ್ರೆ

2011-02-09T22:02:00.000-08:00

ಇತ್ತೀಚಿನ ದಿನಗಳಲ್ಲಿ
ವೈದ್ಯ ಎಂಬುವನು
ರೋಗಿಯ
ಹೊಟ್ಟೆ ಕತ್ತರಿಸಿ
ಗುಣಪಡಿಸುವ ಬದಲಾಗಿ
ರೋಗಿಯ
ಜೇಬು ಕತ್ತರಿಸಿ
ತನ್ನ ಹೊಟ್ಟೆ
ತುಂಬಿಸಿಕೊಳ್ಳುತ್ತಿದ್ದಾನೆ...

--ಶ್ರೀ
(೧೦-ಫೆಬ್ರವರಿ-೨೦೧೧)
ಚಿತ್ರ ಕೃಪೆ: http://www.pointsincase.com/

ಯು.ಪಿ.ಎ. ಸಾಧನೆ ಅಂತರಿಕ್ಷಕ್ಕೇ ಮುಟ್ಟಿತಲ್ಲಯ್ಯ!

2011-02-08T19:35:00.000-08:00

ಯು.ಪಿ.ಎ. ಸಾಧನೆ ಅಂತರಿಕ್ಷಕ್ಕೇ ಮುಟ್ಟಿತಲ್ಲಯ್ಯ! (8/Feb/2011)
UPA's achievement has reached 'starry heights'! (8/Feb/2011)

--ಶ್ರೀ

ಚಿ.ಮೂ ಡಾಕ್ಟರೇಟ್ vs ಗವರ್ನರ್

2011-02-07T19:37:00.000-08:00

ಡಾಕ್ಟರೇಟ್‍ಗೆ ಚಿ.ಮೂ. ಅಂತ ಪತ್ರ ಬರೆದದ್ದಕ್ಕೆ, ಛೀ...ಥೂ...ಅಂತ ಉತ್ರ ಬರ್ದಿದಾರೆ!!!

ತರಚು ಗಾಯ

2011-02-06T05:25:00.000-08:00

ಬೈಕ್‍ನಲ್ಲಿ ಹೋಗುವಾಗ
ಕಾಲಿಗೆ
ತರಚು ಗಾಯವಾಯ್ತೆಂದು
ತನಗೆ ತಗುಲಿಸಿದ
ಟಾಕ್ಸಿ ಡ್ರೈವರ್ ಜೊತೆ
ರಸ್ತೆ ಮಧ್ಯೆ
ವಾಗ್ವಾದಕ್ಕಿಳಿದ
ಟಪೋರಿಗೆ
ಒಂದು ಕಿಲೋಮೀಟರ್
ಉದ್ದದ ಟ್ರಾಫಿಕ್ ಜ್ಯಾಮ್ ಹಿಂದೆ
ಆಂಬುಲೆನ್ಸ್‍ನಲ್ಲಿದ್ದ
ಪ್ರಾಣಪಕ್ಷಿ
ಹಾರಿಹೋಯ್ತೆಂಬ ಅರಿವಿರಲಿಲ್ಲ...

--ಶ್ರೀ
(೬-ಫೆಬ್ರವರಿ-೨೦೧೧)

some-ಮೇಳನ

2011-02-06T05:09:00.000-08:00

ಅಚ್ಚಕನ್ನಡದಲ್ಲಿ ಮಾತಾಡ್ಬೇಕು
ಸಂಸ್ಕೃತ ಹೇರಿಕೆ ನಿಲ್ಬೇಕು
ಎಂಬರ್ಥ ಬರುವ ಹೊತ್ತಗೆಗಳು
ಮಾರುತ್ತಿರುವ ಮಳಿಗೆಯಲ್ಲಿದ್ದ ಯುವಕ,
ತನ್ನ ಗೆಳೆಯನ ಬಳಿ ಪಿಸುಗುಟ್ಟುತ್ತಿದ್ದ
"ನಾನಿನ್ನೂ ರೌಂಡ್ಸ್ ಹೋಗೇ ಇಲ್ಲ...
ಒಂದ್ ಸರ್ತಿ ಎಲ್ಲ ಸ್ಟಾಲ್ಸ್ ನೋಡಿ,
ಬುಕ್ಸ್ ತೊಗೊಳ್ಬೇಕು!"

***

ಸಮ್ಮೇಳನಕ್ಕೆ
ಬಂದ ಯುವಕ
ಗೊಣಗುತ್ತಿದ್ದ
ಇಲ್ಲಿ
ಸಿಗೋದು ಎರಡೇ...
ಬುಕ್ಸು-ಧೂಳು!

***

ಸಾಹಿತ್ಯ ಸಮ್ಮೇಳನದಲ್ಲಿ
ಕವಿದಿದ್ದ
ಧೂಳು-ದುಮ್ಮು
ಬೆಂಗಳೂರು-ಕನ್ನಡಿಗ
ಸೋಂಬೇರಿತನವನ್ನು
ಕೊಡವಿ
ಎದ್ದಿದ್ದಕ್ಕಿರಬೇಕು!

--ಶ್ರೀ
(೬-ಫೆಬ್ರವರಿ-೨೦೧೧)

ದೂರು

2011-01-26T21:31:00.000-08:00

ಇನಿಯ, ನೀ ಹೇಳು...

ನೀ ಕೊಡುವ ಮುತ್ತ-ಮಳೆಯಲಿ ತೋಯದೇ, ಹೇಗೆ ನಿದ್ರಿಸಲಿ?
ತಲೆಯಾನಿಸಿ ಮಲಗುವ ವಿಶಾಲ ಎದೆಯಿಲ್ಲದೆ, ಹೇಗೆ ನಿದ್ರಿಸಲಿ?
ನಿನ್ನ ತೋಳ್ಗಳ ಬಿಗಿ-ಬಿಸಿ ಅಪ್ಪುಗೆಯಿಲ್ಲದೆ, ಹೇಗೆ ನಿದ್ರಿಸಲಿ?
ನಿನ್ನ ತುಟಿಯ ರಸವನು ಸವಿಯದೇ, ಹೇಗೆ ನಿದ್ರಿಸಲಿ?
ಬೆಚ್ಚನೆ ಹೊದಿಕೆಯನು ಹೊದಿಸಿ ರಮಿಸುವ ನೀನಿಲ್ಲದೆ ಹೇಗೆ ನಿದ್ರಿಸಲಿ?
ಸವಿನಿದ್ದೆಯನು ಕದ್ದ ಮುದ್ದುಮೊಗದವನೇ,
ನೀನಿಲ್ಲದೇ ಸವಿಗನಸ ಹೇಗೆ ಕಾಣಲಿ ಇನಿಯ...ಹೇಳು...ಹೇಳು...

--ಶ್ರೀ

ಸ್ವರ್ಗ-ನರಕ

2010-11-16T20:22:00.000-08:00

ಆಹಾ...
ತಂಪಾದ ಗಾಳಿ
ತಿಳಿ ತುಂತುರು
ಸ್ವರ್ಗಕ್ಕೆ ಮೂರೇ ಗೇಣು
ಎಂದಿತು ನನ್ನುಸಿರು

ಸದ್ದಿಲ್ಲದೇ
ತಿಳಿಗಾಳಿಯಂತೆ
ಪಕ್ಕದಲ್ಲೇ
ವೇಗವಾಗಿ ಸಾಗಿದ
ಕಾರೊಂದು
ಹಾರಿಸಿತು
ಕೊಚ್ಚೆ-ಕಲೆ-ಕೆಸರು!

--ಶ್ರೀ

ಗೋರಂಟಿ ಚೆಲುವೆ!

2010-10-28T20:56:00.000-07:00

ಗೋರಂಟಿ ಹಾಕಿದ ಚೆಲುವೆ
ಸಂಭ್ರಮದಿ ಕುಣಿಯುವ ನವಿಲೇ
ನೀ ನನ್ನ ಒಲವೇ...ಚೆಲುವೇ...
ನೀ ನನ್ನ ನಲಿವೇ...ಚೆಲುವೇ... || ಪ ||

ಬಣ್ಣಗಳ ತುಂಬಿದ ಚಿಟ್ಟೆ
ನನಗೆಂದೇ ನಿನ್ನಯ ಹುಟ್ಟೆ
ಖುಷಿಯನ್ನೇ ತುಂಬಿ ಬಿಟ್ಟೆ
ಸಂತಸಕೆ ನೀನೇ ಗುಟ್ಟೆ... || ೧ ||

ತಂಗಾಳಿಯ ತುಂಬಿದ ನೀರೆ
ನಲಿವನ್ನೇ ಸೂಸುವ ಮೋರೆ
ನೀನಾದೆ ಜೀವದಾ ಹೊಂಗೆರೆ
ನೀನಿರಲು ಜೀವನ ಹಾಲ್ನೊರೆ || ೨ ||

--ಶ್ರೀ
(೨೮-ಅಕ್ಟೋಬರ್-೨೦೧೦)

Image courtesy: http://www.makeupartist.ae/

ಕರ್ಪೂರದ ಗೊಂಬೆ

2010-09-26T19:31:00.000-07:00

ಪ್ರತಿಯೊಬ್ಬನೂ
ಕರ್ಪೂರದ ಗೊಂಬೆಯೇ...
ಕೆಲವರು
ಜ್ಯೋತಿಯಂತೆ
ಹೊತ್ತಿ ಉರಿದರೆ,
ಹಲವರು
ಹೇಳಹೆಸರಿಲ್ಲದೆ
ಮಾಯವಾಗುವರು
ತಿಳಿಗಾಳಿಯಲಿ...

--ಶ್ರೀ
(೨೫-ಸೆಪ್ಟೆಂಬರ್-೨೦೧೦)

ಬಸವ ಪುರಾಣ...

2010-09-19T11:36:00.000-07:00

ಸುಮಾರು ಮೂರು ವಾರದ ಹಿಂದೆ ಗೋಕುಲಾಷ್ಟಮಿ ಆಯ್ತಲ್ಲ? ಆ ದಿನ ನಮ್ ಮನೇಗೆ ತಂದ ಬಾಳೆ ಕಂದಿನ ಜೊತೆ ಬಸವನ ಹುಳು ಕೂಡ ಬಂತಪ್ಪ!
ನನ್ ಹೆಂಡತಿ, ಅಮ್ಮ ಎಲ್ಲ..."ಎಸೀ ಆಚೆಗೆ" ಅಂತ ನೋಡಿದ ತಕ್ಷ್ಣ ಕೂಗಿದ್ರು...
ನಾನು "ಪಾಪ! ನಾನು ಮನೆಯಿಂದ ಎಸಿಯಲ್ಲ" ಅಂತ ಹೇಳಿ, ಮನೇಲಿರೋ ಒಂದು ಹೂಕುಂಡಕ್ಕೆ ಹಾಕಿ ಬಂದೆ...
ನಮ್ ಮನೇಲಿ ಗೋಕುಲಾಷ್ಟಮಿ ಹಬ್ಬದ ಭರಾಟೇಲಿ ಈ ಬಸವನ ಹುಳು ಬಗ್ಗೆ ಮರ್ತೇ ಹೋಯ್ತು...

ಅದಾದ ಮೇಲೆ ಎಂದಿನಂತೆ ಮಾಮೂಲು ಆಫೀಸ್ ಕೆಲ್ಸ- ಮನೆ ಕೆಲ್ಸ... ಈ ಪುಟಾಣಿ ಬಗ್ಗೆ ನೆನಪೇ ಬರಲಿಲ್ಲ...

ಮೊನ್ನೆ "ಏನಪ್ಪ? ಮಾರಾಯಾ, ನನ್ನ ಮರತೇ ಬಿಡೋದಾ?" ಅಂತ ನಮ್ ಮನೆ ಮೆಟ್ಟಿಲ ಮೇಲೆ ಕಾಣಿಸಿಕೊಂಡು ಬಿಟ್ಟ!
ನಾನು ಆಫೀಸಿಗೆ ಹೊರಟವನು ತಕ್ಷಣ ಕ್ಯಾಮರ ತೆಗೆದು ಒಂದಿಷ್ಟು ಚಿತ್ರ ತೆಗೆಯೋಷ್ಟು ಹೊತ್ತಿಗೆ...ಒಂದು ಮೆಟ್ಟಿಲು ಪೂರ್ತಿ ಇಳಿದೇ ಬಿಟ್ಟ...

ಚಿಕ್ ಮಕ್ಕಳಾಗಿದ್ದಾಗ, ಬಸವನ ಹುಳು ತುಂಬಾ ನಿಧಾನ ಅಂತೆಲ್ಲಾ ಓದ್ಕೊಂಡು, 'ಸಿಕ್ಕಾ...............ಪಟ್ಟೆ ನಿಧಾನ' ಅಂದ್ಕೊಂಡಿದ್ದೆ!
ಆದ್ರೆ ಮೊನ್ನೆ ಗೊತ್ತಾಯ್ತು ಈ ಬಸವ ನಾನು ಅಂದ್ಕೊಂಡಿದ್ದಿಕ್ಕಿಂತ ಭಾರಿ ಫಾಸ್ಟ್ ಅಂತ!
ಮೆಟ್ಟಿಲ ಮೇಲಿದ್ದ ಒಂದು ಹೂಕುಂಡದ ಮೇಲೆ ಏರಿದಾಗ...'ಇಲ್ಲೇ ಇರ್ತಾನೆ ಬಿಡು' ಅಂತ ಆಫೀಸಿಗೆ ಹೊರಟು ಹೋದೆ...

ಸರಿ ಆ ದಿನ ಕಳೀತು...ಮುಂದಿನ ದಿನ, ಮನೆ ಬಾಗಿಲು ಎದಿರೇ ಪ್ರತ್ಯಕ್ಷ....ಅಮ್ಮ ಕೂಗಿದ್ರು.."ಲೇಯ್...ಮನೇ ಒಳಗೇ ಬರ್ತಾ ಇದೆ...ಬಿಸಾಕೋ" ಅಂತ...
ನಾನು ಬಿಡ್ತೀನಾ? ಅದನ್ನ ಎತ್ತಿ ಹೂಕುಂಡಕ್ಕೆ ಬಿಡೋಣ ಅಂತ ಒಂದು ಪೇಪರ್ ತೊಗೊಂಡೆ...

ಅದು ನೋಡಿದ್ರೆ ಎಂತಾದ್ದು ನೋಡಿ!

ಸರಿ.. ಆ ಚೀಟಿಲಿದ್ದ ಎಲ್ಲಾ.ಸಾಮಾನ್ಯ ಜ್ಞಾನದ ಮಾಹಿತಿನೂ ತಲೆ ಒಳಗಡೆ ತುಂಬಿಸ್ಕೊಳ್ತು...
"ಸರಿ ಆಯ್ತೇನಪ್ಪ ಓದಿದ್ದು???" ಅಂತ ಈ ಚೀಟಿಯಿಂದ ಮತ್ತೊಂದು ಹೂಕುಂಡಕ್ಕೆ "ಇದೇ ನಿನ್ನ ಹೊಸ ಮನೆ" ಅಂತ ಮೆಲ್ಲಗೆ ಬಿಟ್ಟೆ...
ಅದು ನಿಧಾನವಾಗಿ ಕಾರ್ಪೊರೇಷನ್ ಆಫೀಸರ್ ಥರ ಇನ್ಸ್ಪೆಕ್ಷನ್ ನಡೆಸಿ ಒಳಕ್ಕೆ ಹೋಯಿತು...

ಸರಿ ಅಲ್ಲಿ ಒಂದ್ ದಿನ ಇತ್ತೇನೋ...ಮತ್ತೆ ಈಗ ತೆವಳಿಕೊಂಡು ಬಂದು ಕಿಟಕಿ ಹತ್ರ ನಿದ್ದೇ ಮಾಡ್ತಾ ಇದೆ ಈಗ...ನೋಡಿ ಹೇಗೆ ತಾಚಿ ಮಾಡಿದೆ!

ಅಮ್ಮ ಹೇಳಿದಾರೆ "ಮನೇ ಒಳಗೆ ಬಂದ್ರೆ ನಿನ್ನ ಸುಮ್ನೆ ಬಿಡಲ್ಲ" ಅಂತ...
ನಾನು ಮೆತ್ಗೆ "ಒಳ್ಗಡೆ ಬಂದ್ರೆ ಪಾಟಲ್ಲಿ ಬಿಡಮ್ಮ" ಅಂತ ಹೇಳಿದೀನಿ...ನೋಡ್ಬೇಕು ಏನಾಗತ್ತೋ...ಇವತ್ತಿಗೆ ಅದು ನಮ್ ಮನೇಗೆ ಬಂದು ೧೭ ದಿನ ಆಯ್ತು...

ಇಂಟರ್ನೆಟ್ಟಲ್ಲಿ ಬಸವನ್ ಹುಳ ಒಂದ್ ವಾರದಿಂದ ೩ ವರ್ಷದ ವರ್ಗೂ ನಿದ್ದೆ ಮಾಡತ್ತೆ ಅಂತ ಕೊಟ್ಟಿದಾರೆ...ನೋಡ್ಬೇಕು ಕೋಳಿ ನಿದ್ದೇ ಮಾಡತ್ತೋ ಕುಂಭಕರ್ಣ ನಿದ್ದೆ ಮಾಡತ್ತೋ ಅಂತ...
ಒಟ್ನಲ್ಲಿ ನಮ್ ಮನೇಲಿ ಬಸವನ್ ಹುಳ ಇದೇ ಅನ್ನೋ ವಿಷ್ಯ ಏನೋ ಒಂಥರಾ...ಥರಾ... ;)

ಇವನ ಮಿಕ್ಕ ಪೋಸ್‍ಗಳು ನೋಡ್ಬೇಕಂದ್ರೆ ಇಲ್ಲಿ ಚಿಟಕಿಸಿ...

--ಶ್ರೀ

ತುಡಿತ

2010-07-16T06:59:00.000-07:00

ಎದುರಿನವ
ನೂರಾರು
ವಿಷಯಗಳನ್ನು
ಅದೆಷ್ಟು ಕುತೂಹಲಕಾರಿಯಾಗಿ ಹೇಳುತ್ತಿದ್ದರೂ
ಮನದಲ್ಲಿ ಅವಿತ
ಮತ್ತೊಂದು ವಿಷಯವನ್ನು
ಅರುಹದೇ
ಅವನಿಂದ ಕೇಳಬಯಸುವುದು!

--ಶ್ರೀ

ಅಳು - ನಗು

2010-06-30T03:25:00.000-07:00

ಸತ್ತವನ ನೆನೆಯುತ್ತಾ
ಗಳಗಳನೆ ಅಳುತ್ತಿದ್ದೆ...
ಈ ನನ್ನ ಅಳು
ಇನ್ನೊಬ್ಬನನ್ನು
ಮೆಲ್ಲನೆ ಕೊಲ್ಲುತ್ತಿದೆ
ಎಂದು ತಿಳಿದ ಕ್ಷಣವೇ
ನಗುಮೊಗದ ಮುಖವಾಡ ಧರಿಸಬೇಕಾಯ್ತು...

--ಶ್ರೀ

ನಾ ನಿನ್ನನ್ನು ಪ್ರೀತಿಸುತ್ತೇನೆ...

2010-06-25T12:42:00.001-07:00

ಮನದಲೇನೋ ತೊಳಲಾಟ
ಅಂದಿಲ್ಲದ ಆಕರ್ಷಣೆ ಇಂದೇಕೆ??!
ತಡೆಹಿಡಿಯಲಾಗದ ಜ್ವಾಲಾಮುಖಿಯಂತೆ
ನನ್ನೊಳಗಿನ ಭಾವನೆಗಳು
ಒತ್ತರಿಸಿಕೊಂಡು ಬರಲೆತ್ನಿಸುತಿದೆ...
ಆದರೆ....ಈಗ ತಡವಾಗಿದೆ...

ಅಂದು ನೀನು ನನ್ನಲ್ಲಿ ಪ್ರೀತಿಯ ಪ್ರಸ್ತಾಪವನ್ನು
ಮೊಗವರಳಿಸಿ ಅದೆಷ್ಟು ಖುಷಿಯಲಿ ಮಾಡಿದ್ದೆ!
ಅಂದು ಕಂಡಿದ್ದ ನಿನ್ನ ಕಣ್ಣುಗಳ ಹೊಳಪು
ಇಂದಿಗೂ ಮರೆತಿಲ್ಲ...
ನೀನು... ನಾ ಕಂಡ
ಅತ್ಯಂತ ಸೊಗಾಸಾದ ವ್ಯಕ್ತಿಗಳಲ್ಲಿ ಒಬ್ಬ...
ನನ್ನ ನೆಚ್ಚಿನ ಗೆಳೆಯ!
ಆದರೂ...ನಿನ್ನ ಪ್ರೀತಿಯ ಪ್ರಸ್ತಾಪವನ್ನು ಅದೇಕೋ ಒಪ್ಪಲಿಲ್ಲ...
ಏಕೆಂಬುದು ನನಗೂ ಗೊತ್ತಿಲ್ಲ...
ಅಂದು ನಿನ್ನ ಬಗ್ಗೆ ಆ ರೀತಿ ಯೋಚನೆಗಳಿರಲಿಲ್ಲ...ಅಷ್ಟೆ!!
ಅಂದು ನಾ ಒಪ್ಪದಾಗ ನಿನ್ನಲ್ಲಾದ ಬೇಸರ-ನೋವಿನ ಬಗ್ಗೆ ಅರಿವಿತ್ತು...
ಆದರೂ ನನ್ನ ಮನದಲ್ಲಿ ಪ್ರೀತಿ ಹುಟ್ಟಲಿಲ್ಲ...

ಕಾಲ ಕಳೆದಂತೆ ನೀ ನಡೆದೆ...ಹೊಸ ಹಾದಿ ತುಳಿದೆ...
ಹೊಸ ಪ್ರೀತಿಯನ್ನೂ ಕಂಡುಕಂಡೆ...
ಈಗ ....ವರ್ಷಗಳು ಕಳೆದ ಮೇಲೆ
ನಿನ್ನ ಬಗ್ಗೆ ಹೊಸ ಭಾವ...
ಹೊಸ ಹುರುಪು-ಹೊಸ ಒಲವು...ಅದೇಕೋ ಕಾಣೆ...
ನೆಚ್ಚಿನ ಗೆಳೆಯನಂತೆ ನೀ ಇಂದಿಗೂ ನನ್ನೊಡನಿರುವೆ...
ನೀನೀಗ ನಿನ್ನ ಸಂಗಾತಿಯೊಂದಿಗೆ ಸಂತೋಷದಿಂದಿರುವೆಯಂಬುದು ತಿಳಿದಿದೆ...
ಆದರೂ ನನಗದೇನೋ ಉತ್ಕಟ ಪ್ರೀತಿ!
ಈ ಹೊಸ ಭಾವನೆಗಳನ್ನು ನನ್ನೊಳಗೆ ಅದುಮಿಡಬೇಕಾದ ಪರಿಸ್ಥಿತಿ...
ಅಂದು ನಿನ್ನ ತಿರಸ್ಕರಿಸಿದ್ದು ತಪ್ಪೇನೋ...
ಈಗ! ಇಂದು...ನಾ ನಿನ್ನನ್ನು ಪ್ರೀತಿಸುತ್ತೇನೆ ಗೆಳೆಯ...
ನಿನಗರಿವಿಲ್ಲದಿರಬಹುದು...ನಿನ್ನರಿವಿಗೆ ಮುಂದೆಂದೂ ಬಾರದಿರಬಹುದು....
ನಾನು ನಿನ್ನನ್ನು ಮನಸಾರೆ ಪ್ರೀತಿಸುತ್ತಿರುವೆ...
ನನ್ನ ಮನದೊಳಗಿನ ಪ್ರತಿ ಲಾವಾ ಹನಿಯ ಮೇಲಾಣೆ!

--ಶ್ರೀ
(ಜೂನ್ ೨೫ ೨೦೧೦)

ಏಕೆ ಬದಲಾದೆ ಗೆಳತಿ?

2010-06-24T22:55:00.001-07:00

ಕ್ಲಾಸಿನ ಮೊದಲ ಬೆಂಚಿನ ಕೊನೆಯಲ್ಲಿ
ಪಾಠವನ್ನು ಎವೆಯಿಕ್ಕದೇ ಕೇಳಿಸಿಕೊಳ್ಳುತ್ತಿದ್ದ ನಿನ್ನನಲ್ಲವೇ ಮೆಚ್ಚಿದ್ದು?
ಹತ್ತು-ಹಲವಾರು ಹುಡುಗಿಯರ ಗುಂಪಿನಲ್ಲಿ
ನಿನ್ನಿರುವು ಯಾರಿಗೂ ಅರಿವಿಗೇ ಬಾರದೇ ಇದ್ದದ್ದಕ್ಕಲ್ಲವೇ ಮೆಚ್ಚಿದ್ದು?
ನಿನ್ನೊಳಗಿನ ಜಗವನ್ನು ಬಿಟ್ಟು ಹೊರಗೆ ಬಾರದೆ ಇದ್ದ ಅಂತರ್ಮುಖಿಯನ್ನಲ್ಲವೇ ನಾ ಮೆಚ್ಚಿದ್ದು?
ನನ್ನ ಮನದ ಮಾತು ನಿನಗೆ ತಲಪುವ ಮುನ್ನ ನಿನ್ನೊಳಗಿನ ಭಾವ ಹೇಗಿತ್ತೋ ಅರಿಯೆ...
ನನ್ನ ಪ್ರೇಮದ ಒಕ್ಕಣೆಗೂ ಮೌನವಾಗೆ ಸಮ್ಮತಿಸಿದ್ದೆಯಲ್ಲವೇ?
ಅಂದಿನಿಂದಲೇ ಶುರುವಾಯ್ತು ಹೊಸ ಅಧ್ಯಾಯ...
ನೀ ಬದಲಾದೆ ಗೆಳತಿ...
ಸಮ್ಮೋಹನಗಳಿಸಿದ ಆ ಮೌನ ಮಾಯವಾಯ್ತಲ್ಲ...
ಈಗ, ನನ್ನೊಡನಿದ್ದಾಗ ನಿನ್ನಧರಕೆ ಬಿಡುವಿಲ್ಲ!
ನಾನಿಲ್ಲದಾಗಲೂ ನಿನ್ನ ಈ ತುಂಟ ತುಟಿಗಳಿಗೆ ಅದೇನೋ ಚಡಪಡಿಕೆ!
ಏಕೆ ಬದಲಾದೆ ಗೆಳತಿ?
ನಿನ್ನೀ ನಿರಂತರ ಮಾತುಗಳಿಂದ ನನಗೆ ಅಮೃತವನೇ ಉಣಿಸಿದರೂ
ಅಂದು ನನ್ನ ಸೆಳೆದ ಮೌನ ನನಗೆ ಗುಲಗಂಜಿಯಷ್ಟು ಹೆಚ್ಚು ಮೆಚ್ಚು...!

--ಶ್ರೀ

(ಜೂನ್ ೨೫, ೨೦೧೦)

ಹುಡುಗಾಟ!

2010-06-16T10:05:00.000-07:00

ಮನೆಯೊಳಗೇ ಇರುವ
ಸೋಫಾದಲ್ಲಿ ಕುಳಿತು
ಟಿವಿ ಪರದೆಯಲ್ಲಿ ಬರುವ
ಆಟಗಾರನ ಕಾಯ ಪ್ರವೇಶಿಸಿ,
ಅವ ಗೆದ್ದಾಗ,
ಪ್ರಪಂಚವೇ ತಾ ಗೆದ್ದು ಬಂದಂತೆ
ಭ್ರಮಿಸಿ-ಸಂಭ್ರಮಿಸುವುದೇ ಹುಡುಗಾಟ!

--ಶ್ರೀ
(೧೬-ಜೂನ್-೨೦೧೦)

ಮರೆಯಲಾದೀತೆ ನಿನ್ನ...ಬೆರೆತೆವಂದೇ ನಾವು...

2010-04-25T01:19:00.000-07:00

ಮರೆಯಲಾದೀತೆ ನಿನ್ನ...
ಬೆರೆತೆವಂದೇ ನಾವು...ಮರೆಯಲಾದೀತೆ....??? || ಪ ||

ಮುಂಗಾರಿನಂತೆ ಬಂದೆ
ತಂಗಾಳಿ-ಒಲವಧಾರೆ
ಸತತ ನೀ ಉಣಿಸಿದೆ... || ೧ ||

ನಿನ್ನ ತಂಪು-ಕಂಪು ಸೋಕಿ
ನನ್ನ ನಾ ಮರೆತೆನೋ...
ಉನ್ಮಾದದ ಮೋಕ್ಷ ಫಲಿಸಿತೆನಗೆ...|| ೨ ||

ಒಲವೆಲ್ಲೆಡೆ ಸೂಸಿ
ನಮ್ಮ ಬಂಧದಾ ಕಂಪು
ಭುವಿಯ ದಾಟಿತ್ತು || ೩ ||

ಒಲವೆಂಬ ಕಂಪದೇಕೋ
ಹೊಗೆಯಂತೆ ಒಗ್ಗೂಡಿ
ನೇಸರನ(ವಿಧಿಯ) ಕಾಡಿತ್ತು... || ೪ ||

ಉರಿಯಲೇ ಬರೆದ ವಿಧಿ
ವಿರಹದಾ ದೀರ್ಘಪುಟ,
ಕೊನೆಯಿಲ್ಲದಂತೆ ಬರೆದವನವನು... || ೫ ||

ವಿಧಿಯಾಜ್ಞೆಯಂತೆ ಹೊರಟೆ
ನೀ ನನ್ನನು ಬಿಟ್ಟು
ಎಂದಿನಂತೆ ಅಂದು ಕೂಡ ಮಂದಹಾಸ || ೬ ||

ಮುಖವಾಡದ ಹಿಂದೆ
ಕುಣಿದಿದ್ದ ವಿರಹಾಗ್ನಿ
ನನಗೆ ಕಂಡಿತ್ತು-ನನ್ನ ಸುಡುತಿತ್ತು || ೭ ||

ಅಂದು ಹೋದವ ನೀನು
ಇಂದಿಗೂ ಬರಲಿಲ್ಲ
ನಿನ್ನ ಕಾಣುವ ತವಕ ತಣಿದಿಲ್ಲವೋ || ೮ ||

ಎಂದು ಬರುವೆಯೋ ನೀನು
ಒಂದುಗೂಡುವ ಆಸೆ
ಇಂದಿಗೂ ನನ್ನಲಿ ಉರಿಯುತಿಹುದು || ೯ ||

ನಿನ್ನ ಕಂಡದೆಷ್ಟು ವರುಷ
ಉರುಳಿತೋ ನೆನಪಿಲ್ಲ
ನನ್ನಲಿರುವ ಒಲವು ಕುಂದಲಿಲ್ಲ... || ೧೦ ||

ನನ್ನ ಪ್ರತಿ ನಾಡಿಯಲ್ಲಿ
ನಿನ್ನದೇ ಮಿಡಿತವೋ...
ಬದುಕಿರುವೆ ಇಂದು ನಾನು ನಿನ್ನ ನೆನಪಲಿ.... || ೧೧ ||

ಮರೆಯಲಾದೀತೆ ನಿನ್ನ
ಬೆರೆತವಂದೇ ನಾವು...
ನನ್ನಿರುವು ಇಂದಿಗೂ ನಿನ್ನಿರುವಲಿ... || ೧೨ ||

ಚಿತ್ರಕೃಪೆ: http://www.iskconkharghar.com/

ಮರಮೇಧ

2010-04-05T20:24:00.000-07:00

ಹೊಸ ಏರ್‍ಪೋರ್ಟ್ಗೆಂದು
ಹೊಸದಾಗಿ ಹಾಸಿದ
ಅಗಲವಾದ ರಸ್ತೆಯಲ್ಲಿ
ಜುಮ್ಮನೆ
ಹೊಸ ಕಾರಿನಲ್ಲಿ
ತೊಂಭತ್ತರ ಸ್ಪೀಡಿನಲ್ಲಿ
ಹೋಗುವುದು
ಅನಂತ ಮರಗಳ
ಶವಗಳ ಮೇಲಲ್ಲವೇ?

--ಶ್ರೀ

ಮರುಕತೆ

2010-03-09T05:42:00.000-08:00

ಮಹಿಳಾ ದಿನಕ್ಕೊಂದು...ಕೊಂಚ ತಡವಾಗಿ...
-------------
ಗಿಜಿಗುಡುವ
ರಸ್ತೆಯ ಬದಿಯಲ್ಲಿ
ಕಗ್ಗತ್ತಲಿನ ಜಾಗದಲಿ ನಿಂತು
ಹಾದಿಯಲಿ ಹೋಗುವವರತ್ತ
ತುಟಿ ಕಚ್ಚಿ
ಮಾದಕತೆಯಿಂದ
ಸೆಳೆಯುವುದು
ಮಾರ-ಕತೆಗಲ್ಲವೇ?
ಈ ಮಾದಕತೆ ಮತ್ತು ಮಾರಕತೆಯ ಹಿಂದೆ
ಮರುಕತೆ+ಯೊಂದಿದೆ, ಅಲ್ಲವೇ?

--ಶ್ರೀ
ಮರುಕತೆ -- ಮರುಕದಿಂದ ಕೂಡಿದ ಕತೆ/ಅಳಲಿನ ಕತೆ...

ಮನೋಬಲ

2010-03-05T01:01:00.000-08:00

ಜಟ್ಟಿಯಾದರೇನು
ಗಟ್ಟಿ ಮನವಿಲ್ಲದಿರೆ
ಪುಟ್ಟನೂ ಕೂಡ
ಕುಟ್ಟಿ-ಮೆಟ್ಟಿ ನಿಲಬಹುದು!

--ಶ್ರೀ

ಗುಳಿಯೆಂಬ ಸುಳಿ...

2010-02-20T09:24:00.000-08:00

ನಲ್ಲೆ,

ನಿನ್ನ ಕೆನ್ನೆಯ ಮೇಲೆ ಮೂಡುವ ಗುಳಿ, ನೀರಿನಲಿ ಮೂಡುವ ಗುಳ್ಳೆಗಳಂತೆ ಥಟ್ಟನೆ ಮಾಯವಾಗುವುದೇಕೆ?
ನೀರಿನ ಸುಳಿಯಲಿ ಈಜುವುದೆಷ್ಟು ತೊಡಕೋ, ನಿನ್ನ ಕೆನ್ನೆಯ ಗುಳಿಯಲಿ ಈಜುವುದಷ್ಟೇ ಸೊಗಸು...
ನಿನ್ನ ಕೆನ್ನೆಯ ಮೇಲೆ ಮೂಡುವ ಗುಳಿ, ಇಣುಕಿ-ಕೆಣಕಿ ಮಾಯಾಜಿಂಕೆಯಂತೆ ಮಾಯವಾಗುವುದೇಕೆ?
ಗುಳಿಯ ಸದಾ ಹಿಡಿದಿಡುವುದರಲ್ಲಿ ನಾ ವಿಫಲನಾಗಿರಬಹುದು; ನನ್ನೊಲವೇ ಗುಳಿಗೆ ಕಾರಣವೆಂದು ತಿಳಿದಿದೆ...
ನಿನ್ನ ಗುಳಿ-ನನ್ನೊಲವಿನ ಬುಗ್ಗೆ, ಚಿಮ್ಮಿ ಮಾಯವಾಗುವುದೂ ಕಣ್ಣಿಗೆ ಹಬ್ಬ...
ಇರಲಿ...ಗುಳಿಗೆ ನಾ ಗಾಳ ಹಾಕುವುದಿರಲಿ...ಗುಳಿಯ ಗಾಳದಲಿ ನಾ ಸಿಲುಕಿದ್ದಕ್ಕಲ್ಲವೇ ನೀ ನನಗೆ ಸಿಕ್ಕಿದ್ದು :)

--ಶ್ರೀ
೧೯ ಫೆಬ್ರವರಿ ೨೦೧೦

’ಮಿಲೇ ಸುರ್’ ಹಾಡಿಗೊಂದು ಹೊಸ ಸ್ವರ-ಹೊಸ ನುಡಿ...

2010-02-07T09:24:00.000-08:00

೧೯೮೮ರಲ್ಲಿ ’ಮಿಲೇ ಸುರ್ ಮೇರಾ ತುಮ್ಹಾರ’ ಎಂಬ ಹಾಡು ಟಿ.ವಿಯಲ್ಲಿ ಬರುತ್ತಿದ್ದಂತೆ ನಾವುಗಳೆಲ್ಲಾ ಗೋಡೆಗೆ ಅಂಟುವ ಹಲ್ಲಿಗಳಂತೆ ಟಿ.ವಿಗೆ ಅಂಟಿಕೊಂಡು ಬಿಡುತ್ತಿದ್ದೆವು.
ಹಾಡಿನಲ್ಲಿ ಕನ್ನಡವನ್ನು ಕೇಳಿದಾಗಲಂತೂ ಮೈ-ಪುಳುಕ. ಚಿಕ್ಕ ಮಕ್ಕಳಾಗಿದ್ದ ನಮಗೆ, ಭಾರತದ ಸಂಸ್ಕೃತಿಯ ಕನ್ನಡಿಯಂತಿದ್ದ ಈ ಹಾಡು ಕಣ್ಣಿಗೆ ಹಬ್ಬವೇ ಸರಿ.

ನೀವೆಲ್ಲ ಕೇಳಿರಬಹುದಾದ, ಈ ಹಾಡನ್ನು ಮತ್ತೊಮ್ಮೆ ಕೇಳಿಬಿಡಿ

ಇತ್ತೀಚಿಗೆ ಝೂಮ್ ಚಾನಲ್‍ನವರು, ಈ ಪ್ರಸಿದ್ಧ ಹಾಡನ್ನು ಹೊಸ ರೀತಿಯಲ್ಲಿ, ಹೊಸ ಧಾಟಿಯಲ್ಲಿ ಮಾಡಿದ್ದಾರೆ. ಕೆಳಗಿನ ಎರಡು ಕಂತುಗಳಲ್ಲಿ ಕೇಳಿಬಿಡಿ:
ಫಿರ್ ಮಿಲೇ ಸುರ್‍ನ ಮೊದಲ ಕಂತು ಇಲ್ಲಿದೆ:

ಎರಡನೇ ಕಂತು ಇಲ್ಲಿದೆ:

ಮಿಲೇ ಸುರ್ ಮೇರಾ ತುಮ್ಹಾರ ಹೊತ್ತಿಸಿದ ಕಿಡಿ-ದೇಶ ಭಕ್ತಿ, ಈ ಹಾಡಿನಲ್ಲಿ ನನಗೆ ಕಾಣಲಿಲ್ಲ. ಭಾರತದ ಸಂಸ್ಕೃತಿಯನ್ನು ಬಿಂಬಿಸುವುದಕ್ಕಿಂತ, ಚಲನಚಿತ್ರ ತಾರೆಯರಿಂದಲೇ ತುಂಬಿಸಿರುವ ಈ ಹಾಡನ್ನು ನೋಡಿದಾಗ, ಮಿಲೇ ಸುರ್ ಮೇರಾ ತುಮ್ಹಾರ ಹಾಡಿನ ಅಪಮಾನದಂತೇ ಕಾಣುತ್ತದೆ. ಭಾರತ ಸಂಸ್ಕೃತಿಯನ್ನು ಬಿಂಬಿಸಲು ಹೊರಟಿಲ್ಲವಾದಲ್ಲಿ, ನಿರ್ದೇಶಕರು ಏನನ್ನು ಹೇಳಲು ಪ್ರಯತ್ನಿಸುತ್ತಿದ್ದಾರೆ ಎಂಬುದೂ ತಿಳಿಯಲಿಲ್ಲ. ಇಡೀ ಹಾಡಿನಲ್ಲಿ ಗ್ಲಾಮರ್ ತುಂಬಿಸಿ, ಹಿಂದೆ ಪಡೆದ ಯಶಸ್ಸು ಮರುಕಳಿಸಬಹುದು ಎಂಬ ಎಣಿಕೆ ನಿರ್ದೇಶಕರಿಗೆ ಹೇಗಿತ್ತೋ ಕಾಣೆ. ಮುಂಚಿನ ಹಾಡಲ್ಲೂ ಚಿತ್ರತಾರೆಯರಿದ್ದರೂ, ಅದು ಭಾರತದ ಸಂಸ್ಕೃತಿಯನ್ನು ಎತ್ತಿ ಹಿಡಿಯುವಲ್ಲಿ ಯಶಸ್ವಿಯಾಗಿತ್ತು ಎಂದು ನನ್ನ ಅನಿಸಿಕೆ. ಈ ಹಾಡಿನ ಹೊಸ ಪ್ರಯತ್ನವೇಕೋ ನನಗೆ ದೊಡ್ಡ ವೈಫಲ್ಯದಂತೆ ತೋರುತ್ತದೆ...

ಕನ್ನಡದ ಭಾಗದ ಬಗ್ಗೆ ಒಂದಿಷ್ಟು:
ಪ್ರಕಾಶ್ ಪಡುಕೋಣೆ ಹಾಡುವಾಗ ನನಗೆ ನಲಿವು ತಂದರೆ, ಕನ್ನಡ ನಾಡಲ್ಲಿ ಹುಟ್ಟದ ಕವಿತಾ ಕೃಷ್ಣಮೂರ್ತಿ ಹಾಡಿದ್ದು ಪೆಚ್ಚನ್ನು ತಂದಿತು. ಚೆನ್ನೈನಲ್ಲಿ ಹುಟ್ಟಿದ ಎಲ್. ಸುಬ್ರಮಣಿಯಂ, ಬೆಂಗಳೂರಿನಲ್ಲಿ ನೆಲಸಿರುವವರು ಎಂಬ ವಿಷಯಕ್ಕೆ ಸಮಾಧಾನ ಪಟ್ಟಿಕೊಳ್ಳಬೇಕೇನೋ. ಹಾಡಿನಲ್ಲಿ ಬರುವ ಮಿಕ್ಕವರೆಲ್ಲ ಯಾರು ಎಂಬುದೇ ತಿಳಿಯಲಿಲ್ಲ. ಕರ್ನಾಟಕದಲ್ಲಿ ಹುಟ್ಟಿದ ಮೂವರು ಬಾಲಿವುಡ್‍ನ ಪ್ರಸಿದ್ಧ ನಟಿಯರು ಯಾರೂ ಕನ್ನಡದ ಭಾಗವನ್ನು ಹಾಡದಿದ್ದುದು ನನಗೆ ಅಚ್ಚರಿಯೇನು ತರಲಿಲ್ಲ. ಏಕೆಂದರೆ ಇವರೆಲ್ಲ ತಾವು ಕನ್ನಡಿಗರೂ ಎಂದು ಇದುವರೆಗೂ ಹೆಮ್ಮೆಯಿಂದ ಹೇಳಿಕೊಂಡಿದ್ದನ್ನೂ ಕಂಡೇ ಇಲ್ಲ. ದೀಪಿಕಾ ಪಡುಕೋಣೆಯಂತೂ, ಮಾಧ್ಯಮದವರೆಲ್ಲ ತನ್ನ ಊರಿನ ಹೆಸರನ್ನು ’ಪಡುಕೋಣ್’ ಎಂಬ ತಪ್ಪಾಗಿ ನುಡಿದರೂ ಇಂದಿನವರೆಗೂ ಸರಿಪಡಿಸದವಳು. ಇಂಥವರಿಂದ ಹೆಚ್ಚೇನು ಆಶಿಸಲಾಗುತ್ತದೆ, ಅಲ್ಲವೇ?

ಇನ್ನು ಸಾಹಿತ್ಯದ ಬಗ್ಗೆ ನೋಡುವ...ನಾನು ಮತ್ತೊಮ್ಮೆ ಈ ಹಾಡುಗಳನ್ನು ಕೇಳಿದರೆ, ಮೊದಲ ಬಾರಿಯ ಹಾಡಿನಲ್ಲಿರುವ, "ನನ್ನ ದನಿಗೆ ನಿನ್ನ ದನಿಯ, ಸೇರಿದಂತೆ ನಮ್ಮ ಧ್ವನಿಯ" ಎಂಬ ಸಾಹಿತ್ಯವೇನು ಹಿಡಿಸುವುದಿಲ್ಲ. ಅದೇಕೋ ಅರ್ಧಕ್ಕೆ ನಿಂತಂತೆ ಅನಿಸುತ್ತದೆ. ಎರಡನೆಯ ಪ್ರಯತ್ನದಲ್ಲಿ ಕವಿತಾ ಕೃಷ್ಣಮೂರ್ತಿ ಮತ್ತು ಸಂಗಡಿಗರು ಹಾಡುವ, "ಸ್ವರ ಸೇರಿದೆ ನಮ್ಮ ನಿಮ್ಮದೂ...ಆ ಸ್ವರವಾಗಲಿ ನಮ್ಮೆಲ್ಲರದೂ", ಮೊದಲಿಗಿಂತ ಪರವಾಗಿಲ್ಲ ಎನಿಸಿದರೂ, ಹೆಚ್ಚಾಗಿ ಮೆಚ್ಚೆನಿಸಲಿಲ್ಲ. ಹಾಡಿನ ಮೂಲ ಭಾವವನ್ನು ಹಿಡಿಯದೇ, ಪ್ರತಿ ಪದವನ್ನು ಅನುವಾದ ಮಾಡಿದಲ್ಲಿ ಈ ರೀತಿ ಆಗಬಹುದು ಎಂಬುದು ನನ್ನ ಅನಿಸಿಕೆ.

ಪ್ರತಿ-ಪದ ಅನುವಾದಿಸದೆ ಐಕ್ಯರಾಗವನ್ನು ಹೊಮ್ಮಿಸುವಾಸೆಯಿಂದ ಯೋಚಿಸುತ್ತಿದ್ದಾಗ ಹೊಳೆದ ಕನ್ನಡದ ಸಾಲುಗಳಿವು:
------
ಕೂಡಲಿ ಸ್ವರವು ಸ್ವರವು ಇಂದು, ಮೂಡಲಿ ಹೊಸ-ರಾಗವೊಂದು

ಸ್ವರದ ನದಿಗಳು ಎಲ್ಲೆಡೆಯಿಂದ ಹರಿದು ಕಡಲನು ಸೇರಲಿ..
ಮೇಘದ(ಮೋಡದ) ಸ್ವರೂಪ ಪಡೆದು, ಸ್ವರಗಂಗೆ ಭುವಿಗಿಳಿಯಲಿ...

ಓ...ಕೂಡಲಿ ಸ್ವರವು ಸ್ವರವು ಇಂದು, ಮೂಡಲಿ ಹೊಸ-ರಾಗವೊಂದು...
------

ಹೇಗಿದೆ? ನಿಮ್ಮ ಅನಿಸಿಕೆ ಹೇಳಿ...

--ಶ್ರೀ

ಬಯ್ಗುಳ ತಿನ್ನುವುದು ಯಾರಿಗೆ ಮೆಚ್ಚು?

2009-12-01T19:57:00.000-08:00

ಚೋಟು ಹುಡುಗನ ಕೇಳಿ ಬಯ್ಗುಳದ ಮೋಜನ್ನು!
ತುಂಟಾಟವಾಡುವ ತಂಟೆಕೋರನ ಕೇಳಿ...
ತಡೆಯಬಲ್ಲಿರೇ ನೀವು ಪುಟ್ಟ ಪೋರನ ದಾಳಿ?
ನೂರಾರು ಬಾರಿ ಬಯ್ಗಳವ ತಿಂದರೂ
ಕೆಣಕುವನು ನಿಮ್ಮನ್ನು ಮತ್ತೊಂದು ಬಾರಿ, ಮಗದೊಂದು ಬಾರಿ!

ಕೊರೆತ...

2009-11-24T07:57:00.001-08:00

ಕಡಲ ಕೊರೆತಕೇನೋ
ಇಡಬಹುದು ಬಂಡೆಗಳ...
ನಿನ್ನ ಮೌನದಿಂದ
ಹೃದಯದಲುಂಟಾಗುವ ಕೊರೆತಕೆ
ಏನು ಮಾಡಲಿ, ಹೇಳೇ ಸಖೀ???

--ಶ್ರೀ

ನುಡಿ ಸಿಡಿಲು

2009-11-14T03:14:00.000-08:00

ಕಟಕಿಯಾಡಿದ
ಹುಡುಗನ
ನಡುಬೀದಿಯಲಿ
ಹಿಡಿಶಾಪ ಹಾಕಿದರೂ, ಅವ
ನುಡಿದ ಮಾತುಗಳು
ಗುಂಡಿಗೆಯಲಿ
ಗುಡುಗಿತ್ತು...

--ಶ್ರೀ
(೧೪ - ನವಂಬರ್ - ೨೦೦೯ )

ಒಡೆದ ಕನ್ನಡಿ

2009-10-13T07:15:00.000-07:00

ತುಡಿಯುತಿಹುದು ಮನ, ಒಡೆದ ಕನ್ನಡಿಯ ಸುತ್ತ
ಪ್ರತಿ ಚೂರಿನೊಳಗೆ ಕಹಿ ನೆನಪ ಹುತ್ತ

ಖುಷಿಯಲೇ ಮುಳುಗಿದ್ದ ನಮ್ಮಿಬ್ಬರಾ ಮಧ್ಯೆ
ವಿಷವೆಂದು ಮೊಳೆಯಿತೋ ತಿಳಿಯದಾಗಿದೆ
ನಲಿಯುತಾ ಎರಚಿದಾ ಓಕುಳಿಯ ಜೊತೆಗೆ
ಕೊಳಕೆಂದು ಹಾರಿತೋ ನಾನಿಂದು ಅರಿಯೆ

ಮುತ್ತೆಂದು ಇಟ್ಟದ್ದು ಮುಳ್ಳಾಯ್ತೇ ನಿನಗೆ?
ಇತ್ತೆ ನಾ ಮುತ್ತುಗಳ ಕಹಿ ಮನವನರಿಯದೆ
ಇರಿದ ಮುತ್ತನು ಸಹಿಸಿ ಮೌನಿ ಏಕಾದೆ?
ನಲಿವಿನಲಿ ನಾ ನಿನಗೆ ಮುತ್ತಿಡುತ ಹೋದೆ

ನಮ್ಮಿಬ್ಬರಾ ಬಂಧ ಬಲು ಚೆಂದ ಎಂಬ ಭ್ರಮೆ
ಕನ್ನಡಿಯ ಹಿಡಿದು ಕುರುಡನಾಗಿದ್ದೆ
ಹುಡುಗಾಟದಿ ಅಂದು ದೂಡಿದುದು ತಪ್ಪೇನೋ
ಇಂದೆನ್ನ ಮುಂದಿದೆ ಒಡೆದ ಗಾಜಿನ ಮೂಟೆ

--ಶ್ರೀ

ನಮ್ ಮನೇಲಿ ನವರಾತ್ರಿ ಬೊಂಬೆ ಕೂಡಿಸಿರೋದ್ ಹೀಗೆ!

2009-09-24T10:45:00.000-07:00

ನಮ್‍ಹಳ್ಳಿ!

ಬಟ್ಟೆ ವ್ಯಾಪಾರಿ

ರೈಲಿನಲ್ಲಿ "ವಿಶ್ವ ಪರ್ಯಟನೆ"

ಪುಟಾಣಿ ರಾಷ್ಟ್ರೀಯ ಉದ್ಯಾನವನ

ಸಮುದ್ರ ಮಂಥನ

ಬೇಡತಿಯ ಮುತ್ತು

2009-09-04T01:10:00.000-07:00

ಹಂಸಾನಂದಿಯವರು ಚಾಣಾಕ್ಯನ ನೀತಿಯನ್ನು ಅನುವಾದಿಸಿ, ’ಬೇಡತಿಗೆ ಬೇಡದ ಮುತ್ತು’ಎಂಬ ತಲೆ ಬರಹ ನೀಡಿದರು.
ಈ ತಲೆಬರಹದಿಂದ ಸ್ಫೂರ್ತಿಗೊಂಡ ನಾನು ಕೆಳಗಿನ ನಾಲ್ಕು ಸಾಲನ್ನು ಬರೆದಿರುವೆ...

ಬೇಡತಿಗೆ ಬೇಡ ಕೊರಳ ಹಾರದ ಮುತ್ತು
ಬೇಡುತಿಹಳು ಬೇಡನ ಮಾರನ ಮತ್ತು,
ಉಡಿಯನು ತುಂಬಲು ಒಲವಿನ ಮುತ್ತು,
ಮಡಿಲಲಿ ಆಡುವ ಬೆಲೆ ನಿಲುಕದ ಮುತ್ತು!

--ಶ್ರೀ

ನಮ್ಮೂರ ಆಂಜನೇಯನಿಗೆ ಬೆಳ್ಳಿ ಕವಚ...

2009-08-27T07:54:00.001-07:00

ಮೂಲ ವಿಗ್ರಹ ಹೀಗಿದೆ:

ಹೊಸ ಕವಚ ಹಾಕಿದ ಮೇಲೆ:

ಅರಿಶಿನ ಲೇಪಿತ ಹನುಮಂತ:

ತಂಪಿನ ಕಂಪು

2009-08-14T11:11:00.000-07:00

ಹಂಸಾನಂದಿಯವರು ಮತ್ತೊಂದು ಉತ್ತಮ ಸುಭಾಷಿತವನ್ನು ಪರಿಚಯಿಸಿದರು.

ಸಂಸ್ಕೃತ ಮೂಲ:

ಚಂದನಂ ಶೀತಲಂ ಲೋಕೇ ಚಂದನಾದಪಿ ಚಂದ್ರಮಾಃ
ಚಂದ್ರ ಚಂದನಯೋರ್ಮಧ್ಯೇ ಶೀತಲಾ ಸಾಧು ಸಂಗತಿ:

ಅವರ ಅನುವಾದವನ್ನು ಬಳಸಿ ನನ್ನದೊಂದು ಭಾವನುವಾದ ಹೀಗಿದೆ:

ಚಂದನ ತೊಡುವುದು ಒಡಲಿಗೆ ತಂಪು
ಚಂದ್ರನ ಕಾಂತಿಯು ಅದಕೂ ಇಂಪು+
ಚಂದಿರ ಚಂದನ ಎರಡನು ಮೀರಿದೆ
ಸುಂದರ* ಜನಗಳ ಸಂಗದ ಪೆಂಪು!

--ಶ್ರೀ

+ಇಂಪು:
ಸೊಗಸು, ಅಂದ

*ಸುಂದರ:
೧೮. divine (ಗುಣವಾಚಕ) 1) ದೈವಿಕ, ಪವಿತ್ರವಾದ, ದೇವರಂಥ, ದಿವ್ಯ, ಅತಿಮಾನುಷ, ದೈವದತ್ತ 2) ಸರ್ವೋತ್ಕೃಷ್ಟ, ಅತಿ ಸುಂದರ, ಅತಿ ಶ್ರೇಷ್ಠ, ಅಲೌಕಿಕ ಸೌಂದರ್ಯವುಳ್ಳ
೧೭. comely (ಗುಣವಾಚಕ) 1) ಸೊಗಸಾದ, ಸುಂದರ, ಸ್ಫುರದ್ರೂಪಿಯಾದ 2) ಯೋಗ್ಯವಾದ, ಮನಸ್ಸಿಗೆ ಒಪ್ಪುವ, ರಮಣೀಯ, ಮನೋಹರ

ಕಂಪ್ಯೂಟರ್ ನೆಟ್‍ವರ್ಕಿಂಗ್ ಎಂದರೇನು? - ೧ - ಮನೆಯಲ್ಲಿರುವ ಸಾಧನಗಳ ಮೇಲ್ನೋಟ

2009-08-07T04:56:00.001-07:00

ಮೊನ್ನೆ ಸಂಪದ ಮಿತ್ರರೊಬ್ಬರು ಕರೆ ಮಾಡಿದಾಗ, ’ನನ್ನ ಕಂಪ್ಯೂಟರ್‍ನಲ್ಲಿ ಕೆಲವು ಕಡತಗಳಿವೆ, ಇದನ್ನು ನನ್ನ ಕಂಪ್ಯೂಟರ್‍ನಲ್ಲಿ ವೆಬ್ ಹೋಸ್ಟಿಂಗ್ ಮಾಡಿ, ಸಂಪದ.ನೆಟ್ ಮಾದರಿ ಗೆಳೆಯರ ಮನೆಗಳ ಕಂಪ್ಯೂಟರ್ ಪರದೆಗಳಲ್ಲಿ ಮೂಡಿಸಬಹುದಾ?’ ಎಂದು ಪ್ರಶ್ನೆ ಕೇಳಿದರು.
’ನೀವು ಅಂದುಕೊಂಡಷ್ಟು ಸುಲಭವಲ್ಲಾರೀ...ಪ್ರಪಂಚದಲ್ಲಿ ಕೋಟ್ಯಾಂತರ ಕಂಪ್ಯೂಟರ‍್ಗಳಿವೆ. ನೀವು ದಿನವೂ ಸಂಪದವನ್ನು ಓದುತ್ತಿದ್ದರೂ, ಸಂಪದದ ಪುಟಗಳನ್ನು ಓದುವಾಗ, ನಿಮಗೆ ತಿಳಿಯದೆ, ಹಲವಾರು ನೆಟ್‍ವರ್ಕಿಂಗ್ ತಂತ್ರಜ್ಞಾನಗಳನ್ನು ತೆರೆಮರೆಯಲ್ಲಿ ಬಳಸುತ್ತೀರ’ ಎಂದೆ, ಕೆಲವನ್ನು ಫೋನ್‍ನಲ್ಲೇ ವಿವರಿಸಿದೆ. ತಕ್ಷಣವೇ, ’ಹೌದೇ, ಗೊತ್ತೇ ಇರಲಿಲ್ಲ, ನೀವು ಏಕೆ ನೆಟ್‍ವರ್ಕಿಂಗ್ ಬಗ್ಗೆ ಸಂಪದದಲ್ಲಿ ಬರೆಯಬಾರದು?’ ಎಂದು ಕೇಳಿದರು. ಹೀಗಾಗಿ ಈ ಬರಹಮಾಲೆ!

ಮೊದಲೇ ಹೇಳಿ ಬಿಡ್ತೀನಿ, ನೆಟ್‍ವರ್ಕಿಂಗ್ ಅನ್ನೋದು ಸಮುದ್ರ, ನನಗೆ ತಿಳಿದಿರೊಷ್ಟನ್ನ, ಆದಷ್ಟು ಸುಲಭವಾಗಿ ನಿಮಗೆ ಮುಟ್ಟಿಸುವ ಪ್ರಯತ್ನ ಮಾಡ್ತಿದೀನಿ.
ಸರಿ! ಇಷ್ಟು ಪೀಠಿಕೆ ಸಾಕಲ್ವಾ?

ಮೊದಲನೆಯ ಕಂತಿನಲ್ಲಿ, ನಿಮ್ಮ ಮನೆಗಳಲ್ಲಿ ಸಂಪದ ಓದಲಿಕ್ಕೆ ಅಥವಾ ಇಂಟರ‍್ನೆಟ್ ಬಳಸುವುದಕ್ಕೆ ಏನೇನು ಸಾಧನಗಳಿವೆ ಎಂಬುದನ್ನು ಮೇಲ್ಮಟ್ಟದಲ್ಲಿ ತಿಳಿದುಕೊಳ್ಳುವ.

೧. ಕಂಪ್ಯೂಟರ್
೨. ಕಂಪ್ಯೂಟರ್ ಪಕ್ಕದಲ್ಲಿ ಒಂದು ಡಬ್ಬ (ಅಥವಾ ಮೋಡೆಮ್)
ಮೊಡೆಮ್ ಏನು ಮಾಡತ್ತೆ ಅನ್ನೋದು ಸದ್ಯಕ್ಕೆ ಬೇಡ - ಕಂಪ್ಯೂಟರ್ ಪಕ್ಕದ ಒಂದು ಜಾಣ ಡಬ್ಬ ಅಂತ ತಿಳ್ಕೊಳ್ಳಿ ಸಾಕು.
ಮುಂದಿನ ಕಂತುಗಳಲ್ಲಿ ಇದರ ಬಗ್ಗೆ ಬರೀತಿನಿ.
ಕೆಲವು ವರ್ಷಗಳ ಹಿಂದೆ ಐ.ಎಸ್.ಡಿ.ಎನ್ ಮೋಡೆಮ್ ಗಳು ಬಳಕೆಯಲ್ಲಿತ್ತು. ಕಂಪ್ಯೂಟರ‍್ಗೆ ಸೇರಿದ ಹಾಗಿರುವ ಇಂಟರ್ನಲ್ ಮೋಡೆಮ್ ಕೂಡ ಬಳಕೆಯಲ್ಲಿತ್ತು.

ಈಗ ಎ.ಡಿ.ಎಸ್.ಎಲ್ ಮೋಡೆಮ್ ಚಾಲ್ತಿಯಲ್ಲಿದೆ.
(ನೀವು ಇಂಟರ್ನಲ್ ಐ.ಎಸ್.ಡಿ.ಎನ್ ಮೋಡೆಮ್ ಬಳಸುತ್ತಿದ್ದರೆ, ಕಂಪ್ಯೂಟರ್ ಪಕ್ಕ ಡಬ್ಬ ಹುಡುಕಬೇಡಿ Smiling )
ಐ.ಎಸ್.ಡಿ.ಎನ್/ಎ.ಡಿ.ಎಸ್.ಎಲ್ ಈ ರೀತಿಯ ಅಕ್ಷರಗುಛ್ಛ ಏನು ಎಂಬುದೂ ಬೇಡ. ಮುಂದಿನ ಕಂತುಗಳಲ್ಲಿ ಹೇಳ್ತೀನಿ.

೩. ಸ್ಪ್ಲಿಟ್ಟರ್ - ಪುಟಾಣಿ ಡಬ್ಬ. ಈ ಡಬ್ಬ, ಕೆಲವರ ಮನೆಯಲ್ಲಿರದಿರಲೂಬಹುದು.
ಸ್ಪ್ಲಿಟ್ ಅಂದರೆ ಒಡೆಯುವುದು/ಬೇರ್ಪಡಿಸು ಎಂಬ ಅರ್ಥ ಅಲ್ಲವೇ? ಈ ಪುಟಾಣಿ ಸ್ಪ್ಲಿಟ್ಟರ್‍ನ ಕೆಲಸ, ಧ್ವನಿ ಮತ್ತು ಕಂಪ್ಯೂಟರ್‍ಗೆ ಬೇಕಾದ ಮಾಹಿತಿ ಇವೆರಡನ್ನೂ ಬೇರ್ಪಡಿಸುವುದು.

ಕಂಪ್ಯೂಟರ್ ಮತ್ತು ಜಾಣ ಡಬ್ಬ, ಮೋಡೆಮ್ ಇವೆರಡನ್ನು ಒಂದು ವೈರ್ ಬಳಸಿ ಸೇರಿಸಿರುತ್ತಾರೆ.
ಐ.ಎಸ್.ಡಿ.ಎನ್ ಮೋಡೆಮ್‍ಗಳಿಗೆ ಟೆಲಿಫೋನ್ ವೈರ್ ಬಳಸುತ್ತಾರೆ.

ಎ.ಡಿ.ಎಸ್.ಎಲ್ ಮೋಡೆಮ್‍ಗಳಿಗೆ ಟೆಲಿಫೋನ್ ವೈರ‍್ಗಿಂತ ಸ್ವಲ್ಪ ದಪ್ಪನಾದ ವೈರ್ ಬಳಸುತ್ತಾರೆ.
ಈ ದಪ್ಪ ವೈರ್ ತಂತ್ರಜ್ಞಾನ ಹೊಸದೇನಲ್ಲವಾದರೂ, ಮನೆಯಿಂದ ಇಂಟರ‍್ನೆಟ್ ಬಳಕೆ ಮಾಡುವುದಕ್ಕೆ ಕೊಂಚ ಹೊಸತು.
ಇದನ್ನು ಈಥರ‍್ನೆಟ್ ವೈರ್ ಎಂದು ಕರೆಯುತ್ತಾರೆ. ಹೊರ ನೋಟಕ್ಕೆ ಒಂದೇ ವೈರ‍್ನಂತೆ ಕಂಡರೂ, ತುದಿಗಳಲ್ಲಿ ಗಮನಿಸಿ ನೋಡಿದಾಗ ಎಂಟು ಸಣ್ಣ ವೈರ‍್ನಿಂದ ಮಾಡಿರುವುದು ತಿಳಿದು ಬರುತ್ತದೆ.
ಸಾಮಾನ್ಯವಾಗಿ ದಪ್ಪಗಿರೋವ್ರಿಗೆ ಶಕ್ತಿ ಜಾಸ್ತಿ ಅನ್ನೋ ನಂಬಿಕೆ ಇದೆ ಅಲ್ವಾ? ಹಾಗೆ, ಈ ದಪ್ಪ ವೈರ್ ಕೂಡ ಹೆಚ್ಚು ಮಾಹಿತಿ ರವಾನಿಸುವ ಶಕ್ತಿ ಹೊಂದಿರುತ್ತದೆ.

ನಿಮ್ಮ ಬಳಿ ವೈರ್‍ಲೆಸ್ ಎ.ಡಿ.ಎಸ್.ಎಲ್ ಮೋಡೆಮ್‍ ಇದ್ದಲ್ಲಿ, ನಿಮ್ಮ ಕಂಪ್ಯೂಟರ್ ಮತ್ತು ಮೋಡೆಮ್ ಮಧ್ಯೆ ಯಾವುದೇ ವೈರ್ ಇರುವುದಿಲ್ಲ.
ಬದಲಾಗಿ, ಇವೆರಡೂ ಸಾಧನಗಳೂ, ತರಂಗಗಳ ಮೂಲಕ ಸಂಪರ್ಕ ಸ್ಥಾಪಿಸಿಕೊಳ್ಳುತ್ತದೆ.

ಇನ್ನು, ನಿಮ್ಮ ಎ.ಡಿ.ಎಸ್.ಎಲ್ ಮೋಡೆಮ್‍ನಿಂದ (ಅಥವಾ ಸ್ಪ್ಲಿಟ್ಟರ್ ಎಂಬ ಪುಟ್ಟ ಡಬ್ಬದ ಮೂಲಕ ಹಾದು) ಟೆಲಿಫೋನ್ ವೈರ್ ಮನೆಯಿಂದ ಹೊರಹೊರಟಿರುತ್ತದೆ.

ನಿಮ್ಮ ಮನೆಯಲ್ಲಿರುವ ಸಾಧನಗಳ ಒಟ್ಟಾರೆ ನೋಟ ಹೀಗಿರಬಹುದು.

ನಾಸ್ತಿಕ ಗೋಸುಂಬೆ

2009-08-02T01:34:00.000-07:00

ಪುರೋಹಿತರೂ ಶಾಸ್ತ್ರಿಗಳೂ
ಧರ್ಮದ ಹೆಸರ ಬಳಸಿ
ಜನರ ಕೊಳ್ಳೆ ಹೊಡೆಯವರೆಂದು,
ಜ್ಞಾನೋದಯ ಮಾಡುವುದಾಗಿ
ಚೊಕ್ಕವಾದ ಹೊತ್ತಿಗೆಯೊಂದು ಬರೆದು,
ಚಕ್ಕಂದದಿಂದ ನಾಟಕವನಾಡಿ,
ಅದೇ ಧರ್ಮದ ಹೆಸರಲ್ಲಿ
ಕೊಳ್ಳೆ ಹೊಡೆಯುವುದೂ
ನಾಸ್ತಿಕ ಧರ್ಮದ ಒಂದು ಮುಖವೇ?

--ಶ್ರೀ

ನಡೆಸು ಎನ್ನ ಬಿಡದೆ

2009-07-19T02:38:00.000-07:00

ನಡೆಸು ಎನ್ನ ಬಿಡದೆ ಹಿಡಿದು
ಎಡವಿ ಬೀಳೋ ಹುಡುಗೆನದು
ತೊಡರಿ ತಡಕುವಾಗ
ತಡವಿ ಬಿಡಿಸೋ ಒಡೆಯ (ಬಿಡಿಸೆನ್ನೊಡೆಯ)

ಕೇಡನರಿಯದೆ ಮಾಡೆ
ಬಡಿದು ಸರಿಪಡಿಸೆನ್ನ
ಕೋಡ ಮೂಡದ ಹಾಗೆ
ನೋಡೆಕೊಳೊ ಹಡೆದವನೆ

ಕಡಲಿರಲಿ, ಸುಡುತಿರಲಿ
ಒಡಕಿರಲಿ, ಮಡುವಿರಲಿ,
ಅಡಿಗಡಿಗೂ ಹಿಡಿದೆನ್ನ
ದಿಟದ ಜಾಡಲಿ ಇರಿಸು

ಈ ಹಾಡನ್ನು ಹಮೀರ್ ಕಲ್ಯಾಣಿ ರಾಗಕ್ಕೆ ಅಳವಡಿಸಿದ್ದೇನೆ. ಈ ರಾಗವನ್ನು ಕೇದಾರ್ ಎಂದು ಹಿಂದೂಸ್ಥಾನಿ ಪದ್ದತಿಯಲ್ಲಿ ಹೇಳುತ್ತಾರೆ.
ಶಾಸ್ತ್ರೀಯವಾಗಿ ಹೆಚ್ಚಾಗಿ ಕಲಿತಿಲ್ಲವಾದ್ದರಿಂದ, ತಪ್ಪುಗಳಿದ್ದರೆ ಮನ್ನಿಸಿ.

ನಡೆಸು ಎನ್ನ ಬಿಡದೆ.m...

ಪ್ರಖ್ಯಾತ ಹಾಡು ’ ಹಮ್ ಕೊ ಮನ್ ಕಿ ಶಕ್ತಿ ದೇನಾ’, ಇದೇ ರಾಗದಲ್ಲಿದೆ.

--ಶ್ರೀ

ಓ ’ಸಾಥಿ’ ರೇ, ತೇರೆ ಬಿನಾ ಭಿ ಕ್ಯಾ ಜೀನಾ!

2009-06-29T04:44:00.000-07:00

ಕಿಶೋರ್ ಕುಮಾರ್ ಹಾಡಿರುವ ಅಚ್ಚುಮೆಚ್ಚಿನ ಹಾಡುಗಳಲ್ಲಿ ಈ ಹಾಡೂ ಒಂದು...

ಹಾಗೂ ’ಗೀತಾ’ ಚಿತ್ರದ ’ಜೊತೆ ಜೊತೆಯಲಿ’ ಹಾಡೂ ಅಂದ್ರೆ ನನಗೆ ತುಂಬಾನೇ ಇಷ್ಟ!

ಈ ಹಿಂದಿ ಹಾಡಿಗೂ, ಗೀತಾ ಚಿತ್ರಗೀತೆಗೂ ಏನು ಸಂಬಂಧ ಅಂದುಕೊಳ್ಳುತ್ತಿದ್ದೀರಾ?
ಇತ್ತೀಚಿಗೆ ಟಿ.ವಿ. ಮಾಧ್ಯಮದವರೂ, ಕನ್ನಡಪ್ರಭ, ಪ್ರಜಾವಾಣಿ ಮುಂತಾದ ಹೆಸರಾಂತ ಪತ್ರಿಕೆಗಳೂ, ಈ "ಜೊತೆ"ಗೆ ಕೈ ಕೊಟ್ಟು "ಸಾಥ್"ನ ಸಾಥಿಗಳಾಗಿದ್ದಾರೆ...
ಈ "ಸಾಥ್" ಪದದ ಬಳಕೆ, "ಜೊತೆ ಜೊತೆಯಲ್ಲಿ" ಎಂಬ ಅದ್ಭುತ ಹಾಡಿನಲ್ಲಿ ಬಳಸಿದ್ದರೆ ಹೇಗಿರುತ್ತಿತ್ತು ಎಂದನಿಸಿತು.
’ಜೊತೆ’ ಎಂಬ ಕನ್ನಡ ಪದವೂ ತೆರೆಮರೆಗೆ ಸರಿಯುತ್ತಿದೆಯೇ?
ನೀವು ಸಾಥ್‍ನ ಸಾಥಿಗಳಾಗಿದ್ದೀರೇ, ಜೊತೆಯ ಜೊತೆಯಲಿರುವವರೇ?

--ಶ್ರೀ

ಹೂವು ಮತ್ತು ಟೊಂಗೆ

2009-06-27T02:05:00.000-07:00

ಕೊನರಿದ
ಹೊಸ ಹೂಗಳ
ಸವಿಯುತ, ಆನಂದದಿ
ನಲಿಯುತ, ಹೊಗಳುತ,
ಹಳೆ ಹೂಗಳ,
ಚಿಗುರಿಸಿದ
ರೆಂಬೆ-ಟೊಂಗೆಗಳ
ಮರೆಯುವುದೆಷ್ಟು ಸುಲುಭ!

ಮನದ ಹೊಗೆ

2009-06-26T01:59:00.000-07:00

ಬಾಳಿಗರು ದೆಹಲಿಯ ಚಿತೆಯ ಬಗ್ಗೆ "ಚಿಂತೆಯಲಿ" ಬರೆದುದನ್ನು ಓದಿದಾಗ, ನನಗಿದು ಹೊಳೆಯಿತು...

ಹಾಳು ಧಗೆ ಎಂದು
ಮನದ ಹೊಗೆ
ಹೊರಗೆ ಹಾಕುತ
ಭುಸುಗುಟ್ಟಿದೆ...
ಧಗೆಯ ಮೇಲಿನ
ಹೊಗೆ ಹೊರಹಾಕಿದರೂ
ಮನದಾಳದ ಹೊಗೆ
ಆರುವುದಿಲ್ಲವೆಂಬ ಅರಿವಿತ್ತು...

--ಶ್ರೀ

ಕಾಡುವ ಕರಿನೆರಳು

2009-06-16T22:16:00.000-07:00

ಕಾಡುವ
ಕರಿನೆರಳನು ದಿಟ್ಟಿಸಿ
ಬೇಗುದಿಯಲಿ
ಸುಡುವುದಕಿಂತ,
ಕಂಗಳನೆತ್ತಿ
ಸುಡುವ ನೇಸರನಲಿ
ನೆಡುವುದು ಲೇಸು...

--ಶ್ರೀ
(೧೭ - ಜೂನ್ - ೨೦೦೯)

ಕೊಚ್ಚೆಯಿಂದ ದೂರ ಉಳಿವಿರೇಕೆ?

2009-06-10T20:39:00.000-07:00

ಕೊಚ್ಚೆಯ ಕೆಸರು
ಹಚ್ಚಿಕೊಳುವುದೆಂದು
ಬೆಚ್ಚನೆ ಉಳಿವಿರೇಕೆ?
ಕೊಚ್ಚೆಯಲಿಳಿವ
ಕೆಚ್ಚಿರುವವರಿಗೇ
ಮೆಚ್ಚಿ ತಾಗುವುದು ತಾವರೆ...

--ಶ್ರೀ
(೧೦ - ಜೂನ್ - ೨೦೦೯)

ಅರಿವು-ಅಳಿವು

2009-06-08T08:49:00.000-07:00

ತಿಳಿ ನೀರೂ ಹರಿಯದೆ ನಿಲಲು
ಕೊಳೆಯುವುದು, ಹಳಸುವುದು...
ತಿಳಿವಿನ ಹರಿವು ನಿಲಲು,
ಅಳಿವಿನ ಉರುಳನು ಎಳೆದಂತಲವೇನು?

--ಶ್ರೀ
(೮ - ಜೂನ್ - ೨೦೦೯)

ತಂಪಾದ ಗುಣಗಳ ಕಂಪು

2009-06-05T10:14:00.000-07:00

ತಂಪಾದ ಗುಣಗಳು ದೂರದಲಿರುವ ಗರಿಮೆಗಳ ಮುಟ್ಟುವುದು
ಕಂಪಾದ ಕೇದಗೆಯ ಬಳಿಗೆ ದುಂಬಿಗಳು ತಂತಾನೆ ಬರುವಂತೆ

ಸಂಸ್ಕೃತ ಮೂಲ:

ಗುಣಾಃ ಕರೋತಿ ದೂತತ್ವಂ ದೂರೇsಪಿ ವಸತಾಂ ಸತಾಂ|
ಕೇತಕೀಗಂಧಮಘ್ರಾಯ ಸ್ವಯಮಾಯಾಂತಿ ಷಟ್ಪದಾಃ ||

--ಶ್ರೀ

(೫-ಜೂನ್-೨೦೦೯)

ಸಾಲ ಮಾಡಿ ತುಪ್ಪ ತಿನ್ನು!

2009-06-05T10:00:00.000-07:00

ಬರೀ ತುಪ್ಪ ತಿನ್ನೋದು ನನಗೆ ಇಷ್ಟನೇ ಇಲ್ಲ...
ಆದ್ರೂ, ಕೆಳಗಿನ ಸುಭಾಷಿತವನ್ನು ಹಂಸಾನಂದಿಯವರು ಕೊಟ್ಟಾಗ, ನಾನೂ ಒಂದು ಭಾವಾನುವಾದ ಮಾಡಿಬಿಟ್ಟೆ :)

ಬೂದಿಯಾದ ಒಡಲು ಮರಳಿ ಬರುವುದೇನೋ, ಬೆಪ್ಪ!
ತಿಣುಕಿ ಸಾಲ ಮಾಡಿಯಾದ್ರೂ ತಿನ್ನೋ ನೀನು ತುಪ್ಪ!

ಸಂಸ್ಕೃತ ಮೂಲ (ಚಾರ್ವಾಕ):

ಭಸ್ಮೀಭೂತಸ್ಯ ದೇಹಸ್ಯ ಪುನರಾಗಮನಂ ಕುತಃ |
ತಸ್ಮಾತ್ ಸರ್ವ ಪ್ರಯತ್ನೇನ ಋಣಂ ಕೃತ್ವಾ ಘೃತಂ ಪಿಬೇತ್ ||

--ಶ್ರೀ
(೫-ಜೂನ್-೨೦೦೯)

ದೀಪವು ನಿನ್ನದೇ...ಗಾಳಿಯು ನಿನ್ನದೇ...

2009-06-05T09:47:00.001-07:00

ಸ್ಠಳ: ಮನೋಕಾಮನಾ ಮಂದಿರ, ನೇಪಾಳ

ಹಿಮಾಚಲ ಪರ್ಯಟನೆ - ಬೈಜನಾಥ್

2009-06-05T09:23:00.000-07:00

ಹಿಮಾಚಲದ ಕಾಂಗ್ರ ಗುಡ್ಡಗಾಡಿನ ತಪ್ಪಲಲ್ಲಿರುವ ಊರು - ಬೈಜನಾಥ್. ಧರ್ಮಶಾಲಾದಿಂದ ಪೂರ್ವಕ್ಕಿರುವ ಈ ಊರು ಬಿನ್ವಾ ಎಂಬ ನದಿಯ ತಟದಲ್ಲಿದೆ. ಬಿಯಾಸ್ ನದಿಯ ಉಪನದಿ ಈ ಬಿನ್ವಾ.
ಊರಿನ ಹೆಸರೇ ಸೂಚಿಸುವಂತೆ ಇಲ್ಲಿ ಬೈಜನಾಥ್ ದೇವಾಲಯವಿದೆ. ಬೈಜನಾಥನೆಂದರೆ ವೈದ್ಯನಾಥ, ಶಿವ.
ಈ ಸ್ಥಳದಲ್ಲಿ ಶಾರದಾ ಲಿಪಿಯಲ್ಲಿ ಬರೆದ ಶಿಲಾಶಾಸನಗಳು ದೊರೆಕಿವೆ. ಈ ಶಿಲಾಶಾಸನಗಳಿಂದ ಈ ಊರಿನ ಹಳೆಯ ಹೆಸರು ’ಕೀರಗ್ರಾಮ’ ಎಂದೂ, ಬಿನ್ವಾ ನದಿಯ ಹಳೆಯ ಹೆಸರು ’ಬಿಂದುಕಾ’ ಎಂದೂ ತಿಳಿದುಬರುತ್ತದೆ. ಈ ಶಿಲಾಶಾಸನಗಳಿಂದ, ಈ ದೇಗುಲವನ್ನು ಕ್ರಿ.ಶ. ೧೨೦೪ರಲ್ಲಿ ಕಟ್ಟಿದರೆಂದೂ ಹೇಳುತ್ತಾರೆ.
ಉತ್ತರ ಭಾರತದ ನಾಗರ ಶೈಲಿಯಲ್ಲಿ ಕಟ್ಟಿರುವ ಸುಂದರ ದೇಗುಲ - ಬೈಜನಾಥ್. ಇಲ್ಲಿ, ವೈದ್ಯನಾಥನ ಎದುರು(ಲಿಂಗಕ್ಕೆ ನೇರವಾಗಿ) ಎರಡು ನಂದಿ ವಿಗ್ರಹಗಳು ಕಾಣಸಿಗುತ್ತವೆ. ಪುಟ್ಟ ಮಂಟಪದೊಳಗೆ ಕುಳಿತ ನಂದಿಯೊಂದಾದರೆ, ಅದರ ಹಿಂದೆ ನಿಂತಿರುವ ನಂದಿಯೊಂದು. ಪಶ್ಚಿಮಕ್ಕೆ ಮುಖ ಮಾಡಿರುವ ಈ ದೇಗುಲದ ಮುಖಮಂಟಪಕ್ಕೆ ನಾಲ್ಕು ಕಂಬಗಳಿವೆ.
ದೇಗುಲದ ಮುಖ್ಯದ್ವಾರದ ಎಡ ಭಾಗಕ್ಕೆ, ನಿಂತಿರುವ ಗಣಪನ ವಿಗ್ರಹವೊಂದು ಕಾಣಸಿಗುತ್ತದೆ. ದೇಗುಲದ ಹೊರಭಾಗದ ಸುತ್ತಲೂ, ಸುಬ್ರಮಣ್ಯ, ಕಾಳಿ, ಪಾರ್ವತಿ ಮುಂತಾದ ಮನಸೆಳೆವ ವಿಗ್ರಹಗಳಿವೆ.

ಈ ಊರಿನಲ್ಲಿ ನಡೆವ ದಸರೆಯಲ್ಲೊಂದು ವೈಶಿಷ್ಟ್ಯವಿದೆ.
ಉತ್ತರ ಭಾರತದಲ್ಲಿ, ಸಾಮಾನ್ಯವಾಗಿ ದಸರೆಯ ಸಮಯದಲ್ಲಿ ಕಾಣಸಿಗುವುದು ’ರಾಮ-ಲೀಲ’ ಉತ್ಸವ. ಈ ಉತ್ಸವದಲ್ಲಿ, ರಾವಣ-ಕುಂಭಕರ್ಣ-ಮೇಘನಾದರ ಬೊಂಬೆಗಳನ್ನು ಸುಡುವುದು ಸರ್ವೇ ಸಾಮಾನ್ಯ.
ಆದರೆ ಈ ಊರಿನಲ್ಲಿ ರಾವಣನನ್ನು ಸುಡುವುದಿಲ್ಲ. ಈ ಸ್ಥಳದಲ್ಲಿ ಬೈಜನಾಥನನ್ನು ಕುರಿತು ರಾವಣ ತಪಗೈದಿದ್ದನೆಂಬುದು ಇಲ್ಲಿಯವರ ನಂಬಿಕೆ. ಇಲ್ಲಿ ಕೂಡ ಕೆಲ ವರ್ಷಗಳ ಹಿಂದೆ ದಸರಾ ಸಮಯದಲ್ಲಿ, ಬೇರೆಡೆಯಂತೆ ದಸರೆಯ ಸಮಯದಲ್ಲಿ ರಾವಣನ ಬೊಂಬೆ ಸುಟ್ಟಾಗ ಉತ್ಸವ ನಡೆಸಿಕೊಟ್ಟವರಿಗೆ ಸಾವಾಯ್ತಂತೆ.
ಇದೇ ರೀತಿ, ಪ್ರತಿ ವರ್ಷವೂ ರಾವಣನನ್ನು ಸುಟ್ಟಾಗ, ಒಂದಿಲ್ಲೊಂದು ಕೆಡುಕಾಗಿ, ಕೊನೆಗೆ ರಾವಣನ ಸುಡುವ ಪ್ರತೀತಿಯನ್ನು ಈಗ ನಿಲ್ಲಿಸಿದ್ದಾರೆ.

ಒಟ್ಟಿನಲ್ಲಿ, ಬೆಟ್ಟದಿಂದ ಸುತ್ತುವರಿದ, ಸಿಂಧೂ ನದಿಯ ಉಪನದಿಯ ಉಪನದಿಯ ತಟದ ಈ ಬೈಜನಾಥ್, ಕುತೂಹಲಭರಿತ ಪ್ರೇಕ್ಷಣೀಯ ಸ್ಥಳ.

--ಶ್ರೀ

ಕುಂದು ಬಂದಾಗ ಎದಿರಿಸುವುದು ಹೇಗೆ???

2009-06-02T09:56:00.000-07:00

ಕುಂದು ಬಂದಾಗ ಎದಿರಿಸುವುದು ಹೇಗೆಂದು ಎಣಿಸಿರಬೇಕು
ಬೆಂದು ಉರಿವಾಗ ಮನೆ ಬಾವಿಯ ಅಗೆವುದು ತರವೇನು?

ಸಂಸ್ಕೃತ ಮೂಲ:

ಚಿಂತನೀಯಾ ಹಿ ವಿಪದಾಂ ಆದೌ ಏವ ಪ್ರತಿಕ್ರಿಯಾ |
ನ ಕೂಪಖನನಂ ಯುಕ್ತಂ ಪ್ರದೀಪ್ತೇ ವಹ್ನಿನಾ ಗೃಹೇ ||

(೨-ಜೂನ್-೨೦೦೯)

ಅತ್ತೆಯ ನೋವು

2009-05-31T07:24:00.000-07:00

ಬಿಳಿಯ ಮೈಯವಳಾದರೇನು,
ಮಗಳಂತೆ ಸಲುಹಿದೆ ಸೊಸೆಯನ್ನು...
ಜಗಳವೆಂದೂ ಇಲ್ಲ, ಈ ಹೊಸ ಮಗಳೊಡನೆ
ಸೊಸೆ ಕೂಡ ಮಗಳಂತೆ, ಕಿಲಕಿಲನೆ ನಗುನಗುತ ಓಡಾಡಿದಾಗ, ನನಗೂ ಖುಷಿ!
ಮನೆಯವಳಾದಳಲ್ಲ ಹೊರಗಿನವಳೆಂದು !

ಸಮಯ ಉರುಳಿತು...
ಬಳಿಕ ನನ್ನ ಕಿಬ್ಬೊಟ್ಟೆಯ ನೋವು ಹೆಚ್ಚಾಗಿ
ಕೊನೆಗೆ ನೋವು ತಡೆಯಲಾರದೆ ನೋಡಿಕೊಂಡೆ ಏನಾಗಿದೆಯೆಂದು...
ಆಗಲೇ ನನಗೆ ಕಂಡದ್ದು, ನನ್ನಳೊಗೆ ಆಳವಾಗಿಳಿದ ಮಿರಿ-ಮಿರಿ ಮಿಂಚುವ ಚಾಕು ...
ಆ ಕಿಲಕಿಲ ನಗು ಹೆಚ್ಚಾಗಿತ್ತು...

-ಶ್ರೀ

ಮದರಂಗಿ ಹಚ್ಚಿಸಿಕೊಳುತಿಹೆನೋ, ನಲ್ಲ...

2009-04-27T07:14:00.000-07:00

ಹಚ್ಚಿಸಿಕೊಳುತಿಹೆನೋ
ಮದರಂಗಿ, ನಲ್ಲ...
ಚಿತ್ತಾರ ಹೊತ್ತ
ಮದನಿಕೆ ನಾನೀಗ...
ಹೆಚ್ಚಿದೆ ಎನ್ನ
ಹೃದಯ ಮೃದಂಗದಾ ಬಡಿತ...
ನಿನ್ನೊಲವದಷ್ಟೆಂದು
ತಿಳಿಯುವಾ ತುಡಿತ...

--ಶ್ರೀ

[ಮದರಂಗಿ ಒಲವಿನ ಮಾಪಕ ;) ಕೈಗೆ ಹಾಕಿದ ಮದರಂಗಿ ಬಣ್ಣ ದಟ್ಟವಾಗಿ ಮೂಡಿದಷ್ಟು, ಒಲವು ಹೆಚ್ಚು ಎಂಬ ನಂಬಿಕೆ]

ಮದರಂಗಿಯ ಚಿತ್ರ ಹಾಕಿದ ಅನಿಲ್‍ಗೆ ಧನ್ಯವಾದಗಳು!

ದೋಣಿ ಸಾಗದು...ಮುಂದೆ ಹೋಗದು...

2009-04-22T02:46:00.000-07:00

ಚಿತ್ರ ತೆಗೆದದ್ದು ಭದ್ರಾ ದಂಡೆಯಲ್ಲಿ...

ಕೇಸರಿ ಹೂಗಳ ಬಟ್ಟಲು

2009-04-17T02:43:00.000-07:00

ಇಂಟರ್‍ನೆಟ್ ಬಳಸೋದು ಹೇಗೆ??? - ಚಿತ್ರಕ್ಕೊಂದು ಕವನ

2009-04-16T21:02:00.000-07:00

ಸಿಗುವುದೇನಿಲ್ಲಿ
ನನಗೊಂದು ಒಳ್ಳೆಯ ಹೊತ್ತಿಗೆ...?
ತಿಳಿಯಬೇಕಿಂದು ನಾ
ಬಳಸುವುದು ಹೇಗೆಂದು ಇಂಟರ್‍ನೆಟ್ಟು...

ನನಗಿಲ್ಲಿರುವುದು ಬೇಕಿಲ್ಲ,
ಕಳಚಿಕೊಳ್ಳುವೆ ಮೆತ್ತಗೆ...
ದಿನವೂ ಸಿಗುತಿಹುದು
ಬರೀ ಕಸ-ಕೊಳಕು-ಹೊಟ್ಟು...

ಪಡಬಾರದ ಪಾಡು
ನನ್ನ ಪುಟ್ಟ ಹೊಟ್ಟೆಗೆ...
ಗೂಗಲಿಸಬೇಕಿದೆ ನಾ
ಗಿಟ್ಟಿಸಲು ಮೆಚ್ಚಿನಾ ಹಿಟ್ಟು...

--ಶ್ರೀ

’ಚಿತ್ರಕ್ಕಾಗಿ ಕೊರೆ’ ಎಂದು ಕರೆ ನೀಡಿದ ಬಾಳಿಗರಿಗೆ ನನ್ನಿ! :)

ದೂರದ ಬೆಟ್ಟ ನುಣ್ಣಗೆ...

2009-04-09T02:36:00.000-07:00

ಕಮರಿ-ಕಂದರಗಳ
ಹಂದರವೂ,
ಸುಂದರ ಮೊಲದಂತೆ ಮೂಡುವುದು...

ಸಿಡಿಗುಂಡಂತೆಗರುವ
ಬೆಂಕಿಯುಂಡೆಗಳೂ,
ಬಂಗಾರದ ಚೆಂಡಂತೆ ಬೆಳಗುವುದು...

--ಶ್ರೀ
(೯ - ಏಪ್ರಿಲ್ - ೨೦೦೯)

ಅಂಗಳಕಿಂದು ಬಾರೋ ಕೃಷ್ಣಯ್ಯ...

2009-04-02T06:40:00.000-07:00

ಅಂಗಳಕಿಂದು ಬಾರೋ ಕೃಷ್ಣಯ್ಯ
ಅಂಗಳಕಿಂದು ಬಾರೋ || ಪಲ್ಲವಿ ||

ತಿಂಗಳ ಮೊಗದ ಚೆನ್ನಿಗರಾಯನೇ
ಮಂಗಳವನ್ನು ತಾರೋ... || ಅನು ಪಲ್ಲವಿ ||

ಕಾಲಿಗೆ ಗೆಜ್ಜೆಯ ಕಟ್ಟಿ
ಹಾಲಿನ ಹೆಜ್ಜೆಯನಿಟ್ಟು
ಕುಣಿ ಕುಣಿದಾಡುತಾ ಬಾರೋ || ೧ ||

ಹಳದಿ ರೇಷಿಮೆ ಹೊದ್ದು
ಬಿಳಿಯ ಮುದ್ದೆಯ ಮೆದ್ದು
ಮುದ್ದಿನ ಮೊಗವನು ತೋರೋ || ೨ ||

ಚೆಂದದ ಹೂಗಳ ಧರಿಸಿ
ಚಂದನ ದೇಹಕೆ ಬಳಸಿ
ಗೋಗಳ ಒಲಿಸಲು ಬಾರೋ || ೩ ||

ಚಿಣ್ಣರ ಒಡನೆ ಮೆರೆದು
ಬಣ್ಣದ ಗೋಪಿಯರೆಳೆದು
ತುಂಟಾಟವಾಡಲು ಬಾರೋ || ೪ ||

ವಂಕಿಯ ತೋಳಿಗೆ ಹೇರಿ
ಬಿಂಕದ ನಗುವನು ಬೀರಿ
ಕೊಳಲನು ಊದಲು ಬಾರೋ || ೫ ||

ನವಿಲಗರಿಯನು ತೊಟ್ಟು
ಸವಿಯನು ಹರಿಯಲು ಬಿಟ್ಟು
ನಲಿ ನಲಿದಾಡುತಾ ಬಾರೋ || ೬ ||

--ಶ್ರೀ
(೩೧-ಮಾರ್ಚ್-೨೦೦೯)

ಹಿಮಾಚಲ ಪರ್ಯಟನೆ - ಯಾಕೂ (ಝಾಕೂ) ದೇಗುಲ, ಶಿಮ್ಲಾ

2009-04-01T08:24:00.000-07:00

ಶಿಮ್ಲಾ ನಗರದಲ್ಲಿನ ಪೂರ್ವಕ್ಕಿರುವ ಎತ್ತರದ ಬೆಟ್ಟ - ಝಾಕೂ(ಯಾಕೂ). ಸಮುದ್ರ ಮಟ್ಟದಿಂದ, ಸುಮಾರು ೮೫೦೦ ಅಡಿಗಳ ಮೇಲೆ ಇರುವ ಈ ಬೆಟ್ಟದ ಮೇಲೆ, ಹನುಮಂತನ ದೇಗುಲವೊಂದಿದೆ.
ಈ ದೇಗುಲವನ್ನು ತಲುಪಲು, ಬೆಟ್ಟದ ಬುಡದಿಂದ ೨ ಕಿ.ಮೀ. ಕಡಿದಾದ ದಾರಿ ಇದ್ದು, ಇದನ್ನು ಹತ್ತಿ ತಲುಪಬಹುದು ಇಲ್ಲವೇ ಬೆಟ್ಟಗಳನ್ನು ಸುಲುಭವಾಗಿ ಹತ್ತುವ(೪-wheel drive) ಕಾರಿನಲ್ಲಿ ತಲುಪಬಹುದು.

ಈ ಝಾಕು ಬೆಟ್ಟಕ್ಕೆ ಹನುಮಂತನು ಭೇಟಿ ಕೊಟ್ಟಿದ್ದನೆಂಬ ಪ್ರತೀತಿ. ಈ ದೇಗುಲದಲ್ಲಿ ಕೆಳಕಂಡ ಇತಿಹಾಸ(ನಂಬಿಕೆ)ಯನ್ನು ದಾಖಲಿಸಿದ್ದಾರೆ:

ರಾಮಾಯಣದಲ್ಲಿ, ಲಕ್ಷ್ಮಣನು ಇಂದ್ರಜಿತುವಿನ ಬಾಣದಿಂದ ಪ್ರಜ್ಞಾಹೀನನಾದಾಗ, ಹನುಮಂತನು ವಾನರ ಸಹಚರರೊಂದಿಗೆ ಹಿಮಾಲಯಕ್ಕೆ ಧಾವಿಸುತ್ತಾನೆ.
ಸಂಜೀವಿನಿಯನ್ನು ಹುಡುಕುತ್ತಾ ಹಿಮಾಲಯದಲ್ಲಿ ಸಂಚರಿಸುತ್ತಿರುವಾಗ, ಝಾಕೂ ಎಂಬ ಋಷಿಯು ಈ ಸ್ಥಳದಲ್ಲಿ ತಪಸ್ಸು ಮಾಡುತ್ತಿರುವುದು ಹನುಮನ ಕಣ್ಣಿಗೆ ಬೀಳುತ್ತದೆ.
ಆಗ ಹನುಮನು ಸಂಜೀವಿನಿ ಗಿಡಮೂಲಿಕೆಯ ಬಗ್ಗೆ ಹೆಚ್ಚು ತಿಳಿಯಲು, ಝಾಕೂ ಋಷಿಯ ಸಹಾಯವನ್ನು ಕೋರುತ್ತಾನೆ.
ಝಾಕೂ ಋಷಿಯು ಸಂಜೀವಿನಿ ಗಿಡಮೂಲಿಕೆಯ ಬಗ್ಗೆ ತಿಳಿಸಿ, ಅದು ದ್ರೋಣ ಪರ್ವತದಲ್ಲಿ ಸಿಗುವುದಾಗಿ ವಿವರಿಸುತ್ತಾನೆ.
’ಸಂಜೀವಿನಿ ಮೂಲಿಕೆ ಸಿಕ್ಕ ಮೇಲೆ, ಈ ಬೆಟ್ಟಕ್ಕೆ ಬಂದು, ತನ್ನನ್ನು ಭೇಟಿ ನೀಡಿ ಲಂಕೆಗೆ ಹೋಗು’ ಎಂದು ಹನುಮನ ಬಳಿ ವಚನ ತೆಗೆದುಕೊಳ್ಳುತ್ತಾನೆ.

ಹನುಮನು ದ್ರೋಣ ಪರ್ವತದ ಕಡೆಗೆ ಹೊರಡಲು ಅನುವಾದಾಗ, ತನ್ನ ಸಹಚರರು ನಿದ್ರೆಯಲ್ಲಿರುದುವುದನ್ನರಿತು, ಅವರನ್ನು ಅಲ್ಲೇ ಬಿಟ್ಟು ದ್ರೋಣ ಪರ್ವತಕ್ಕೆ ಹೊರಟು ಹೋಗುತ್ತಾನೆ.
ಹನುಮಂತನಿಗೆ ಸಂಜೀವಿನಿ ದೊರಕುವ ವೇಳೆಗೆ, ಹೆಚ್ಚು ಕಾಲ ಕಳೆದಿದ್ದು, ಹನುಮನು ಝಾಕೂ ಋಷಿಯನ್ನು ಭೇಟಿ ಮಾಡದೆ ಲಕ್ಷ್ಮಣನನ್ನು ಉಳಿಸಲು ಲಂಕೆಗೆ ಹೊರಡುತ್ತಾನೆ.
ಲಕ್ಷ್ಮಣನು ಲಂಕೆಯಲ್ಲಿ ಸಂಜೀವಿನಿ ಮೂಲಿಕೆಯಿಂದ ಚೇತರಿಸುಕೊಳ್ಳುತ್ತಾನೆ.

ಇತ್ತ, ಝಾಕೂ ಋಷಿಯು ಹನುಮನನ್ನು ಮರು ಕಾಣದೆ ಚಡಪಡಿಸುತ್ತಿರುತ್ತಾನೆ. ಹನುಮನು ತನ್ನ ಮಾತನ್ನು ಉಳಿಸಿಕೊಳ್ಳಲು, ಮತ್ತೆ ಝಾಕೂ ಋಷಿಯನ್ನು ಭೇಟಿ ಮಾಡುತ್ತಾನೆ.
ಝಾಕೂ ಋಷಿಗೆ ಸಂಜೀವಿನಿ ದೊರಕಿದ ವಿವರವನ್ನು ತಿಳಿಸಿ, ಹೆಚ್ಚು ಕಾಲವಿಲ್ಲದ್ದರಿಂದ ಲಂಕೆಗೆ ತಮ್ಮನ್ನು ಭೇಟಿ ಮಾಡದೆ ಹಾಗೆ ಹೊರಟು ಹೋಗಬೇಕಾಯಿತೆಂದು ಅರಿಕೆ ಮಾಡಿಕೊಳ್ಳುತ್ತಾನೆ.
ಈ ಸ್ಥಳದಿಂದ ಹನುಮನು ಹೊರಟ ಮೇಲೆ, ಇಲ್ಲಿ ಹನುಮನ ಒಂದು ಉದ್ಭವ ಮೂರ್ತಿ ಕಾಣಿಸುಕೊಳ್ಳುತ್ತದೆ.

ಹನುಮಂತನ ನೆನಪಿಗಾಗಿ ಝಾಕು ಋಷಿ ಈ ಮಂದಿರವನ್ನು ಕಟ್ಟಿದ್ದರೆಂದು ಪ್ರತೀತಿ.
ಅಂದಿನಿಂದ ಈ ಮೂರ್ತಿಯನ್ನೇ ಇಲ್ಲಿ ಪೂಜಿಸುತ್ತಿದ್ದಾರಂತೆ...ಹನುಮನ ಸಹಚರರು ಅಂದಿನಿಂದ ಇಂದಿನವರೆಗೂ ಇಲ್ಲೇ ಇದ್ದಾರೆಂದು, ಹಾಗಾಗಿ ಈ ಸ್ಥಳದಲ್ಲಿ ಕೋತಿಗಳ ಸಂಖ್ಯೆ ಹೆಚ್ಚು ಎಂಬ ನಂಬಿಕೆ.

ಈ ದೇಗುಲದ ಪರಿಸರ ರಮ್ಯವಾಗಿದ್ದು, ದೇವದಾರು, ಪೈನ್ ಮರಗಳ ಮಧ್ಯೆ ಈ ಮಂದಿರವಿದೆ.
ಇಲ್ಲಿಂದ, ಶಿಮ್ಲಾ ನಗರದ ಮನಮೋಹಕ ದೃಶ್ಯ ಕಾಣ ಸಿಗುತ್ತದೆ.
ಇಲ್ಲಿನ ಕೋತಿಗಳು, ಪ್ರವಾಸಿಗರ ಜೇಬುಗಳನ್ನು ಆಹಾರಕ್ಕಾಗಿ ಪರೀಕ್ಷಿಸುತ್ತದೆಂದೂ, ಬ್ಯಾಗ್‍ಗಳನ್ನು ಕಸಿಯುತ್ತದೆಂದೂ ಕುಪ್ರಸಿದ್ಧಿ ಪಡೆದಿವೆ.
ಹಲವಾರು ಮಂದಿ, ಕೋತಿಗಳನ್ನು ಓಡಿಸಲು ದೊಣ್ಣೆಗಳನ್ನು ಬಳಸುತ್ತಿದ್ದುದೂ, ಕೋತಿಗಳು ಪ್ರವಾಸಿಗರ ಚಪ್ಪಲಿಗಳನ್ನು ಎತ್ತೊಯ್ದದ್ದೂ ಕಣ್ಣಾರೆ ಕಂಡೆವು.
ಇಲ್ಲಿಗೆ ಭೇಟಿ ನೀಡುವವರು ತುಸು ಎಚ್ಚರಿಕೆಯಿಂದಿದ್ದರೆ ಒಳಿತು...
ರಾಮ ಜಪದ ಮಹಿಮೆಯೋ / ನಮ್ಮ ಅದೃಷ್ಟವೋ ನಮ್ಮ ಸುತ್ತ-ಮುತ್ತ ಹತ್ತು-ಹಲವಾರು ಕೋತಿಗಳು ಬೇರೆಯವರನ್ನು ದಾಳಿ ಮಾಡಿದರೂ ಒಂದೂ ನಮ್ಮ ತಂಟೆಗೆ ಬರಲಿಲ್ಲ... :)

--ಶ್ರೀ

ಹೀಗೊಂದು ಅಳಲು

2009-02-16T07:40:00.000-08:00

[ಈ ಚಿತ್ರಕ್ಕೆ ಕವನ ಬರೆಯಬೇಕೆಂದು ಸಂಪದದಲ್ಲಿ ಹರಿ ಪ್ರಸಾದ್ ನಾಡಿಗ್ ಕರೆ ನೀಡಿದ್ದರು]

ಇಲ್ಲದಿದ್ದರೂ ಪಟದಲಿ
ಎಲ್ಲರಾ ಕವನದಲಿ
ಬೆತ್ತಲ ಮೂರುತಿಗೇ ಮನ್ನಣೆ...
ಅನಂತಾನಂತ ದೂರ
ಬಾನಲಿ ಬತ್ತಿಯಂತುರಿವ
ಕತ್ತಲ ಮೂರುತಿಗೇ ಮನ್ನಣೆ...

ಸನಿಹದಲ್ಲೇ ಇರುವೆ ನಾನು,
ಅನತಿ ದೂರದಲ್ಲೇ...
ಎತ್ತರ ತೆಂಗಿನ ಮರದಷ್ಟಾದರೂ...
ಕವಿಗಳ ನೋಟಕೆ ಬಾರದೇನು ನನ್ನ ಇರವು?
ಕವಿತೆಗೇಕಾಗಲಾರೆ ನಾ ಸ್ಫೂರ್ತಿಯ ಸೆಲೆಯು?

--ಶ್ರೀ

[ಫೆಬ್ರವರಿ ೧೬, ೨೦೦೯]

ರವಿಯ ನಿಜ ಬಣ್ಣವೇನು???

2009-02-11T07:32:00.000-08:00

ನಾನು ನನ್ನ ಗೆಳೆಯನಿಗೆ ಆಗಸ ತೋರಿ ಹೇಳಿದೆ...
'ಅದೋ ನೋಡು, ಸೂರ್ಯನೆಷ್ಟು ಹಳದಿಯಾಗಿ ಹೊಳೆಯುತ್ತಿದ್ದಾನೆ!'
ಅವನು ತಲೆ ಎತ್ತದೆಯೇ ಗುಡುಗುತ್ತಾನೆ...'ಸೂರ್ಯ ಹಳದಿಯಲ್ಲ, ಕೇಸರಿ!!!'
'ಅಲ್ಲಿ ನೋಡೋ, ಒಮ್ಮೆ...! ಅದೆಷ್ಟು ಸೊಬಗು ಆ ಹೊಂಬಣ್ಣ...'
ಆಗಸ ನೋಡಲು ಮತ್ತದೇ ಉದಾಸೀನ ಅವನಿಗೆ...
'ನಿನಗೆಲ್ಲೋ ತಲೆ ತಿರುಗಿದೆ, ಸೂರ್ಯನೆಂದಾದರು ಹಳದಿಯಾಗುವುದುಂಟೆ...ಅವನೆಂದು ಕೇಸರಿಯೇ...'
ಎಷ್ಟು ವರ್ಷದಿಂದ ನೋಡುತ್ತಿರುವೆ ಇವನನ್ನು...ಇವನು ಜಗಮೊಂಡ...'ನಾ ಹಿಡಿದ ಮೊಲಕ್ಕೆ ಒಂದೇ ಕಿವಿ ಎಂದು ಸಾಧಿಸುವವ' ಎಂದು ಮನದಲ್ಲೆಣಿಸಿದೆ...
ತುಸು ಹೊತ್ತಿನ ನಂತರ ಅವನು ತಲೆ ಎತ್ತಿ, 'ಅಲ್ಲಿ ನೋಡೋ ಮೂರ್ಖ! ಸೂರ್ಯನದೆಷ್ಟು ಕೇಸರಿ' ಎಂದ...
ಆ ವೇಳೆಗಾಗಲೆ ಸಂಜೆಯಾಗಿತ್ತು...

--ಶ್ರೀ
(ಫೆಬ್ರವರಿ ೧೧ ೨೦೦೯)

ಸಂಭಾಷಣೆ...ಈ ಪ್ರೇಮ ಸಂಭಾಷಣೆ...

2009-02-11T02:31:00.000-08:00

"ಇಲ್ಲ ಸಲ್ಲದ
ನೆಪವ ಹೂಡಿ
ದೂರವೇಕೆ ಸರಿವೆ?
ನಲ್ಲನಿಲ್ಲಿ
ಹಪಹಪಿಸಿಹನು,
ತೋಳ್ಬಂದಿಯಾಗು
ಬಾ ಚೆಲುವೆ!"

"ಕೊಂಚ ನಿಲ್ಲಿ, ನಲ್ಲ...
ಇದಿನ್ನು ಹೊಸತಲ್ಲ!
ಮೈ ಸೋಕದ, ತುಟಿ ತಾಗದ
ಒಲವ ತುಸು ಸವಿಯಿರಲ್ಲ...
ಅವಸರವೇಕೀಗ
ಹೂಡಲು ಕಾಮನಬಿಲ್ಲ?"

--ಶ್ರೀ
(೬-ಫೆಬ್ರವರಿ-೨೦೦೯)

ಕೇಸರೀಕರಣಕ್ಕೆ ಧಿಕ್ಕಾರ!! ಧಿಕ್ಕಾರ!!

2009-02-10T07:39:00.000-08:00

ಎಳೆ) ರಾಜಕಾರಣಿ: ಕೇಸರೀಕರಣಕ್ಕೆ ಧಿಕ್ಕಾರ!! ಧಿಕ್ಕಾರ!!

ಪತ್ರಕರ್ತ: ಯಾವ ವಿಚಾರಕ್ಕಾಗಿ ಧಿಕ್ಕಾರ ಕೂಗುತ್ತಿದ್ದೀರ? ನಿಮ್ಮ ಅನಿಸಿಕೆ ಹಂಚಿಕೊಳ್ಳುವಿರಾ?

(ಎಳೆ) ರಾಜಕಾರಣಿ: ಭಾ.ಜ.ಪ ಅಧಿಕಾರಕ್ಕೆ ಬಂದಾಗಿಂದ, ಪ್ರತಿದಿನ ಬೆಳಗ್ಗೆ - ಸಂಜೆ ಸೂರ್ಯನ ಕೇಸರಿ ಬಣ್ಣ ಹೆಚ್ಚಾಗಿ ಕಾಣ್ತಾ ಇದೆ ಅದಕ್ಕೆ!

:)
--ಶ್ರೀ
(೧೦-ಫೆಬ್ರವರಿ-೨೦೦೯)

ಕಂಗಾಲಾಗಿರುವೆ ನಾನಿಲ್ಲಿ

2009-02-09T07:38:00.000-08:00

ಕಂಗಾಲಾಗಿರುವೆ ನಾನಿಲ್ಲಿ
ನಿನ್ನ ಬರುವಿಕೆಯನ್ನೇ ಕಾಯುತ್ತ...
ಬರಲೇಕೆ ಇಷ್ಟು ತಡ?
ಚಿಂತೆಗಳಿರಲು ನೀ ಹತ್ತಿರ ಸುಳಿಯೆ;
ನೀ ಬರದೆ ಚಿಂತೆಗಳಿಗಿಲ್ಲ ಚಿತೆ...
ಅಪ್ಪಲೆನ್ನನು ಓಡಿ ಬಾರೇ,
ಓ ನಿದ್ರಾ ದೇವಿ!

--ಶ್ರೀ
(೯-ಫೆಬ್ರವರಿ-೯)

ಇಲ್ಲಿ ಕುಳಿತರೆ ಸ್ವರ್ಗವಂತೆ...

2009-02-01T00:47:00.000-08:00

ಇಲ್ಲಿ ಕೂರೆಂದು ಅದೆಷ್ಟು ಮಂದಿ ಹೇಳಿದರೋ ಎನಗೆ!
’ಇಲ್ಲಿ ಕೂರಯ್ಯ, ನಿನಗೆ ಸ್ವರ್ಗವೇ ಧರೆಗಿಳಿದಂತೆ ಕಾಣುವುದು’ ಎಂಬ ಮಾತನ್ನು ಕೇಳಿ ಕೇಳಿ ಕೊನೆಗೆ ತಲೆ ಚಿಟ್ಟೇ ಹಿಡಿದು ಬಂದು ಕುಳಿತಿಹೆನು ನಾನಿಲ್ಲಿ...
ಅದೇನೋ ’ಕವಿ ಕಂಡ ರವಿ’ ಇಲ್ಲೇ ಹುಟ್ಟುವುದಂತೆ! ಕುವೆಂಪು ಕುಳಿತ ’ಕವಿ ಶೈಲ’ವೂ ಈ ಸ್ಥಳದ ಮುಂದೆ ನಾಚಿ ನೀರಾಗುವುದಂತೆ...
ತಿಳಿ ನೀರ ಜಲಲ ಜಲಲ ಧಾರೆ ಹರಿಯುವುದುಂಟಂತೆ...ಇಲ್ಲಿನ ಚೈತ್ರದ ಚಿಗುರೆಲೆಗೆ ಹೊಸ ರಂಗುಂಟಂತೆ...
ಇಲ್ಲಿನ ಹಕ್ಕಿಗಳ ಕಂಠದಲ್ಲಿ ಅದೇನೋ ಹೊಸ ನಾದ, ಹೊಸ ರಾಗವಂತೆ!
ಎಲ್ಲೂ ಇಲ್ಲದ್ದೂ ಇಲ್ಲಿದೆಯಂತೆ...ಇಲ್ಲಿರುವ ಬೆಟ್ಟಗಳ ಮೈಮಾಟವನ್ನು ಬಣ್ಣಿಸಲಾರರಂತೆ, ಒಂದಕಿಂತ ಒಂದ ನೋಡುವುದೇ ಸೊಬಗಂತೆ...
ಒಂದು ನಂದಿಯಂತೆ ಕಂಡರೆ, ಮತ್ತೊಂದು ಕುದುರೆಮುಖವಂತೆ...ಹೀಗೆ ಒಬ್ಬೊಬ್ಬರೂ ಹೇಳಿದ್ದೋ ಹೇಳಿದ್ದು...

ನಾನು ಇಲ್ಲಿಗೆ ಬಂದು ಅದೆಷ್ಟು ಸಮಯ ಕಳಿಯಿತೋ ಕಾಣೆ...ನನಗೆ ಇದಾವುದೂ ಕಾಣುತ್ತಲೇ ಇಲ್ಲ...
ಏನಿದೇ ಇಲ್ಲಿ ಅಂಥದ್ದು! ಅದೇಕೆ ಜನರಿಗೆ ಈ ಜಾಗದ ಬಗ್ಗೆ ಅಷ್ಟೊಂದು ಒಲವು?

ಈ ಜಾಗದಲ್ಲಿ ಹೊಸತನವನ್ನು ಹುಡುಕುತ್ತಾ ತಲ್ಲೀನನಾಗಿದ್ದ ಎನಗೆ, ಮಗುವೊಂದು ಜೋರಾಗಿ ಅತ್ತಾಗಲೇ ಎಚ್ಚರವಾದದ್ದು...
ಪಕ್ಕದಲ್ಲೇ ರಚ್ಚೆ ಹಿಡಿದ ಮಗುವಿಗೆ ತಾಯಿ ಹೇಳಿದ ಮಾತಷ್ಟೆ ಕೇಳುತ್ತಿದೆ,
’ಅಗೋ, ನೋಡು, ಸೂರ್ಯ-ಮಾಮಾ, ಕೆಂಪಗೆ, ಕಿತ್ತಲೆ ಹಣ್ಣಂತೆ ಕಾಣುತ್ತಿದ್ದಾನೆ, ಅದೇನು ಚೆಂದ! ಬೇಕೇನೋ ನಿನಗೆ, ಗುಂಡನೆಯ ಕಿತ್ತಲೆಯ ಹಣ್ಣು?’...
ನನಗೇಕೆ ಕಾಣದಾ ಕಿತ್ತಲೆ ಹಣ್ಣು...ನನಗೂ ಬೇಕದು...ಆದರೆ ಕಾಣದಲ್ಲ...!

ಕಿತ್ತಲೆಯನ್ನೇ ನೆನೆಯುತ್ತಾ ದಿಗಂತವನು ದಿಟ್ಟಿಸಿದೆ ನಾನು ಮತ್ತೆ........ಕಿತ್ತಲೆಯ ಹುಡುಕುತ್ತಾ ಅದೆಷ್ಟು ಹೊತ್ತು ಕಳೆಯಿತೋ ಕಾಣೆ...
ಗದ್ದಲ ಮಾಡುತ್ತ ಹುಡುಗರ ಗುಂಪೊಂದು ಹಾದು ಹೋದಾಗಲೇ ಮತ್ತೆ ಎಚ್ಚರ...
ಗುಂಪಿನಲ್ಲೇ ಇದ್ದವನೊಬ್ಬ ಕೂಗಿದ, ’ಶಬ್ದ ಮಾಡದಿರಿ, ಇಲ್ಲಿ ’ಮಕವಾಕು*’ ಎಂಬ ಹಕ್ಕಿಯ ಇಂಪು ಕೇಳುವುದು’...
ನಾನು ಎಂದೂ ಒಬ್ಬನೇ ಒದರಿಕೊಳ್ಳುವುದೇ ಇಲ್ಲ, ಆದರೂ ಎನ್ನ ಮನಕೇ ಗದರಿದೆ - ’ಸದ್ದು! ಹೊಸ ಹಕ್ಕಿಯ ದನಿಯಂತೆ! ಗಮನವಿಟ್ಟು ಕೇಳು’...
ಊಹೂಂ...ಯಾವ ಹಕ್ಕಿಯ ಶಬ್ದವೂ ಕೇಳದೆನಗೆ...ನನಗೇನಾಗಿದೆ???
ಮತ್ತೆ ಮತ್ತೆ ದಿಟ್ಟಿಸಿ ನೋಡುತ್ತಿದ್ದೇನೆ ಕಿತ್ತಲೆ ಹಣ್ಣು ಬೇಕೆಂದು... ಮೈಯೆಲ್ಲಾ ಕಿವಿಯಾಗಿಸಿ ಹೊಸ ಹಕ್ಕಿಯ ಸವಿ ಕೂಗ ಕೇಳಲು...
ಇಲ್ಲ ಕಿತ್ತಲೆಯೂ ಇಲ್ಲ, ಕೂದನಿಯೂ ಇಲ್ಲ...

ಬಹುಷಃ ಯಾರಿಗೂ ನೋಡಿ ಸುಸ್ತಾಗದಿರಬಹುದು, ನನಗಂತೂ ಇಂದು ನನ್ನ ಸುತ್ತಲಿನ ಪರಿಸರವನ್ನು ನೋಡಿ ನೋಡಿ ದಣಿವಾಗಿದೆಯೆನಗೆ...
ಒಂದೇ ಕಡೆ ಕುಳಿತಿದ್ದರೂ ತಣಿದಿರುವೆ ನಾನು...
ಆದರೂ ನೆನ್ನೆಯಿಂದ ಅದೇನೋ ಆಹ್ಲಾದ...ಈ ದಣಿವಲ್ಲೂ ಹೊಸ ಚೈತನ್ಯವೆನಗೆ...
ಗೆಳೆಯರು ವಿವರಿಸಿದ ’ಸ್ವರ್ಗ’ ನನಗೆ ಈ ಸ್ಥಳದಲ್ಲಿ ಇಂದು ಕಾಣದಿರಬಹುದು, ಆದರೆ ನಾನು ನೆನ್ನೆಯೇ ಸ್ವರ್ಗಕ್ಕೆ ಕಾಲಿಟ್ಟಾಯ್ತಲ್ಲ...!
ನೆನ್ನೆಯೇ ನನ್ನ ಒಲವಿನ ಪ್ರಸ್ತಾಪಕ್ಕೆ ಅವಳ ಒಪ್ಪಿಗೆಯಾಯ್ತಲ್ಲ...ಆದಾದ ಕ್ಷಣದಿಂದ ನನ್ನ ಪ್ರಪಂಚವೇ ಬದಲಾದದ್ದು ಹೇಗೆ?
ಇವಳ ಮಾತೇ ನನಗೆ ಹೊಸ ಹಕ್ಕಿಯ ಹಾಡಾದಾಗ, ಇಲ್ಲೇಕೆ ಕುಳಿತಿದ್ದೀನಿಂದು ನಾನು ಮಕವಾಕುವಿನ ದನಿ ಕೇಳಲು?
ಯಾವ ಕಡೆ ನೋಡಿದರು ಮನದ ಚೆಲುವೆಯ ಮುಖವೇ ಕಂಡಿರುವಾಗ, ಇಲ್ಲಿ ಕಾಣುವ ಕಿತ್ತಲೆ ಹಣ್ಣೇಕೆನಗೆ...
ನನ್ನೊಲುಮೆಯ ಚೆಲುವೆಯೊಂದಿಗೆ ಇನ್ನೊಮ್ಮೆ ಎಂದಾದರೂ ಈ ಸ್ಥಳಕ್ಕೆ ಬರುವ...ಈಗಂತೂ ಜನರು ಹೇಳಿದ್ದೊಂದೂ ಕಾಣದೆನಗೆ...ಒಲವಿನ ಅಮಲೆಂದರೆ ಇದೇ ಏನೋ...

--ಶ್ರೀ

*ಮಕವಾಕು - ನನ್ನ ಕಲ್ಪನೆಯ ಹಕ್ಕಿ

(ಚಿತ್ರ ಕೃಪೆ: ಹರಿ ಪ್ರಸಾದ್ ನಾಡಿಗ್)

ಮಾಸದ ನೆನಪು...

2009-02-01T00:33:00.000-08:00

ಮರೆಯಬೇಕೆಂಬ
ಕಹಿ ನೆನಪೊಂದ,
ಮರೆಯಲೇಬೇಕೆಂದು
ಹಟ ಹಿಡಿದು,
ಮರು ನೆನೆದು
ನೆನೆ ನೆನೆದು, ಆ
ಕರಿ ನೆನಪು ಸದಾ
ಮನದಲ್ಲೇ ಮಾಸದೆ
ನೆಲೆ ನಿಲ್ಲುವಂತೆ
ಹೆಪ್ಪುಗಟ್ಟಿಸಿದೆನಲ್ಲ... :(

--ಶ್ರೀ
(೩೦-ಜನವರಿ-೨೦೦೯)

ದಾರಿಯ ತೋರೋ ಸಿರಿ ರಾಮ...

2009-01-27T07:17:00.000-08:00

ರಾಮಾಯಣದ ಸುಂದರ ಕಾಂಡವು ಬಹು ಜನಪ್ರಿಯವಾದದ್ದೇ...
ನಾನು ಈ ಸುಂದರ ಕಾಂಡದಲ್ಲಿ ಬಣ್ಣಿಸಿರುವ ಒಂದು ಸನ್ನಿವೇಶವನ್ನು ಭಿನ್ನ ರೀತಿಯಲ್ಲಿ ಚಿತ್ರಿಸ ಬಯಸುತ್ತೇನೆ...

ದಾರಿಯ ತೋರೋ ಸಿರಿ ರಾಮ
ದಾರಿಯ ತೋರೋ ಸಿರಿ ರಾಮ ದಿನವೂ
ಜಪಿಸುವೆ ನಾನು ನಿನ್ನ ನಾಮ...

ಜಾಂಬವನಿಂದಲಿ ಬಲವನು ಅರಿತೆ
ಅಂಬರದಾಚೆಗೆ ಒಮ್ಮೆಲೆ ಬೆಳೆದೆ
ಸಾಗರವನ್ನು ಸುಲುಭದಿ ಅಳೆದೆ || ದಾರಿಯ ||

ಮೈನಾಕವನು ಲಂಘಿಸಿ ನಡೆದೆ
ಲಂಕಿಣಿಯನ್ನು ಕುಟ್ಟಿ ನಾ ತರಿದೆ
ಬಿಂಕದಿ ನಾನು ಲಂಕೆಲಿ ಮೆರೆದೆ || ದಾರಿಯ ||

ಗರುವವು ಎಂದು ಮೆಟ್ಟಿತೋ ಅರಿಯೆ
ಮಾತೆಯ ಕಾಣದೆ ಎಲ್ಲೆಡೆ ಅಲೆದೆ
ನಿನ್ನಯ ನಾಮವ ಏತಕೋ ಮರೆತೆ || ದಾರಿಯ ||

ಅನುದಿನ ಸ್ಮರಿಸುವೆ ನಿನ್ನ ನಾಮ...
ಅನುಕ್ಷಣ ನೆನಯುವೆ ನಿನ್ನ ನಾಮ...
ದಾರಿಯ ತೋರೋ ಸಿರಿ ರಾಮ || ದಾರಿಯ ||

(ಈ ರಚನೆ ಅಹಿರ್-ಭೈರವ್/ಚಕ್ರವಾಕ ಧಾಟಿಯಲ್ಲಿದೆ)

--ಶ್ರೀ
(೨೨-ಜನವರಿ-೨೦೦೯)

ಅಮ್ಮನ ಕೋಪ...

2009-01-27T07:15:00.000-08:00

ತುಂಟಾಟ ತಾಳದೆ ಮುನಿದು, ದುರುದುರನೆ ದೂರ ಸರಿದಳು ಅಮ್ಮ
ಒಲವೇ ಕಂಡ ಕಂದನಿಗೆ ಅವಳ ಕಂಗಳಲೂ ಕಂಡಿತು ಗುಮ್ಮ

ಅಮ್ಮನವತಾರವ ಕಂಡು ಬೆದರಿ ಥರಥರನೆ ನಡುಗಿದನು ಪುಟ್ಟ
ಚೆನ್ನಿಲ್ಲದಾ ಕೋಪ ಬೇಡವು ಎಂದು ನಿಂತ ನೆಲದೀ ತಾನು ನೆಟ್ಟ

ತಣಿಯದಮ್ಮನ ಕೋಪ, ಬರಳು ಅಮ್ಮನು ಬಳಿಗೆ, ಸರಿಯಿತು ವಿರಸದಾ ಗಳಿಗೆ
ಮುನಿದ ಅಮ್ಮನಾ ಒಲಿಸುವುದು ಹೇಗೆಂದು ಎಣಿಸುತಾ ನಿಂತನೊಂದುಗಳಿಗೆ

ಕಣ್ಕೆಂಪು ಬೇಕಿಲ್ಲ, ಓಲೈಸಬೇಕಲ್ಲ ರಮಿಸಲೋಡಿದನು ಪುಟ್ಟ
ತಪ್ಪಿನರಿತು ತಾನು ಅಮ್ಮನಾ ಬಿಗಿಹಿಡಿದು ಗಳಗಳನೆ ತುಂಟನತ್ತ

ಮುನಿದ ಅಮ್ಮನು ಕೂಡ ಕಂದನಾ ಕಂಗಳಲಿ ಅಳುವ ಸಹಿಸುವುದಿಲ್ಲ
ಇಳಿಯಿತು ಮುನಿಸೆಲ್ಲ, ಬರಸೆಳೆದು ಮಗನ ಇತ್ತಳು ಮುತ್ತ ಸಿಹಿ ಬೆಲ್ಲ

ತುಂಬಿದಾ ಕಂಗಳಲು ಮಗುವು ತುಸು ನಕ್ಕನು, ವಿರಸಕೆ ಜಾಗವಿನ್ನಿಲ್ಲ
ಸಿಹಿ ಒಲವು ಹರಿಯಿತಲ್ಲೆಲ್ಲಾ...ಸಿಹಿ ಒಲವು ಹರಿಯಿತಲ್ಲೆಲ್ಲಾ...

(೧೪-೧೫ ಜನವರಿ ೨೦೦೯)

-ಶ್ರೀ

ಕ್ಲಿಕ್ಕಿಸಿದಾಗ...

2009-01-07T11:27:00.000-08:00

ಮೌಸ್ ಕ್ಲಿಕ್ಕಿಸೋದು ಪ್ರತಿ ದಿನದ ಗೋಳೇ ಬಿಡಿ...ಬಿಡುವಿದ್ದಾಗ ಕ್ಯಾಮರ ಕ್ಲಿಕ್ಕಿಸೋ ಪ್ರಯತ್ನ...
ಹೇಗಿದೆ ಹೇಳಿ...?

ಬೇಟೆಗೆ ಹೊಂಚು...
(ಹಿಮಾಲಯದ ತಪ್ಪಲಲ್ಲಿ ಕಂಡ ದೊಣ್ಣೆಕೇತ)

ನಾನೇ ರಾಜಕುಮಾರ...!
(ಗೋಪಾಲಸ್ವಾಮಿ ಬೆಟ್ಟದಲ್ಲಿ)

ನನ್ ಟೋಪಿ...ನಿಂಗ್ ಕೊಡಲ್ಲ...!
(ಶೃಂಗೇರಿ ಶಾರದಾ ಪೀಠ)

ಕೆಂಪಾದವೋ ಎಲ್ಲ ಕೆಂಪಾದವೋ...
(ಚಂದ್ರಗಿರಿ, ತಿರುಪತಿ ಬಳಿ)

ನಿಮಗೆ ಯಾವುದು ಮೆಚ್ಚೆನಿಸಿತು ಹೇಳಿ...

--ಶ್ರೀ
(ಕೆಲವನ್ನು ಇಮೇಜ್ ಎಡಿಟರ್‍ನಲ್ಲಿ ಎಡಿಟ್ ಮಾಡಲಾಗಿದೆ...)

ವಿಪರ್ಯಾಸ

2008-12-30T09:25:00.000-08:00

’ಹಕ್ಕಿಯ ನೆಲೆ ನಾಶ’ ಎಂದು ಬೊಬ್ಬೆ ಹೊಡೆದ ಪರಿಸರ-ಪ್ರೇಮಿಯ ಮೆಚ್ಚಿ ಅವನ ಮನೆಗೆ ಹೋದೆನು...
ಬಾಗಿಲ ತೆಗೆದವನೆ ಕೆಳಗೆ ನೋಡಿ,
’ಒಳಗೆ ಕೂತುಕೋ...ಹಾಳು ಇರುವೆಗಳು...ಗೂಡು ಒಡೆದು ಬರುವೆ"!!!

~~~ * ~~~

’ನಗರ ಸ್ವಚ್ಛಗೊಳಿಸಿ’ ಕಾರ್ಯಕ್ರಮದ ರೂವಾರಿ ಗೆಳೆಯನ ಜೊತೆಗೆ ಹೊಸದಾಗಿ ಹಾಕಿದ ಕಾಂಕ್ರೀಟ್ ರಸ್ತೆಯ ಮೇಲೆ ಹರಟೆ ಹೊಡೆಯುತ್ತ ನಡೆದೆನು...
ಅಲ್ಲೇ ಸಿಕ್ಕ ಮೆಕ್ಕೆ ಜೋಳವ ತಿಂದು ತೇಗಿ ಅವ, ಎಸೆದ ಬರಡಾದ ಕಡ್ದಿಯ ರಸ್ತೆಯ ಮೇಲೆ...
"ಯಾಕೋ" ಎಂದೆ..."ಅಯ್ಯೋ ನಿನಗೆ ಗೊತ್ತಿಲ್ವಾ, ಅದು ಬಯೋ-ಡಿಗ್ರೇಡಬಲ್!"

~~~ * ~~~

ಕನ್ನಡ ನುಡಿಯ ಬಗ್ಗೆ ಉದ್ದುದ್ದ ಬರಹಗಳ ಬರೆದವನ ಮೆಚ್ಚಿ ಕರೆ ಮಾಡಿದೆ ನಾನು...
"ನಿಮ್ಮನ್ನು ಈ ವಾರ ಭೇಟಿ ಮಾಡಬಹುದೇ?"
ಆ ಕಡೆಯಿಂದ ಉತ್ತರ ಬಂತು -
"ಸಾರಿ ಮ್ಯಾನ್! ದಿಸ್ ವೀಕ್ ಐ ಆಮ್ ವೆರಿ ಬಿಝಿ..ನೆಕ್ಟ್ ವೀಕೆಂಡ್ ಸಿಗೋಣ" !!!
:)

ಭಗ್ನ ಪ್ರೇಮಿ...

2008-12-30T07:00:00.000-08:00

ಒಲವಿನಲಿ
ಮಿಂದು-ಬೆಂದು
ಹೊರ ಬಂದ ಜೀವಕ್ಕೆ,
ಹೊಸತೊಂದು
ಜೀವ ಬಂದು
ಒಲವ ಹೊಳೆ
ಹರಿಸಿದರೂ,
ಆ ಜೀವ
ಹಳೆಯ ಕರುಕಲ
ನೆನೆದು ಬೆದೆರುವುದೇಕೆ?

--ಶ್ರೀ
(೨೬ ಡಿಸೆಂಬರ್ ೨೦೦೮)

ಅಟ್ಟವೆಂಬ ಭಂಡಾರ!

2008-12-26T05:53:00.000-08:00

ನೆನ್ನೆ ನಮ್ಮ ಮನೆಯ ಅಟ್ಟವನ್ನು ಸ್ವಚ್ಛಗೊಳಿಸೋಣವೆಂದು ನಾವು ಅಲ್ಲಿರುವ ವಸ್ತುಗಳನ್ನೆಲ್ಲ ಇಳಿಸಿದೆವು...
ನಮ್ಮ ಅಟ್ಟದಲ್ಲಿರುವ ವಸ್ತುಗಳು, ನನ್ನ ಚಿಕ್ಕಂದಿನ ದಿನಗಳ ನೆನಪುಗಳನ್ನು ತಂದುಕೊಟ್ಟಿತು...

ಸಿಕ್ಕ ವಸ್ತುಗಳ ಪಟ್ಟಿ:

- ಕೂಡಿಸಿಟ್ಟ ಸುಮಾರು ೫೦೦ ರೀತಿಯ ನಾಣ್ಯಗಳು ಹಾಗೂ ನೋಟುಗಳು
- ವಿವಿಧ ತರಹದ ಬೆಂಕಿ ಪೊಟ್ಟಣಗಳು...
- ವಿವಿಧ ದೇಶದ ಅಂಚೆ ಚೀಟಿಗಳು
- ನಾನು ಚಿಕ್ಕಂದಿನಲ್ಲಿ ಬಿಡಿಸಿದ ಚಿತ್ರಗಳು, ಪೈಂಟಿಂಗ್‍ಗಳು
- ನಾನು ಆರನೇ ಕ್ಲಾಸಿನಲ್ಲಿ ಬರೆದ ಉತ್ತರ ಭಾರತದ ಪ್ರವಾಸ ಕಥನ
- ನಾನು-ನನ್ನ ಅಕ್ಕ, ಪಕ್ಕದ ಮನೆಯ ಮಕ್ಕಳು ಒಟ್ಟಿಗೆ ಆಡಿದಾಗ ಬರೆದ ಆಟದ ಬರಹಗಳು
- ಹಾವು-ಏಣಿ ಆಟದ ಬೊರ್ಡ್
- ಪಗಡೆ ಕಾಯಿಗಳು
- ಕವಡೆಗಳು, ಕಪ್ಪೆ ಚಿಪ್ಪುಗಳು
- ನನ್ನ ಅಕ್ಕನು ಅಂಟಿಸಿ ತಯಾರಿಸಿದ 'A for apple' ನಿಂದ 'z for zebra' ಎಂಬ ಪುಸ್ತಕ
- ಹುಟ್ಟು ಹಬ್ಬಕ್ಕೆ ಗೆಳೆಯರು ಕೊಟ್ಟ ಶುಭಾಶಯ ಪತ್ರಗಳು (ಗ್ರೀಟಿಂಗ್ ಕಾರ್ಡ್)
- ಲಿಟಲ್ ಜೈಂಟ್ಸ್ ಎಂಬ ಮ್ಯಾಗಝೀನ್ ನವರು ನಡೆಸಿದ್ದ ಬಣ್ಣ ಹಾಕುವ ಸ್ಪರ್ಧೆಯಲ್ಲಿ ಗೆದ್ದದ್ದಕ್ಕೆ ಕೊಟ್ಟ ಪ್ರಮಾಣ ಪತ್ರ
- ನಾನು ಬಟ್ಟೆಯ ಮೇಲೆ ಮಾಡಿದ ಚಿತ್ತಾರಗಳು, ಕೈ-ಕೆಲಸಗಳು
- ನ್ಯೂಸ್ ಪೇಪರ್ ನಲ್ಲಿ ಬರುತ್ತಿದ್ದ ಕ್ರಿಕೆಟ್ ಆಟಗಾರರ ಚಿತ್ರಗಳನ್ನು ಕತ್ತರಿಸಿ ಶೇಖರಿಸಿದ್ದ ಒಂದು ಫೈಲ್
- 'ಬಿಗ್ ಫನ್' ಬಬ್ಬಲ್ ಗಮ್ಮಿನ ಒಳಗೆ ಸಿಗುತ್ತಿದ್ದ ಕ್ರಿಕೆಟ್ ಪಟುಗಳ ಚಿತ್ರಗಳು
(ನನಗೆ ಬಬ್ಬಲ್ ಗಮ್ ಕೊಡಿಸುತ್ತಿಲ್ಲವಾದರೂ, ಆಗ ಗೆಳೆಯರನ್ನು ಕಾಡಿ ಬೇಡಿ ಶೇಖರಿಸುತ್ತಿದ್ದೆ!)
- ನನ್ನ, ಅಕ್ಕನ ಸ್ಕೂಲಿನ ಮಾರ್ಕ್ಸ್ ಕಾರ್ಡ್-ಗಳು
- ಎಸ್.ಎಸ್.ಎಲ್.ಸಿ ಮತ್ತು ಪಿ.ಯು.ಸಿ ಹಾಲ್‍ಟಿಕೆಟ್‍ಗಳು
- ನಾನು ಸಣ್ಣವನಿದ್ದಾಗ ಶಾಲೆಯಲ್ಲಿ ಬರೆದಿದ್ದ 'ಉಕ್ತಲೇಖನ'ದ ಪದಗಳ ಪಟ್ಟಿ
- ನನಗೆ ಬಹುಮಾನವಾಗಿ ಸಿಕ್ಕ ಹಲವು ಪುಸ್ತಕಗಳು
- ನನ್ನ ಚಿಕ್ಕಪ್ಪ ತಂದು ಕೊಟ್ಟ ರಷ್ಯನ್ ಜಾನಪದ ಕಥೆ ಪುಸ್ತಕಗಳು
- ಬೊಂಬೆ ಮನೆ, ಚಂದಮಾಮ ಪುಸ್ತಕಗಳು
- ನಾನು ಮತ್ತು ಅಕ್ಕ ಕೂಡಿ ಹಾಕುತ್ತಿದ್ದ 'ಸ್ಟಿಕರ್' ಗಳು...
- ಹಳೆಯ ಪುಸ್ತಕದಲ್ಲಿ ಇಟ್ಟ ಗಿಣಿಯ ಪುಕ್ಕ
- ನವಿಲುಗರಿ
- ಸ್ಕೂಲಿಗೆ ಕೊಂಡೊಯ್ಯುತ್ತಿದ್ದ ಅಲ್ಯೂಮಿನಿಯಂ ಸೂಟ್ ಕೇಸ್
- ಸಂಗೀತದ ಪುಸ್ತಕ
- ಇಂಜಿನೀರಿಂಗ್‍ನಲ್ಲಿ ಕ್ಲಾಸ್‍ಮೇಟ್‍ಗಳು ಅಂಗಿಯ ಮೇಲೆ ಬರೆದ ಹಸ್ತಾಕ್ಷರಗಳು
- ಇಂಟರ್‍ನೆಟ್ ಮಿತ್ರರು ಬರೆದ ಪತ್ರಗಳು
ಹೀಗೆ ಎನೇನೋ...

ಇವೆಲ್ಲ ಕೂತು ನೆನ್ನೆ ನೋಡುತ್ತಿದ್ದಾಗ ಮನದಲ್ಲಿ ಹಾದು ಹೋದ ಸುಂದರ ನೆನಪುಗಳ ಎಣಿಕೆ ಎಷ್ಟೋ!
ಈಗ ಮತ್ತೆ ಅಟ್ಟಕ್ಕೆ ಇವೆಲ್ಲವನ್ನೂ ಇಡಬೇಕು...ಮತ್ತೆ ಎಷ್ಟು ವರ್ಷಗಳಾದ ಮೇಲೆ ಇದನ್ನೆಲ್ಲ ತೆಗೆಯುವೆನೋ ತಿಳಿಯದು...
ಎಷ್ಟು ಕಸ ಕೂಡಿ ಹಾಕುವೆನೆಂದು ಅಮ್ಮ ಮತ್ತು ಅಕ್ಕನ ಹತ್ತಿರ ಬಯ್ಸಿಕೊಂಡರೂ ಸರಿಯೇ ನನಗೆ ಇವೆಲ್ಲ ಬೇಕು...ಮತ್ತೆ ಇಂದು ಅಟ್ಟ ಸೇರಲಿವೆ...
ಕೆಲವು ಬೊಂಬೆಮನೆ , ಚಂದಮಾಮ ಪುಸ್ತಕಗಳನ್ನು ಕೆಳಗೆ ಇಟ್ಟುಕೊಂಡಿರುವೆ ಓದಲಿಕ್ಕೆ ಅಂತಾ... Smiling
ನೀವು ಹೀಗೆ 'ಕಸ' ಕೂಡಿ ಹಾಕ್ತೀರಾ?

--ಶ್ರೀ

ಕನಸ ಕಾಣಿರಿ ನೀವೆಲ್ಲ - ಹಗಲುಗನಸು!

2008-12-23T07:18:00.000-08:00

ಕನಸನು ಕಾಣಲು ಇಲ್ಲವು ವಯಸು!
ಪುಟ್ಟನಿಗೂ ಇದೆ ಮಿಠಾಯಿಯ ಕನಸು!!
ತಾತನಿಗೂ ಇದೆ ಬದರಿಯ ಕನಸು!!!
ಮನದಲಿ ಕಾಣಿರಿ ಎಲ್ಲರೂ ಕನಸು...
ಕನಸನು ಮಾಡಿರಿ ಬೇಗನೆ ನನಸು...
ಕನಸದು ನನಸಾಗಲು ಬಲು ಸೊಗಸು!
ಕಾಣಿರಿ ಎಲ್ಲರೂ ಚೆಂದದ ಕನಸು... :)

--ಶ್ರೀ
(೨೩ - ಡಿಸೆಂಬರ್ - ೨೦೦೮)

ಹಗಲುಗನಸು

2008-12-23T07:15:00.000-08:00

ಹಗಲುಗನಸು
-----------

ತೋಟದಿ
ನಾವೀರ್ವರು ಇರಲು
ನಲ್ಲೆಯ ಮಡಿಲೊಳು
ತಲೆ ಇರಿಸಿರಲು
ನಲ್ಲೆಯ ಬೆರಳು
ಆಡುತಲಿರಲು
ನಲ್ಲೆಯ ಒಲವಲಿ
ನಾ ತೋಯ್ದಿರಲು
ಭುವಿಯೇ ಸ್ವರ್ಗವಲ್ಲವೇನು?

--ಶ್ರೀ
(೨೩ - ಡಿಸೆಂಬರ್ - ೨೦೦೮)

ಹಚ್ಚ ಹಸಿರ ಚೀಲ ಬಿಚ್ಚಿ...

2008-12-22T19:37:00.000-08:00

ಹಚ್ಚ ಹಸಿರ ಚೀಲ
ಬಿಚ್ಚಿ, ಮಣಿಗಳಾ ಬಿಡಿಸಿ,
ತುರಿದು ಕಾಯ,
ತರಿದು ಎಲೆಯ,
ನೀರ ಹಾಕಿ,
ರವೆಯ ಜೊತೆ
ಬೆರೆಸಿ ಬಿಸಿ ಇಟ್ಟರೆ ...
ಸವಿಯಲು ಸಿದ್ಧವಾಯ್ತಲ್ಲ
ಅವರೇಕಾಳುಪ್ಪಿಟ್ಟು!!!

(ಅವರೇಕಾಯಿ ಸೀಸನ್ ನೆನೆಯುತ್ತಾ...)

--ಶ್ರೀ

ಅರಿವು ಉಕ್ಕಿ ಹರಿದಾಗ...

2008-11-27T10:04:00.001-08:00

ಹಿರಿಯರಾದ ಕೆಲವರಿಗೆ,
ಅರಿವು ತಲೆ ತುಂಬಿ,
ನೆರೆಯಂತೆ ಉಕ್ಕಿ
ಹರಿದು, ಕಣ್ಣ ಕವಿದು,
ಅರಿವ ಇರುವು ಅಳಿಸಿ,
ಕಿರಿಯರನ್ನಾಗಿಸುವುದಲ್ಲ!

--ಶ್ರೀ
(೨೭ - ನವಂಬರ್ - ೨೦೦೮)

ದ್ರೌಪದಿಯ ಸೀರೆ ಸೆಳೆವಾಗ...

2008-11-27T08:43:00.000-08:00

ಸೀರೆಯನ್ನೆಳೆದಾಗ
ದ್ರೌಪದಿ ಕೂಗಿದಳು 'ಕೃಷ್ಣಾ'....
ಥಟ್ಟನೆ ಬಿತ್ತು ಕೆನ್ನೆಗೆ ಏಟು...
'ಕೃಷ್ಣನನ್ನೇಕೆ ಕರೆಯುವೆ,
ನಾನು ಅರ್ಜುನ!' :)

~~~ * ~~~

ಸೀರೆಯನ್ನೆಳೆದಾಗ
ದ್ರೌಪದಿ ಕೂಗಿದಳು 'ಅರ್ಜುನಾ...'
ಅರ್ಜುನ ಬರಲಿಲ್ಲ...
ಥಟ್ಟನೆ ಬೀಸಿ ಕೆನ್ನೆಗೆ ಏಟು,
ಕೂಗಿದಳು 'ಕೃಷ್ಣಾ...' :)

--ಶ್ರೀ
(೨೭-ನವಂಬರ್-೨೦೦೮)

ಹೀಗೊಂದು ಚುಟುಕ!

2008-11-27T08:41:00.000-08:00

ಬರೆಯಲೆಂದು ಕುಳಿತಾಗ,
ತಲೆಯಿಂದ ಇಳಿಯದು...
ಕೈಲಿ ಸಣ್ಣ ತುಂಡು ಇಲ್ಲದಿದ್ದಾಗ,
ತಲೆಯಲ್ಲಿ ಫಟ್ಟನೆ
ಹೊಳೆದು - ಹಾರಿಹೋಗುವುದಲ್ಲ,
ಹಾಳು ಚುಟುಕ!

--ಶ್ರೀ
(೨೫-ನವಂಬರ್-೨೦೦೮)

ಬಾ...ಬಿಳಿ-ಕುದುರೆಯ ಹತ್ತು...

2008-11-21T00:18:00.001-08:00

ಬಂದಿಹೆನು ನಾನು
ನೆಚ್ಚಿನ ಬಿಳಿ ಕುದುರೆಯ ಮೇಲೆ...

ಏರು ಬಾ ಗೆಳತಿ,
ನಡೆ ಇನ್ನು ಹೊರಡುವ...
ಒಟ್ಟಾಗಿ ನೋಡುವ ಜೀವನದ ಲೀಲೆ...

--ಶ್ರೀ
(೨೧-ನವಂಬರ್-೨೦೦೮)

ಗಣೇಶ ಬಂದ ಕಾಯಿ ಕಡುಬು ತಿಂದ...

2008-11-06T09:18:00.000-08:00

ಏನಪ್ಪಾ, ದೀಪಾವಳಿ ಕೂಡ ಆಗೋಯ್ತು ಈಗ ’ಗಣೇಶ ಬಂದ...ಕಾಯಿ ಕಡುಬು ತಿಂದ’ ಅಂತಿದಾನೆ ಅಂದುಕೊಂಡಿರಾ...?
ಇದಕ್ಕೆ ಕಾರಣವಿದೆ...ತುಮಕೂರಿನಿಂದ ಕುಣಿಗಲ್ ದಾರಿಯಲ್ಲಿ ಸುಮಾರು ೧೦ ಕಿ.ಮೀ ದೂರದಲ್ಲಿರುವ ಗೂಳೂರು ಗಣೇಶನ ನೋಡಲು ಇದೇ ಸರಿ ಸಮಯ...!
ಗೂಳೂರಿನ ಗಣೇಶನಿಗೆ ಸಾವಿರಾರು ವರ್ಷಗಳ ಇತಿಹಾಸವಿದೆ ಎಂದು ಊರಿನ ಮಂದಿ ಹೇಳುತ್ತಾರೆ...
ನಮಗೆ ಇಲ್ಲಿನ ಅರ್ಚಕರು ತಿಳಿಸಿದ್ದನ್ನು ಹಾಗೆ ಕೆಳಗಿಳಿಸಿದ್ದೇನೆ...

"ಬಹಳ ಬಹಳ ಹಿಂದೆ...
ಒಮ್ಮೆ ಭೃಗು ಮಹರ್ಷಿಗಳು ಈ ದಾರಿಯಲ್ಲಿ ಸಾಗುತ್ತಿರಲು, ರಾತ್ರಿಯ ಹೊತ್ತಾಯಿತು ಹಾಗಾಗಿ ಅವರು ಇಲ್ಲಿಯೇ ತಂಗಲು ನಿರ್ಧರಿಸಿದರು...ಆದರೆ, ಇಲ್ಲಿ ಎಲ್ಲೂ ಪೂಜಾ ವಿಧಿಗಳಿಗೆ ದೇವಸ್ಥಾನಗಳು ಕಾಣ ಸಿಗಲಿಲ್ಲ. ಆದುದರಿಂದ, ಇಲ್ಲಿ ಒಂದು ಗಣೇಶನ ಪ್ರತಿಮೆಯನ್ನು ತಾವೇ ನಿರ್ಮಿಸಿ, ಪೂಜಾ ವಿಧಿಗಳನ್ನು ಮಾಡಿದರು. ಇವರು ಪೂಜೆ ಮಾಡುತ್ತಿದ್ದ ಜಾಗದ ಬಳಿ ಸಾಗುತ್ತಿದ್ದ ಕೆಲವು ಹಳ್ಳಿಗರು ಇದನ್ನು ನೋಡಿ, ’ಹೇಗೆ ಮಾಡಿದಿರಿ ನಮಗೂ ಇದನ್ನು ತಿಳಿಸಿ ಹೇಳಿ’ ಎಂದು ಕೇಳಿಕೊಂಡರು. ಆಗ ಭೃಗು ಮಹರ್ಷಿಗಳು, ಹಳ್ಳಿಯವರನ್ನು ಕರೆದು ಗಣೇಶನನ್ನು ಹೇಗೆ ಮಾಡಬೇಕು ಎಂದು ತಿಳಿಹೇಳಿ, ಪೂಜಾ ವಿಧಿಗಳನ್ನು ತಿಳಿಸಿದರಂತೆ. ಅಂದಿನಿಂದ ಇಂದಿನವರೆಗೂ ಗಣೇಶನ ಪೂಜೆ ಸತತವಾಗಿ ನೆರವೇರಿದೆ ಎಂದು ಹೇಳುತ್ತಾರೆ.

ಗಣೇಶನ ಹಬ್ಬದಂದು, ಕೆರೆಯ ಮಣ್ಣಿನಿಂದ ಪುಟ್ಟ ಗಣೇಶನನ್ನು ಮಾಡಿ, ಗುಡಿಗೆ ತರುತ್ತಾರೆ. ಪೂಜಾ ವಿಧಿಗಳನ್ನು ಮುಗಿಸಿ, ದೊಡ್ಡ ಗಣೇಶನನ್ನು ಕಟ್ಟಲು ಆರಂಭಿಸುತ್ತಾರೆ. ನವರಾತ್ರಿ ಹಬ್ಬದ ಹೊತ್ತಿಗೆ, ಗಣೇಶನ ಮುಕ್ಕಾಲು ಭಾಗ ಆಕಾರ ಪೂರ್ಣಗೊಳ್ಳುತ್ತದೆ. ವಿಜಯ ದಶಮಿ ದಿನದಂದು, ಪುಟ್ಟ ಗಣೇಶನನ್ನು ದೊಡ್ಡ ಗಣೇಶನ ಹೊಟ್ಟೆಯ ಒಳಗೆ ಇರಿಸಿ, ಕಡುಬುಗಳನ್ನು ಇಟ್ಟು ತುಂಬುತ್ತಾರೆ.
ದೀಪಾವಳಿ ಸಮಯಕ್ಕೆ ದೊಡ್ಡ ಗಣೇಶನ ಆಕಾರ ಪೂರ್ಣಗೊಳ್ಳುತ್ತದೆ. ದೀಪಾವಳಿ ದಿನದಿಂದ, ಕಾರ್ತಿಕ ಮಾಸ ಪೂರ್ಣಗೊಳ್ಳುವವರೆಗೂ, ನಿತ್ಯ ಪೂಜೆಗಳು ನಡೆಯುತ್ತವೆ. ಕಾರ್ತಿಕ ಮಾಸ ಮುಕ್ತಾಯವಾದಾಗ, ಈ ದೊಡ್ಡ ಗಣೇಶನನ್ನು ವಿಸರ್ಜಿಸುತ್ತಾರೆ. ಈ ದೊಡ್ಡ ಗಣೇಶನನ್ನು ಮಾಡಲು ೧೯ ಹಳ್ಳಿಯ ಜನರಿಗೆ ವಿಧ ವಿಧವಾದ ಕೆಲಸಗಳನ್ನು ಹಂಚಿದ್ದಾರಂತೆ. ಆಯಾ ಕೆಲಸಗಳನ್ನು ಅವರೇ ಮಾಡಬೇಕೆಂದಿದೆ" ಎಂದು ತಿಳಿಸಿದರು.

ಗೂಳೂರು ಗಣಪನ ದರ್ಶನ ಪಡೆದ ನಾವು, ಹತ್ತಿರದಲ್ಲಿರುವ ಕೈದಾಳ ಎಂಬ ಸ್ಥಳಕ್ಕೆ ಭೇಟಿ ನೀಡಿದೆವು.
ಗೂಳೂರಿನಿಂದ ಸುಮಾರು ಒಂದು ಮೈಲಿ ದೂರದಲ್ಲಿ ಕೈದಾಳವಿದೆ.

ಇಲ್ಲಿ, ಹೊಯ್ಸಳರ ಕಾಲದಲ್ಲಿ ಕಟ್ಟಿಸಿದ ಚೆನ್ನಕೇಶವನ ಮತ್ತು ಶಿವನ ಗುಡಿಗಳಿವೆ.
ಈ ಚೆನ್ನಕೇಶವನ ಗುಡಿಯನ್ನು, ಅಮರಶಿಲ್ಪಿ ಜಕಣಾಚಾರಿ ಕಟ್ಟಿದುದಾಗಿಯೂ, ಇಲ್ಲಿಯೇ ಇವನಿಗೆ ಕೈ ಮರಳಿ ಬಂತೆಂದೂ, ಅದಕ್ಕಾಗಿಯೇ ಈ ಸ್ಥಳ ಕೈದಾಳವೆಂದು ಹೆಸರು ಪಡೆದುದಾಗಿಯೂ, ಐತಿಹ್ಯವಿದೆ.

ಇಲ್ಲಿನ ಚೆನ್ನಕೇಶವನ ವಿಗ್ರಹವು, ತ್ರಿಮೂರ್ತಿ ರೂಪವೆಂದೂ ಹೇಳುವರು. ಮೂಲ ವಿಗ್ರಹದ ಕೆಳ ಭಾಗವು ಲಿಂಗದಂತೆ ಕೆತ್ತಿದ್ದು, ಲಿಂಗದ ಮೇಲೆ, (ಬ್ರಹ್ಮ) ಕಮಲವನ್ನು ಬಿಡಿಸಲಾಗಿದೆ. ಇದರ ಮೇಲೆ ಚೆನ್ನಕೇಶವನ ವಿಗ್ರಹವನ್ನು ಕೆತ್ತಲಾಗಿದೆ. ಈ ವಿಗ್ರಹ ಸುಮಾರು ೮ ಅಡಿಗಳಷ್ಟು ಎತ್ತರವಿದೆ. ಹೊಯ್ಸಳರ ಕಲ್ಲ ಕುಸುರಿಯ ಬಗ್ಗೆ ಹೆಚ್ಚು ಹೇಳಬೇಕಿಲ್ಲವಷ್ಟೆ, ಮೂಲ ವಿಗ್ರಹವು ಅತ್ಯಂತ ಸುಂದರ ಹಾಗೂ ಅದ್ಭುತವಾಗಿದೆ. ಇಲ್ಲಿನ ಚೆನ್ನಕೇಶವನ ವಿಗ್ರಹದ ಸುತ್ತ ದಶಾವತಾರವನ್ನು ಚಿತ್ರಿಸಲಾಗಿದೆ. ಈ ಗುಡಿಯ ಮಂಟಪದ ಕಂಬಗಳು, ಸುತ್ತಲಿರುವ ಹೊರಗೋಡೆ ಹೊಯ್ಸಳರ ಶೈಲಿಯಲ್ಲಿ ಇಲ್ಲವಾದ್ದರಿಂದ, ಇದನ್ನು ಅನಂತರ ಕಟ್ಟಿರಬಹುದೆಂಬುದು ನನ್ನ ಊಹೆ.

ಗುಡಿಯ ಹೊರಗೋಡೆಯ ಮೇಲೆ ಒಂಟೆ, ಕುದುರೆಗಳ ಮೇಲೆ ಸೈನಿಕರು ಸಾಗುತ್ತಿರುವ ಚಿತ್ರಗಳು, ಆನೆಯ ಚಿತ್ರಗಳೂ ಕಾಣಸಿಗುತ್ತದೆ. ಒಂಟೆಯನ್ನು ಕಂಡು ಅಚ್ಚರಿಯಾಗಿದ್ದೂ ನಿಜ. ಹೊರಗೋಡೆಯ ಮೇಲೆ, ಎರಡು ಮೀನುಗಳು ಒಂದು ಮರಿ ಮೀನನ್ನು ಎತ್ತಿಹಿಡಿದದ್ದೂ ಆಕರ್ಷಿಸಿತು. ಈ ಗುಡಿಯ ಆವರಣದಲ್ಲಿ, ಒಂದು ವೀರ(ಮಾಸ್ತಿ?) ಕಲ್ಲು ಕೂಡ ಕಂಡು ಬಂತು.
ಚೆನ್ನಕೇಶವನ ಗುಡಿಯ ಪಕ್ಕದಲ್ಲೇ ಹೊಯ್ಸಳರೇ ಕಟ್ಟಿಸಿದ ಶಿವನ ಗುಡಿಯಿದೆ.
ಈ ಗುಡಿಗೆ ಬೀಗ ಜಡೆದದ್ದರಿಂದ, ಗುಡಿಯ ಒಳಹೋಗಲಿಲ್ಲವಾದ್ದರಿಂದ, ಕಿಟಕಿಯಿಂದಲೇ ಇಣುಕಿ ನೋಡಿ ತೃಪ್ತರಾಗಬೇಕಾಯಿತು. ಚೆನ್ನಕೇಶವನ ಗುಡಿಯಲ್ಲಿ ನಿತ್ಯ ಪೂಜೆ ನಡೆಯುತ್ತಿದೆಯಾದರೂ, ಶಿವನ ಗುಡಿಯಲ್ಲಿ ನಿತ್ಯಪೂಜೆಗಳಿಲ್ಲ ಕೇವಲ ಸೋಮವಾರ ಪೂಜೆ ನಡೆಯುತ್ತಿದೆ ಎಂದು ತಿಳಿದು ತುಸು ಬೇಸರವಾಯಿತು. ಈ ಶಿವನ ಗುಡಿಯ ಮಂಟಪದ ಕಂಬಗಳಲ್ಲಿ ಹೊಯ್ಸಳರ ಶೈಲಿ ಕಂಡು ಬಂತು. ಒಳಗಿರುವ ಎರಡು ಹೞೆಗನ್ನಡದ ಶಾಸನಗಳೂ ಕಂಡು ಬಂದವು. ಒಂದು ಕಂಬವನ್ನು ಜಕಣನು ಕೆತ್ತದೇ ಹಾಗೇ ಉಳಿಸಿದ್ದು, ಮುಂದೆ ತನಗಿಂತ ಉತ್ತಮ ಶಿಲ್ಪಿ ಕೆತ್ತಲಿ ಎಂದು ಬಿಟ್ಟಿರುವನೆಂದು ಹೇಳಿದರಾದರೂ ನಮಗೆ ಯಾವುದದೆಂದು ಕಿಟಕಿಯಿಂದ ತಿಳಿದು ಬರಲಿಲ್ಲ. ಈ ಗುಡಿಯ ಮಂಟಪದ ಮೇಲೆ, ಆಕರ್ಷಕ ಚಂದ್ರಮೌಳೇಶ್ವರನ ವಿಗ್ರಹವೊಂದು ಕಾಣಸಿಗುತ್ತದೆ.

ಕೈದಾಳದ ಕೇಶವನ ದರ್ಶನ ಮಾಡಿ ಅಲ್ಲೇ ಬುತ್ತಿಯ ಊಟವ ಮಾಡಿ ಬೆಂಗಳೂರಿಗೆ ಹಿಂತಿರುಗಿದೆವು.

--ಶ್ರೀ

ಕೊ:
ಕೈದಾಳದಲ್ಲಿ ಗುಡಿಗೆ ಸರ್ಕಾರ ಬಣ್ಣ ಬಳಿಯುವ ಕೆಲಸವನ್ನು ಮಾಡುತ್ತಿದೆ ಎಂದು ಕಾಣುತ್ತದೆ, ಬಣ್ಣದ ಆಯ್ಕೆ ನನಗೆ ಸರಿ ಕಾಣಲಿಲ್ಲ.
ಹೊಸ ಬಣ್ಣದೊಂದಿಗೆ, ಹನ್ನೆರಡನೇ ಶತಮಾನದ ಗುಡಿ ಎಂದೆನಿಸುವುದೇ ಇಲ್ಲ...

ಕೈದಾಳದಲ್ಲಾಗಲಿ, ಗೂಳೂರಿನಲ್ಲಾಗಲಿ ಊಟ, ತಿಂಡಿಗಳ ವ್ಯವಸ್ಥೆಯಿಲ್ಲ, ಆದರೆ ಹತ್ತಿರದಲ್ಲೇ ತುಮಕೂರಿದೆಯಲ್ಲ! :)

ಜಿಂಕೆ ಕಣ್ಣು

2008-11-04T10:42:00.000-08:00

ಹೀಗೆ ಮನೆಗೆ ಬಂದವಳು,
ಎನ್ನ ಮನವ ಗೆದ್ದಳಲ್ಲ...

ನಾಚಿಕೆಯು ಇನಿತು ಇಲ್ಲ,
ಕುಡಿನೋಟ ಇವಳದಲ್ಲ...

ಕಣ್ಣಲಿ ಕಣ್ಣ ನೆಟ್ಟು,
ಮನದಿ ಕಿಡಿಯ ಇಟ್ಟಳಲ್ಲ...

ಮಾತು ಹೆಚ್ಚು ಹೊರಡಲಿಲ್ಲ,
ಕಣ್ಣುಗಳೇ ಇದ್ದವಲ್ಲ...

ಮಾತಿಗೆಂದು ಕರೆದ ನಾನು,
ಮಾತೇ ಮರೆತು ಹೋದೆನಲ್ಲ...

ಕಣ್ಣ ಸನ್ನೆಯಲ್ಲೆ ಇವಳು
ಬಣ್ಣ ಬಳಿದು ನಡೆದಳಲ್ಲ...

ಕಣ್ಣ,ಬಣ್ಣ ನೆನೆದು ನಾನು,
ನಿಂತ ನೆಲವ ಮರೆತೆನಲ್ಲ...

ತಿರುಗಿ ಮತ್ತೆ ನೋಡಿ ಇವಳು,
ಒಲವ ಬಿತ್ತು ಹೊರಟಳಲ್ಲ...

ಜಿಂಕೆ ಕಣ್ಣ ಹುಡುಗಿ ಇಂದು,
ತನ್ನ ಕಡೆಗೆ ಸೆಳೆದಳಲ್ಲ...
ತನ್ನ ಕಡೆಗೆ ಸೆಳೆದಳಲ್ಲ...

--ಶ್ರೀ